ގަވަރުނަރާއި އެފްއައިޔޫގެ ކުރީގެ ދެ ވެރިން މާދަމާ ކޮމިޓީއަށް ހާޒިރުކުރަނީ
ހާޒިރު ކުރަނީ އެމްއެމްޕީއާރްސީގެ މައްސަލާގައި
އެމްއެމްއޭގެ ކުރީގެ ދެ ވެރިންނާއި، ގަވަރުނަރު ކޮމިޓީއަށް ހާޒިރުކުރަނީ އަންގާރަދުވަހު
މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ ގަވަރުނަރު އަހްމަދު ނަސީރާއި ފައިނޭޝަނަލް އިންޓެލިޖެންސް ޔުނިޓްގެ ކުރީގެ ދެ ވެރިން ރައްޔިތުންގެ މަޖިލީހުގެ މާލިއްޔަތު ކޮމިޓީއަށް އަންގާރަ ދުވަހު ހާޒިރުކުރަން ނިންމައިފިއެވެ.
އެފްއައިޔޫގެ ކުރީގެ ވެރިޔާ އާތިފް ޝަކޫރު މާލިއްޔަތު ކޮމެޓީ އަށް ހާޒިރުކުރަނީ އަންގާރަ ދުވަހުގެ 11.45 އަށެވެ. އާތިފް އަށް ފަހު އެ މަގާމާއި ހަވާލުވެވަޑައިގެންނެވީ އަބްދުﷲ އަޝްރަފް ކޮމިޓީއަށް ހާޒިރުކުރަން ނިންމާފައި އޮތީ އަންގާރަ ދުވަހުގެ 11:15 އަށެވެ. މީގެ އިތުރުން އެމްއެމްއޭގެ ގަވަރުނަރު އަހްމަދު ނަސީރު އާއި އެފްއައިޔޫގެ ހެޑް އިބްރާހިމް އަހްމަދު ނާސިރު ކޮމިޓީއަށް ހާޒިރުކުރަން ނިންމާފައިވަނީ 12:30 އަށެވެ.
އެފްއައިޔޫގެ ކުރީގެ ދެ ވެރިންނާއި، މިހާރުގެ އެފްއައިޔޫގެ ހެޑްގެ އިތުރުން އެމްއެމްއޭގެ ގަވަރުނަރު ކޮމިޓީއަށް ހާޒިރުކުރަނީ އެމްއެމްޕީއާރުސީގެ ހިޔާނާތުގެ ތަހްގީގު ރިޕޯޓް އާންމުކުރުމާއި ގުޅިގެން، އެކަމާއި ގުޅޭ ގޮތުން މެމްބަރުން ސާފުކުރަން ބޭނުންފުޅުވާ ކަންތައް ސާފުކުރުމަށް ކަމަށް ކޮމިޓީގައި ހިމެނިވަޑައިގަންނަވާ ބޭފުޅަކު ވަނީ ވިދާޅުވެފައެވެ.
މާލިއްޔަތު ކޮމިޓީގެ މެމްބަރު ޣަފޫރު ވިދާޅުވީ އެފްއައިޔޫގެ ވެރިން ކޮމިޓީއަށް ހާޒިރުކުރަނީ، އެމްއެމްޕީއާރްސީގެ ހިޔާނާތުގެ މައްސަލަ އެ ޔުނިޓުން ދިރާސާ ކުރުމަށް ފަހު، އެ މައްސަލަ އަންގަންޖެހޭ ފަރާތްތަކަށް އެންގުމުގައި އޭރު އެމްއެމްއޭގެ ގަވަރުނަރުކަން ކުރައްވާފައިވާ ދެ ބޭފުޅުންގެ އެއްވެސް ނުފޫޒެއް މިކަމުގައި އޮތްތޯ ބެލުމަށް ކަމަށެވެ.
އާތިފް އެފްއައިޔޫގެ ވެރިޔަކަށް ހުންނެވީ ގަވަރުނަރަކަށް އަޒީމާ އާދަމް ހުންނެވި ދުވަސްވަރުއެވެ. އެފްއައިޔޫގެ ވެރިޔާގެ މަގާމުން އާތިފް އަމިއްލަފުޅަށް އިސްތިއުފާދެއްވީ 2015 ވަނަ އަހަރުގެ ޖޫން މަހުގެ ތެރޭގައި އެމްއެމްޕީއާރްސީ ހިޔާނާތުގެ ތަހްގީގް އޭސީސީން ފެށުމުގެ ކުރިންނެވެ.
އަޝްރަފް އެފްއައިޔޫގެ ވެރިޔާގެ މަގާމުން ވަކިކުރެއްވީ17 ސެޕްޓެމްބަރ 2018 ވަނަ ދުވަހު، މިހާރުގެ ގަވަރުނަރު އަހްމަދު ނަސީރުއެވެ. އަޝްރަފް މިހާރު ވަޒީފާ އަދާކުރައްވަނީ އެމްއެމްއޭގެ ސްޓްރެޖިކް ޕްލޭނިންގ އެންޑް ޑިވެލޮޕްމަންޓް ޕްރޮޖެކްޓްސް ސެކްޝަނުގައެވެ. ކުރީގެ ރައީސް އަބްދުﷲ ޔާމިންގެ އެކައުންޓަކަށް ގިނަ އަދަދެއްގެ ނަގުދު ފައިސާ ޖަމާކޮށް އަދި އެފައިސާ ނަގުދު ފައިސާ އިން ނަގާފައިވާކަމުގެ މައުލޫމާތު ރިޕޯޓް 13 ސެޕްޓެމްބަރު 2018 ދުވަހު، މޯލްޑިވްސް ޕޮލިސް ސާރވިސް އަށް ފޮނުއްވީ އަޝްރަފެވެ.
އާތިފް ޝަކޫރަކީ ކުރީގެ ރައީސް އަބްދުﷲ ޔާމީންގެ ސަރުކާރުގައި ރައީސް އޮފީހުގެ ލީގަލް އެފެއާޒް މިނިސްޓަރުގެ މަގާމް ފުރުއްވި އާޒިމާ ޝަކުރޫގެ ބޭބެއެވެ. ރައީސް އަބްދުﷲ ޔާމީންގެ އެކައުންޓަށް ޖަމާކުރި އެއް މިލިއަން ޑޮލަރުގެ މައްސަލައިގައި އާޒިމާ ޝަކޫރުގެ މައްޗަށް ދައުލަތުން ވަނީ ދެ ދައުވާއެއް އުފުލާފައެވެ. އެއީ ދައުލަތުގެ އިދާރާއަކަށް ދޮގު ހެކި ދިނުމާއި، މަނީ ލޯންޑަރކުރި ކުރުމަށް އެހީތެރިވެދިން ކަމުގެ ދައުވާއެވެ.
