މުދާ ގަންނަ ފަރާތްތަކާއި ޚިދުމަތް ލިބިގަންނަ ފަރާތްތައް ހިމާޔަތް ކުރުމުގެ ބިލް (ކޮންސިއުމަރ ޕްރޮޓެކްޝަން ބިލް)އަށް އާންމުންގެ ހިޔާލު ހޯދުމަށް ހުޅުވާލައިފިއެވެ.
ހޯމަ ދުވަހު މިނިސްޓްރީ އޮފް އިކޮނޮމިކް ޑިވޮލޮޕްމަންޓުން އާންމު ކުރި އިއުލާނެއްގައި ބުނެފައިވަނީ ޤާނޫނު ނަންބަރު 1/96 ( މުދާ ގަންނަ ފަރާތްތަކާއި ޚިދުމަތް ލިބިގަންނަ ފަރާތްތައް ހިމާޔަތް ކުރުމުގެ ޤާނޫނޫ އުވާލެވިފައިވާ ކަމަށާއި، އެފަރާތްތަކުގެ ހައްޤުތައް ކަށަވަރު ކުރުމަށް ކުރިއަށް ވުރެ ހަރުދަނާ ޤާނޫނީ އޮނިގަނޑެއް އެކުލަވާލުމުގެ މަސައްކަތް ކުރަމުންދާ ކަމަށެވެ. އަދި އެކަމަށްޓަކައި އާ ބިލެއް އެކުލަވާލާފައިވާ ކަމަށާއި، 11 މާރިޗު 2019 ވާ ހޯމަ ދުވަހުގެ ކުރިން މިނިސްޓްރީގެ އީމެއިލަށް ހިޔާލު ފޮނުވުމަށް ހުޅުވާލެވިފައިވާ ކަމަށް ވެސް އިއުލާނުގައި ބަޔާންކޮށްފައި ވެއެވެ.
Revamped draft of consumer protection bill is open for public consultation now. https://t.co/PjUInQNU4g
— Economy & Trade (@EconDevMv) March 4, 2019
މި ބިލުގެ މައިގަނޑު މަޤްސަދު ތަކުގެ ތެރޭގައި މުދާ ގަންނަ ފަރާތްތަކާއި، ޚިދުމަތް ލިބިގަންނަ ފަރާތްތަކުގެ ހައްޤުތައް ކަށަވަރު ކޮށްދިނުމާއި، އެ ފަރާތްތަކުގެ ޒިންމާތައް ކަނޑައެޅުމާއި، މަނާ ކުރެވިފައިވާ ކަންކަން ބަޔާން ކުރުމުގެ އިތުރުން އެ ފަރާތްތަކަށް ބަދަލު ހޯދޭނެ ގޮތްތައް ބަޔާން ކުރުން ހިމެނެއެވެ.
އޭގެ އިތުރުން، މި ބިލު ފަރުމާ ކުރެވިފައިވަނީ ކޯޓުން ބޭރުން މައްސަލަތައް ހައްލު ކުރެވޭނެ އިންތިޒާމެއް ހިިމެނޭ ގޮތަކަށް ކަމަށާއި، މުދާ ވިއްކުމާއި ޚިދުމަތްތައް ލިބިގަތުމުގައި ދިމާވާ އެކިއެކި ގޮންޖެހުންތަކަށް ހައްލު ހޯދައިދީ އެފަދަ މައްސަލަތައް ބަލާނެ "ކޮންސިއުމަރ އޮމްބަޑްސްމަން" ގެ މަޤާމެއް އުފައްދައި އެފަރާތުގެ ބާރުތަކާއި މަސްއޫލިއްޔަތުތައް ވެސް ބިލުގައި ކަނޑައެޅިގެންދާނެ ކަމަށް އިއުލާނުގައި ބުނެފައިވެއެވެ.
ކޮންސިއުމަރ ޕްރޮޓެކްޝަންގެ އާ ޤާނޫނުގެ ދަށުން އުފުލާ ޝަކުވާތައް ބެލުމަށްޓަކައި ޢައްޔަން ކުރެވޭ މިނިވަން، މުސްތަޤިއްލު ކޮންސިއުމަރ އޮމްބަޑްސްމަންއެއް ހުންނަންވާނެ ކަމަށާއި، އެ މަޤާމަށް މީހަކު ޢައްޔަންކުރާނީ، ރައީސުލްޖުމްހޫރިއްޔާ ކަމަށް ބިލުގެ ޑްރާފްޓްގައި ބަޔާން ކޮށްފައިވެއެވެ.
