ކުރީ ސަރުކާރުން ސިފައިން ބޭނުން ކުރީ ރަސްރަނި ޕާކު ފަދަ ޕާކުތައް ހެދުމަށް: މިނިސްޓަރު މާރިޔާ
4 މާރިޗު 2019 | ހޯމަ 06:15ހުރިހާ ކަމެއް ގުޅިފައި ހުރީ ސިޔާސީ މަސްލަހަތާ
މިނިސްޓަރު މާރިޔާ، ސިފައިންގެ ބޭފުޅުންނާއެކު
ކުރީ ސަރުކާރުގައި ސިފައިން ބޭނުން ކުރީ ރަސްރަނި ޕާކުފަދަ ޕާކުތައް ހެދުމަށް ކަމަށާއި، ގައުމީ ސަލާމަތަށް ގުޅުން ހުރި ކަންކަމަށް ނޫން ކަމަށް ޑިފެންސް މިނިސްޓަރު މާރިޔާ އަހުމަދު ދީދީ ވިދާޅުވެއްޖެއެވެ.
މިނިސްޓަރު މާރިޔާ މިހެން ވިދާޅުވީ 2019 ވަނަ އަހަރުގެ ފުރަތަމަ ދައުރުގެ 5 ވަނަ ޖަލްސާއަށް ހާޒިރުކުރުމުން ދެއްކެވި ވާހަކަފުޅުގައެވެ.
މިނިސްޓަރު މާރިޔާ ވިދާޅުވީ ރާއްޖޭގެ އަސްކަރީއާއަކީ ވަރުގަދަ އަޒުމެއްގައި ތިބޭ ބައެއް ކަމަށާއި، ޑިފެންސް މިނިސްޓަރުގެ މަގާމާ ހަވާލުވުމާއި ގުޅިގެން އެންމެ ފުރަތަމަ ކުރެއްވި މަސައްކަތަކީ ދިވެހި އަސްކަރިއްޔާ އޮތް ހާލަތު ދެނެގަތުން ކަމަށެވެ.
އެގޮތުން ކުރި ދިރާސާގައި މިގައުމުގައި އަސްކަރިއްޔާ އޮތް ހާލު ފެނިވަޑައިގެން ހައިރާންވެވަޑައިގެންނެވި ކަމަށާއި، ކުރީގެ ސަރުކާރުން ސިފައިންއިންތިހާއަށް ބޭނުން ކޮށްފައިވަނީ ނާޖާއިޒް ގޮތުގައި އެކިއެކި ޕްރޮޖެކްޓް ހިންގުމަށް ކަމަށް ވިދާޅުވިއެވެ.
"އަސްކަރިއްޔާ އޮޕަރޭޝަނަލް ގާބިލްކަން ހަރުދަނާކޮށް ކުރިއަރުވައި ގައުމަށް ކުރިމަތިވެދާނެ ހަމަލާއަކުން ދިފާއު ކުރުމުގެ ގާބިލްކަން އިތުރު ކުރުމަށް މަސައްކަތްތަކެއް ކުރެވިފައި ނެތްތަން އަޅުގަނޑަށް ފެނިގެންދިޔައީ." މިނިސްޓަރު މާރިޔާ ވިދާޅުވިއެވެ.
މިނިސްޓަރު މާރިޔާ ވިދާޅުވީ ސިފައިންގެ ބޭފުޅުން ބޭނުން ކުރީ ރަސްރަނި ޕާކު ފަދަ ޕާކު ހެދުމަށްކަމަށާއި، އެކިއެކި އިމާރާތް ކުރުމުގެ މަސައްކަތައް ކަމަށެވެ. އަދި ހުރިހާ ކަމެއް ވެސް ގުޅިފައިހުރީ ސިޔާސީ މަސްލަހަތާ ކަމަށާއި، ގައުމީ ސަލާމަތަށް ގުޅުންހުރި ކަންކަމަށް ނޫން ކަމަށް ވިދާޅުވިއެވެ.
