މެންޖެޗެސްޓަރ ޔުނައިޓެޑްގެ ކުރީގެ މިޑް ފީލްޑަރ މަރުއޭން ފެލައިނީ ބެލްޖިއަމްގެ ގައުމީ ޓީމުން ރިޓަޔަރ ކުރިކަން އިއުލާން ކޮށްފިއެވެ.
ރިޕޯޓްތައް ބުނާ ގޮތުގައި ފެލައިނީ ރިޓަޔަރ ކުރިކަން އިއުލާން ކޮށްފައިވަނީ ބުރާސްފަތި ދުވަހު އޭނާ ކުރި ޓްވީޓެއްގައެވެ.
ރަޝިއާގައި ބޭއްވުނު ވޯލްޑްކަޕްގައި ބެލްޖިއަމް ސެމީ ފައިނަލަށް ގެންދިއުމުގެ އެންމެ ބޮޑު ރޯލެއް ކުޅުނު އެއް ކުޅުންތެރިއަކީ ފެލައިނީއެވެ.
ފެލައިނީ ވަނީ 87 ފަހަރަށް ބެލްޖިއަމް ޓީމަށް ކެޕްޓަންކަން ކޮށްދީ އެ ޓީމަށް 18 ލަނޑު ކާމިޔާބު ކޮށްދީފައެވެ.
ފެލައިނީ ކޮށްފައިވާ ޓްވީޓުގައި އޭނާ ބުނެފައިވަނީ، ވޭތުވެދިޔަ 12 އަހަރު އެންމެ މަތީ ފަންތީގައި ބެލްޖިއަމް ރަމްޒުކޮށްދެވިއްޖެ ކަމަށެވެ. މި ވަގުތަކީ އޭނާ ފަހަތަށް ޖެހިލާ އައު ޖީލަށް ފުރުސަތު ދޭންވި ވަގުތުކަމަށްވެސް އޭނާ ބުންޏެވެ.
ފެލައިނީ އިތުރަށް ބުނެފައިވަނީ، ދެ ވޯލްޑް ކަޕް ގައްޔާއި، ޔޫރަޕިއަން ޗެމްޕިއަންޝިޕްގައި ބެލްޖިއަމް ތަމްސީލް ކޮށްދެވިއްޖެ ކަމަށެވެ. 2007 ވަނަ އަހަރުން ފެށިގެން އުފާވެރި ދުވަސްތަކެއް ޓީމާއި އެކު ހޭދަ ކުރެވިއްޖެ ކަމަށްވެސް ފެލައިނީ ބުންޏެވެ.
ފެލައިނީގެ ޓްވީޓުގައި އޭނާ ވަނީ އޭނާއަށް އެހީތެރިވެދިން އެންމެނަށް ޝުކުރު އަދާކޮށްފައެވެ. އަދި ހަމަ އެހެންމެ ބެލްޖިއަމްގައި ތިބި އޭނާގެ ސަޕޯޓަރުންނަށް ވެސް ފެލައިނީ ޝުކުރު އަދާ ކުރިއެވެ.
ބެލްޖިއަމްއުން 2020 ވަނަ އަހަރުގެ ޔޫރޯ ކޮލިފައިންނަށް ތައްޔާރު ވުމަށް ރަޝިއާއި ދެކޮޅަށް މާރޗް 21 ވަނަ ދުވަހު ނުކުންނައިރު، މާރޗް 24 ވަނަ ދުވަހު ސައިޕްރަސްއާއި ދެކޮޅަށް ބެލްޖިއަމް ނުކުންނާނެއެވެ.
