ޝަރީއަތް ނިމެންދެން ބަންދުކޮށްފައިވާ ކުރީގެ ރައީސް އަބްދުﷲ ޔާމީނަށް ނުބައި އެއްޗެއް ކާން ދިން ކަމަށް ބުނެ، ފެތުރި ޚަބަރަކީ ދޮގެއް ކަމަށް ނެޝަނަލް އިންޓަގްރިޓީ ކޮމިޝަން (އެންއައިސީ)އިން ބުނެފިއެވެ.

އެންއައިސީން ހުކުރު ދުވަހު ނެރުނު ނޫސްބަޔާނެއްގައި ބުނެފައި ވަނީ، ރައީސް ޔާމީންގެ އާއިލާއާ ހަވާލާދީ މީޑިއާގައި ފެތުރި ޚަބަރަކީ ދޮގެއް ކަމަށް އެމަނިކުފާނުގެ އާއިލާއިން ބުނެފައިވާ ކަމަށެވެ. އެ ޚަބަރަކީ އާންމުންގެ ކަންބޮޑުވުމެއް އޮތް، ޚަބަރެއް ކަމަށް އެ ކޮމިޝަނުން ދެކޭ ކަމަށާއި އެކަމާ ގުޅިގެން މައުލޫމާތު ހޯދުމަށް ރައީސް ޔާމީނާ އެންއައިސީން ބައްދަލުކޮށްފައިވާ ކަމަށް ނޫސްބަޔާނުގައި ބުނެފައިވެއެވެ.

ޔާމީން ބައްދަލުކޮށް ކަމާބެހޭ މަޢުލޫމާތު ހޯދިއިރު، އެފަދަ އެއްޗެއް ފަރިއްކުޅުއްވިގެން އެކަމުގެ ޝަކުވާއެއް ކޮށްފައި ނުވާނެ ކަމަށާއި އެފަދަ ކަމަކާ ގުޅިގެން ޑޮކްޓަރަށް ވެސް ދައްކަވާފައި ވެސް ނުވާނެ ކަމަށް ވިދާޅުވި ކަމަށް އެންއައިސީގެ ނޫސްބަޔާނުގައި ބުނެފައިވެއެވެ. ރައީސް ޔާމީންގެ ފަރިއްކޮޅުގެ ކަންކަން މޯލްޑިވްސް ކަރެކްޝަނަލް ސާވިސްއިން ކުރިއަށް ގެންދަވަނީ ރަނގަޅަށް ކަމަށް އެމަނިކުފާނާ ހަވާލާދީ އެންއައިސީން ބުންޏެވެ.

"...އެމަނިކުފާނުގެ އާއިލާއިން ވެސް އެފަދަ ތުހުމަތެއްކުރިކަން އެގިވަޑައިގެންފައި ނުވާ ކަމަށް ވިދާޅުވެ ކޮމިޝަނަށް މަޢުލޫމާތު ދެއްވާފައި ވާތީ އާއި، އެމަނިކުފާނުގެ ފަރިއްކޮޅުގެ ކަންކަން މޯލްޑިވްސް ކަރެކްޝަނަލް ސަރވިސްއިން ކުރިއަށް ގެންދަވާ ގޮތް ރަނގަޅު ކަމަށް ވިދާޅުވެފައިވާ ކަމާއި، އެކަމާމެދު ޝަކުވާއެއް ކުރައްވަން ބޭނުންފުޅު ނުވާ ކަމަށް އެމަނިކުފާނު ވިދާޅުވެފައިވާތީ، ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމަށް ނުބައި އެއްޗެއް ކާންދީފައިވާ ކަމަށް އާއިލާއިން ތުހުމަތުކުރާކަމަށްބުނެ، 7 މާރިޗު 2019 ވަނަ ދުވަހު މީޑިއާގައި ޢާއްމުވެފައިވާ ޚަބަރަކީ ޙަޤީޤަތާ ޚިލާފު ޚަބަރެއްކަމުގައި މި ކޮމިޝަނުން ދެކެމެވެ،" ޖަލުގައި ބަންދުކޮށްފައިވާ މީހެއްގެ ހާލަތާ ގުޅޭ ގޮތުން އެންއައިސީން ނެރުނު ފުރަތަމަ ނޫސްބަޔާނުގައި ބުނެފައިވެއެވެ.

އެންއައިސީން ބުނީ ޤާނޫނު ތަންފީޛުކުރާ އިދާރާތަކުގެ މުވައްޒަފުން ވަޒީފާ އަދާކުރުމުގައި ބޭނުންވާނެ ޤާނޫނީ ރައްކާތެރިކަން ލިބިދިނުމާ އެކު، ޤާނުނު ތަންފީޛުކުރާ އިދާރާތަކުގެ މުވައްޒަފުންގެ ޚިދުމަތާ ބެހޭ ގޮތުން ޢާއްމު ރައްޔިތުންގެ މެދުގައި އިތުބާރާއި ޔަޤީންކަން އިތުރުކުރުމަކީ އެންއައިސީގެ ޤާނޫނުގެ މަޤްޞަދެއް ކަމަށެވެ. ނަމަވެސް ކަރެކްޝަނަލް ސާރވިސްގެ ޚިދުމަތުގެ މައްޗަށް އިތުބާރު ކުޑަވާގޮތަށް، އެފަދަ ހަޤީޤަތެއް ނެތް ތުހުމަތުތައްކޮށް، ޚަބަރުތައް ޢާއްމު ކުރުމަކީ އެ ކޮމިޝަނުން ކަންބޮޑުވާ ކަމެއް ކަމަށް އެންއައިސީގެ ބަޔާނުގައިވެއެވެ.