ވޯޓް ކަރުދާހުގައި ކުރަހައިފިނަމަ ބާތިލްވާ އިސްލާހު މަޖިލީހުން ފާސްކޮށްފި
އިންތިޚާބާއި ބެހޭ ގާނޫނަށް އިސްލާހު ގެނައި، މިއީ ދެވަނަ ފަހަރު
މަޖިލިސް ޗެމްބަރުގައި މެމްބަރުން
ރަނގަޅު ފާހަގަ ފިޔަވާ އިތުރު ކުރެހުން ކުރަހާފައިވާ ވޯޓް ބާތިލް ވޯޓްގެ ގޮތުގައި ބަލައިގަތުމަށް އިންތިހާބާއި ބެހޭ ގާނޫނަށް ގެނައި އިސްލާހު މަޖިލީހުން ފާސްކޮށްފިއެވެ.މި އިސްލާހު ފާސްކޮށްފައި ވަނީ 53 މެމްބަރުންގެ ވޯޓުންނެވެ.
އިންތިހާބާއި ބެހޭ ގާނޫނަށް ހުށަހެޅުނު އިސްލާހު ފާސްކޮށްފައި ވަނީ، އިސްލާހު ގެންނަން ހުށަހެޅުއްވި ގޮތަށް އެއްވެސް އުނިއިތުރު ކަމެއް ނުގެނެސްއެވެ. މި އިސްލާހު ދިރާސާ ކުރެއްވުމަށް އެކުލަވާލެވުނު ފަސް މެމްބަރުންގެ ކޮމިޓީ ރިޕޯރޓް މަޖިލީހަށް ހުށަހަޅުއްވަމުން ކޮމިޓީގައި ހިމެނިވަޑައިގަންނަވާ މަރަދޫ ދާއިރާގެ މެމްބަރު މުހައްމަދު ޝަރީފް ވިދާޅުވީ ކޮމިޓީ މަރްހަލާގައި ބިލަށް އެއްވެސް ބަދަލެއް ގެނެސްފައިނުވާ ކަމަށެވެ.
ބިލް ދިރާސާ ކުރެއްވި ފަސް މެމްބަރުންގެ ވަގުތީ ކޮމިޓީގައި ހިމެނިވަޑައިގަންނަވަނީ ދަނގެތި ދާއިރާގެ މެމްބަރު އިލްހާމް އަހްމަދު، ކެލާ ދާއިރާގެ މެމްބަރު އަލީ އާރިފް، ހުޅުދޫ ދާއިރާގެ މެމްބަރު މުހައްމަދު ޝާހިދު،މަރަދޫ ދާއިރާގެ މެމްބަރު މުހައްމަދު ޝަރީފް، ކުޑަހުވަދޫ ދާއިރާގެ މެމްބަރު އަހްމަދު އާމިރުއެވެ.
އިންތިހާބާއި ބެހޭ ގާނޫނަށް އިސްލާހު ގެނައުމަށް ޕީޕީއެމްއިން ހުށަހެޅުއްވި މިއީ ދެވަނަ ފަހަރުއެވެ. ރިޔާސީ އިންތިޚާބުގެ ދުވަސްވަރު ޕީޕީއެމްގެ މަޖިލިސް މެޖޯރިޓީގައި އޮވެ، އޭރު އެ ޕާޓީން ހުށަހަޅުއްވާފައި ވަނީ ރަނގަޅު ފާހަގައެއް ފިޔަވާ އިތުރު ކުރެހުމެއް ކުރަހާފައިވީ ކަމުގައި ވީނަމަވެސް އެއީ ސައްހަ ވޯޓްގެ ގޮތުގަައި ބަލައިގަތުމަށެވެ. މިހާރު އިދިކޮޅުގައި ޕީޕީއެމް އޮވެ، ރައްޔިތުންގެ މަޖިލިސް އިންތިޚާބާއި ދިމާކޮށް އެ ޕާޓީން ހުށަހަޅާފައިވަނީ ރަނގަޅު ފާހަގައެއް ފިޔަވާ އިތުުރު ކުރެހުމެއް އޮވެއްޖެނަމަ، އެއީ ބާތިލް ވޯޓްގެ ގޮތުގައި ބަލައިގަތުމަށް އިންތިޚާބާއި ބެހޭ ގާނޫނަށް އިސްލާހު ގެނައުމަށެވެ.
ޝާހިދު ހުށަހެޅުއްވީ އިންތިޚާބާއި ބެހޭ އާންމު ގާނޫނުގެ 56 ވަނަ މާއްދާގެ (ހ) ގެ ހަތަރުވަނަ ނަމްބަރުގެ ފަހަތަށް ނަމްބަރެއް އިތުރު ކުރުމަށެވެ.
މި ގާނޫނުގެ 51 ވަނަ މާއްދާގެ (ހ) އާއި އެއްގޮތްވާ ގޮތުގެ މަތިން ވޯޓް ކަރުދާހުގައި އެމީހަކަށް ފެންނަ ކެންޑިޑޭޓެއްގެ ނަމާ ދިމާގައި ރަނގަޅު ފާހަގަ ޖެހުމުގެ އިތުރުން އިތުރު އެހެން ފާހަގައެއް ޖަހާފައިވާ ނުވަތަ ލިޔުމެއް ލިޔެފައިވާ ނުވަތަ ކުރެހުމެއް ކުރަހާފައިވާ ވޯޓް ބާތިލުވާނެ ކަމަށެވެ.
މި ގާނޫނަށް އަމަލުކުރަން ފަށާނީ މި ގާނޫނު ފާސްވެ ތަސްދީގްކޮށް ދިވެހިސަރުކާރުގެ ގެޒެޓްގައި ޝާއިއުކުރާ ދުވަހުން ފެށިގެންނެވެ.
ރައްޔިތުންގެ މަޖިލީހުގެ އިންތިޚާބު ބާއްވަން އިލެކްޝަންސް ކޮމިޝަނުން ކަނޑައަޅާފައިވާ ތާރީޚަކީ ހައެއް އެޕްރީލްއެވެ.