މީގެ އިތުރުން މިނިސްޓަރު ވިދާޅުވީ އަސްކަރިއްޔާގެ ބޭނުން ކުރަން ހުރި އާލާތްތަކުގެ ތެރެއިން ގިނަ އާލާތްތައް ބޭނުން ނުކުރެވޭ މިންވަރަށް ހަލާކުވެފައިވާ ކަމަށެވެ.
ދިފާއީ ހަރަކާތްތަކުގައި ހަރަކާތްތެރިވާން ތިއްބެވި ބޭފުޅުން ތިއްބެވީ ނާއުންމީދުވެ މާޔޫސްވެފައިވާކަން ފާހަގަ ކުރައްވައި މިނިސްޓަރު މާރިޔާ ވިދާޅުވީ ސިފައިންގެ ހާލަތު އޮތީ ވަރަށް ދެރަކޮށް ކަމަށެވެ.
"މިއީ އެބޭފުޅުންގެ ކުށެއް ނޫން. މިކަމާ ޒިންމާ ނަގާނީ ކޮން ފަރާތެއްތޯ. ވޭތުވެދިޔަ ފަސް އަހަރުގެ ތެރޭގައި ގައުމަށް އެތައް ޒަމާންތަކެއް ވަންދެން ޚިދުމަތްކޮށްދީފައިވާ ސިފައިންގެ އެތައް ބޭފުޅުންނެތް ވަނީ އެއްވެސް ސަބަބަކާ ނުލާ ގޮތެއް ފޮތެއް ނެތި ނުބަލައި ނުހައްގުން ވަޒީފާއިން ވަކިކޮށްފައި. ނުހައްގުން އެބޭފުޅުންނާ ދޭތެރޭގައި، މިފަދަ ފިޔަވަޅުތައް ބެލޭނެ ނިޒާމެއް ނެތިފައި. އެބޭފުޅުން ޝަކުވާ ހިތްޕަވައިގެން ވަޑައިގަންނަވާނެ ތަނެއް ނެތިފައި. އެބޭފުޅުންގެ ހިތުގެ އުދާސްތައް އަޑުއަހާލާނެ ބަޔަކު ވެސް ނެތިފައި. " މިނިސްޓަރު ވިދާޅުވިއެވެ.
މިނިސްޓަރު މާރިޔާ ވިދާޅުވީ ސިފައިންގެ ވެރިން ގާނޫނޫ އަސާސީއާ ގާނޫނާ ގަވާއިދަށް އެއްވެސް ބެލުމެއް ނެތި ކުރާ އަމުރުތަކަށް ސުވާލެއް ކޮށްލިކަމުގައި ވިޔަސް، އެތައް ޒަމާނެއްވަންދެން އިހުލާސްތެރިކަމާއެކު ވަޒީފާ އަދާކުރި އެތައް ބަޔަކު މަސައްކަތަށް ބެލުމެއް ނެތި ވަޒީފާއިން ވަކިކުރުމަށް ނުވަތަ އެމީހުން އެންމެ މަސައްކަތް ކުރާ ހިތް ނުވާ ދިމާލަކަށް ބަދަލު ކޮށްފައިވާ ކަމަށެވެ.
މިނިސްޓަރު ވިދާޅުވީ ސިފައިން ތިބީ މާޔޫސްވެ ނާއުންމީދު ވެފައި ކަމަށާއި، ވަޒީފާގެ އެއްވެސް ޔަގީންކަމެއް ނެތިފައި ކަމަށެވެ. އަދި މިހުރިހާ މާޔޫސްކަމުގެ އިތުރުން ސިފްކޯ ހިޔާގެ މަޝްރޫއިން ބޯހިޔާވަހިކަން ހޯދުމަށް ޑިޕޮސިޓްގެ ގޮތުގައި ދައްކާފައިވާ ފައިސާއާ މެދު ވެސް ކަންބޮޑުވެގެން ދިޔަ ކަމަށް މިނިސްޓަރު ވިދާޅުވިއެވެ.
މިނިސްޓަރުގެ ހައިސިއްޔަތުން ރަނގަޅު އުސޫލުތަކެއް ކަނޑައަޅައި ކަންކަން ތަރުތީބު ކުރަމުން އަންނަ ކަމަށް ވެސް މިނިސްޓަރު މާރިޔާ ވިދާޅުވިއެވެ.
