ހަމްޕު މާޒިޔާއަށް ސޮއި ކޮށްފި
4 މާރިޗު 2019 | ހޯމަ 13:47ހަމްޕު މާޒިޔާއާއި ގުޅުނީ ނިއު ދޫކޮށްލުމަށްފަހު
ހަމްޒާ މުހައްމަދު (ހަމްޕު)
މިދިޔަ އަހަރު ސާފު ސުޒުކީ ކަޕް ރާއްޖެއިން ކާމިޔާބުކުރުމުގައި ޤައުމީ ޓީމުގައި މުހިންމު ރޯލެއް އަދާކުރި ހަމްޒާ މުހައްމަދު (ހަމްޕު) މާޒިޔާ ސްޕޯރޓްސް އެންޑް ރެކްރިއޭޝަނަށް ސޮއިކޮށްފިއެވެ.
މިދިޔަ ސީޒަނުގައި ނިއު ރޭޑިއަންޓުގައި ރަނގަޅު ކުޅުމެއް ދެއްކި ހަމްޕު ނިއު ރޭއުއާއެކު ހަދާފައިވާ އެއްބަސްވުން އުވާލާފައިވަނީ ފެބްރުއަރީ މަހުގެ ތެރޭގައެވެ.
އެފްއެއޭއެމް ޕްލޭޔާ ސްޓޭޓަސް ކޮމިޓީން ހަމްޕު އާއި ނިއުއާ ދެމެދު ވެފައިވާ އެއްބަސްވުން އުވާލީ އެ ކޮމިޓީއަށް ހުށައެޅި ގަވާއިދުން މުސާރަ ނުލިބުމުގެ މައްސަލައާކާ ގުޅިއެންނެވެ.
2014 ވަނަ އަހަރު ނިއުރޭޑިއަންޓްގެ ޔޫތު ޓީމުން ފެނިގެންދިޔަ ހަމްޕު ވޭތުވެދިޔަ އަހަރުތަކުގައި ކުޅެފައިވަނީވެސް އެ ކްލަބަށެވެ.
ހަމްޕުއަކީ ފެށުނީއްސުރެން ކޯޗުންގެ ފަރާތުން ތައުރީފުލިބޭ ކުޅުންތެރިއެކެވެ. ނިއުގައި އޭނާ ހޭދަކުރި އަހަރުތަކުގައި ނިއު ހޯދާފައިވާ ކާމިޔާބީތަކުގައި ހަމްޕުގެ ދައުރު ބޮޑެވެ.
އާ ސީޒަނަށް ޓީމް ވަރުގަދަ ކުރުމަށް މާޒިޔާއިން އަންނަނީ ގިނަ ކުޅުންތެރިންތަކެއް އެޓީމަށް ގެންނަމުންނެވެ. އެގޮތުން ޓީސީއަށް ކުޅުނު އިބްރާހިމް ވަހީދް ހަސަން (އިއްބެ) ގެ ސޮއިވެސް އެ ކްލަބުން ވަނީ ހޯދާފައެވެ.
އިއްބެ އާއި ހަމްޕު މާޒިޔާއަށް ސޮއިކޮށްފައިވާއިރު، ދެން އެންމެ އަވަހަށް އެ ކްލަބަށް ސޮއިކުރާނެ ކަމަށް ބެލެވެނީ ޓީސީއަށް ކުޅެމުން އައި އިބްރާހިމް މަހުދީ (ފޭދޫ އިއްބެ) އެވެ.
