ހިޔާ މަޝްރޫއު: ސަރުކާރުގެ ކުންފުނިތަކުގައި ފްލެޓް ހެޅުމުގެ މާލީ ތަނަވަސްކަމެއް ނެތް
6 މާރިޗު 2019 | ބުދަ 05:54ބައެއް ކުންފުނިތަކުން ބޭރުގެ ކުންފުނިތަކަށް ސަބް ކޮންޓްރެކްޓް އުސޫލުން ފްލެޓް އަޅަން ދޫކޮށްފައިވޭ
މިނިސްޓަރ އާތިފާ
ރައީސް ޔާމިންގެ ސަރުކާރުން ފެށި ހިޔާ މަޝްރޫއުގެ ދަށުން ސަރުކާރުގެ ކުންފުނިތަކާ ހަވާލުކުރި 16 މަޝްރޫއުގެ ތެރެއިން އަމަލީ މަސައްކަތް ފަށާފައި އެންމެ އަށް ކުންފުންޏަކުން ކަމަށާއި އެފަދަ މަޝްރޫއުތައް ހިންގުމުގެ މާލީ ތަނަވަސްކަން ސަރުކަރުގެ ކުންފުނިތަކުގައި ނެތް ކަމަށް ހައުސިން މިނިސްޓަރު އާތިފާ ޝަކޫރު ވިދާޅުވެއްޖެއެވެ.
ރައްޔިތުން މަޖިލީހުގައި މެންބަރުންގެ ސުވާލުތަކަށް ޖަވާބު ދެއްވަމުން އަންގާރަ ދުވަހު މިނިސްޓަރު އާތިފާ ވިދާޅުވީ ހިޔާ މަޝްރޫއުގެ ސޮއިކުރި ގިނަ ކުންފުނިތަކާއި އިދާރާތަކުގައި މަސައްކަތް ކުރުމުގެ މާލީ އަދި ފަންނީ ގާބިލްކަން ނެތް ކަމަށެވެ. ބައެއް ކުންފުނިތަކުން ބޭރުގެ ކުންފުނިތަކަށް ސަބް ކޮންޓްރެކްޓް އުސޫލުން ފްލެޓް އަޅަން ދޫކޮށްފައިވާ އިރު، އަނެއް ބައި ކުންފުނިތަކުން ފްލެޓްތައް އަޅަން ނިންމާފައި ވަނީ އެ ކުންފުނިތަކުގެ ނަމުގައި ބޭރުގެ ބޭންކްތަކުން ނަގާފައިވާ ލޯނު އެހީގެ ދަށުން ކަމަށެވެ.
ހިތަދޫ މެދު ދާއިރާގެ މެމްބަރު އަބްދުﷲ މުހައްމަދު ދީދީ އެއްސެވި ސުވާލަކަށް ޖަވާބުދެއްވަމުން އާތިފާ ވިދާޅުވީ މި މަޝްރޫއުގެ ދަށުން ފްލެޓްތައް އަޅަން ކުންފުނިތަކުގެ އަމިއްލަ ފައިސާއިން ރޭވިފައި އޮތް ނަމަވެސް، ކުންފުނިތަކުގެ މާލީ ގާބިލްކަން ނެތުމުގެ ސަބަބުން އެ މާލީ ބުރަ ބައެއް ކުންފުނިތަކާއި އިދާރާތަކުގެ މުވައްޒަފުން ނަގަން ޖެހިފައިވާ ކަމަށެވެ.
"މަޝްރޫއުތައް ކުރިޔަށް ގެންދިޔުމަށް ކުންފުނިތަކަށް ނުކަތާ ވަރުގެ ލޯނު ނަގަން ޖެހި، އަދި ކުންފުނީގެ މުއައްޒަފުންނަށް ބޮޑު އަގުގައި ފްލެޓަށް ކުރިޔަށް ފައިސާ ދައްކަން ޖެހިފައިވާކަން ފާހަގަކުރަން،" އާތިފާ ވިދާޅުވިއެވެ.
ހިޔާ މަޝްރޫއުގެ ދަށުން އަޅަން ނިންމާފައިވާ ފްލެޓްތަކަކީ ސަރުކާރުގެ އެކި އިދާރާތަކާއި ކުންފުނިތަކުގެ މުއައްޒަފުންނަށް ހާއްސަކޮށްގެން، އެ ތަންތަނުގެ މުއައްޒަފުން ދިރިއުޅެން ހަދަން ނިންމި ފްލެޓްތަކެކެވެ. އަދި އޭރުގެ ސަރުކާރާ އެކު އެއްބަސްވެވުނީ 14 ބުރިއަށް ހަދަން ނިންމާފައިވާ ފްލެޓްތަކުން، އެއް ކޮޓަރީގެ އެޕާޓްމަންޓްތަކުން ބައެއް އެޕާޓްމަންޓްތައް ސަރުކާރަށް ދިނުމަށެވެ.
ހިޔާ މަޝްރޫއުގެ ދަށުން ފްލެޓްތައް އަޅަން ނިންމާފައިވާ ކުންފުނިތަކާއި އިދާރާތަކަކުގެ ތެރޭގައި އެމްޕީއެލް، އެމްއޭސީއެލް، ސްޓެލްކޯ، އައިލެންޑް އޭވިއޭޝަން، ކަސްޓަމްސް، ފެނަކަ، އެޗްޑީސީ، އިމިގްރޭޝަން، އެސްޓީއޯ، އެމްޓީސީސީ، އައިޔޫއެމް އަދި ގައުމީ ޔުނިވާސިޓީ ހިމެނެއެވެ. މީގެ ތެރެއިން ފްލެޓްގެ އަމަލީ މަސައްކަތް ފެށީ ކޮން ކުންފުނިތަކަކުން ކަމެއް މިނިސްޓަރ ވިދާޅުވެފައެއް ނުވެއެވެ. މި ސަރުކާރު އައި ފަހުން ކުންފުނިތަކާ ހަވާލުވި ބައެއް ވެރިން ވިދާޅުވެފައި ވަނީ އެ ކުންފުނިތަކުން އަޅަން ހަމަޖައްސާފައި ވަނީ ދިރިއުޅެން އެކަށީގެންވާ މިންވަރަށް ވުރެ ކުދި ފްލެޓްތައް ކަމަށެވެ. އެގޮތުން އެސްޓީއޯގެ އެމްޑީ ހުސައިން އަމްރު ވިދާޅުވެފައި ވަނީ ފްލެޓްތަކުގެ ޖާގަ ބޮޑުކޮށް ޑިޒައިނަށް ބަދަލު ގެނައުމަށް މަސައްކަތްކުރައްވަމުން އަންނަ ކަމަށެވެ.
