އެސްއެމްއީ ލޯންގެ 20 އިންސައްތަ ހާއްސަ ކުރަނީ އަންހެނުންނަށާއި ޒުވާނުންނަށް : ރައީސް ސޯލިހު
7 މާރިޗު 2019 | ބުރާސްފަތި 07:31ހާއްޞަ އެހީއަށް ބޭނުންވާ މީހުންނަށް ވެސް ހާއްސަކުރާނެ ކަމަށް ރައީސް ސޯލިހު ވިދާޅުވި
ރައީސް ސޯލިހު
މި ސަރުކާރުން ޤާއިމުކޮށްފައިވާ އެސް.އެމް.އީ ޑިވެލޮޕްމަންޓް ފައިނޭންސް ކޯޕަރޭޝަން، މި މަހު ލޯނު ދޫކުރަން ފެށުމުން ލޯންގެ 20 އިންސައްތަ ޚާއްޞަކުރަނީ އަންހެނުންނަށާއި ޒުވާނުންނަށް އަދި ޚާއްޞަ އެހީއަށް ބޭނުންވާ މީހުންނަށް ކަމަށް ރައީސް ސޯލިހު ވިދާޅުވެއްޖެއެވެ.
އަންހެނުން ދުވަހުގެ ރަސްމިއްޔާތުގައި ވާހަކަފުޅު ދައްކަވަމުން ރައީސް ސޯލިހު ވިދާޅުވީ، އަންހެނުންނަށް ހަމަހަމަ ފުރުޞަތާއި، މަތީ މަޤާމުތައް ހޯދައިދިނުމުގެ ވާހަކަ ލައްކަ ދުވަސްތަކެއް ވަންދެން ދެއްކިއްޖެ ކަމަށާއި، ގެވެށި އަނިޔާ ހުއްޓުވައި ތަފާތުކުރުން ނައްތައިލާނެ ވާހަކަ ވެސް ވަރަށް ގިނައިން ދެއްކިއްޖެ ކަމަށާއި މި ސަރުކާރުން ބޭނުން ވަނީ، ބަސް މަދުކޮށް، ޢަމަލީ ގޮތުން އެ ކަންކަން ޙާޞިލް ކުރުމަށް ކަމަށެެވެ.
'' އެގޮތުން، މި ސަރުކާރުން ޤާއިމުކޮށްފައިވާ އެސް.އެމް.އީ ޑިވެލޮޕްމަންޓް ފައިނޭންސް ކޯޕަރޭޝަން، މި މަހުގެ ތެރޭގައި ބޭންކަކަށް ބަދަލުވެ، ލޯނު ދޫކުރަން ފެށުމުން، އަންހެނުންގެ ބައިވެރިވުމާއެކު އިޤްތިޞާދު ކުރިއަރައިގެން ދާނެ. އެ އަމާޒު ޙާޞިލު ކުރުމަށް، އެސްއެމްއީ ލޯންގެ 20 އިންސައްތަ އަޅުގަނޑުމެން މިޚާއްޞަ ކުރީ އަންހެނުންނަށާއި ޒުވާނުންނަށް އަދި ޚާއްޞަ އެހީއަށް ބޭނުންވާ މީހުންނަށް.'' ރައީސް ސޯލިހު ވިދާޅުވިއެވެ.
އެސްއެމްއީ ބޭންކެއް ރާއްޖޭގައި ގާއިމް ކުރުމަކީ ރައީސް ސޯލިހުގެ ވައުދުތަކުގެ ތެރޭގައި ހިމެނޭ ވައުދެކެވެ.
މި ބޭންކަކީ ދިވެހި ތާރީޚްގައި ވެސް މީގެ ކުރިން އުފައްދާފައި ނުވާފަދަ ގޮތަކަށް، ސިޓީ ކައުންސިލްތަކުގެ ހިއްސާއާ އެކު އުފެދޭނެ ބޭންކެއް ކަމަށާ އަދި މި ބޭންކު ވެގެންދާނީ، ދިވެހީންގެ މާލީ ތަނަވަސްކަމާ އިގްތިޞާދީ ފުދުންތެރިކަން އިތުރު ކުރުމުގައި، ވިޔަފާރިވެރިންނާއި ސަރުކާރު އަތުގުޅާލުމަށް ޤާއިމްކުރެވޭ މާލީ އިދާރާއެއްގޮތުގައި ކަމަށް އެބޭންކު އިފްތިތާހު ކުރުމަށް މި ދިޔަ އަހަރުގެ ޑިސެމްބަރު މަހު ބޭއްވި ރަސްމިއްޔާތުގައި ރައީސް ސޯލިހު ވަނީ ވިދާޅުވެފައެވެ.
