ޕޯޗުގަލްގެ ސަރުކާރުން ރާއްޖެއަށް ކަނޑައެޅުއްވި އާ ސަފީރު ކަރލޮސް ޖޯސް ޑެ ޕިންހޯ ޕެރޭރާއާއި ބެލްޖިއަމްގެ ސަރުކާރުން ރާއްޖެއަށް ކަނޑައެޅުއްވި އާ ސަފީރު ފްރެންސުއާ ޑެލްހާޔޭގެ ސަފީރުކަމުގެ ފަތްކޮޅު، ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހަށް މިއަދު އަރުވައިފިއެވެ.
އާދިއްތަ ދުވަހު ރައީސުލްޖުމްހޫރިއްޔާގެ އޮފީހުގައި ބޭއްވެވި ރަސްމިއްޔާތުތަކުގައި، ރައީސް ސޯލިހު ވަނީ ސަފީރުކަމާ ހަވާލުވެވަޑައިގަތުމާ ގުޅިގެން ދެ ބޭފުޅުންނަށް ވެސް ތަހުނިޔާ ވިދާޅުވެފައެވެ.
އެގޮތުން ބެލްޖިއަމްގެ އާ ސަފީރާ އެކު ރައީސުލްޖުމްހޫރިއްޔާ ބޭއްވެވި ބައްދަލުކުރެއްވުމުގައި، ދެ ގައުމުގެ ގުޅުން އިތުރަށް ވަރުގަދަ ކުރެވޭނެ ގޮތްތަކާއި ބެހޭގޮތުން ވަނީ މަޝްވަރާ ކުރައްވާފައެވެ. އަދި އިންސާނީ ޙައްޤުތަކާއި، މޫސުމަށް އަންނަ ބަދަލުތަކާއި، ހެޔޮ ވެރިކަމެއްގެ މުހިންމުކަމާއި ބައިނަލްއަޤްވާމީ މުހިންމު މައްސަލަތަކުގައި، ދެ ޤައުމުން ގުޅިގެން މަސައްކަތް ކުރުމާ ބެހޭ ގޮތުންވެސް ދެ ބޭފުޅުން މަޝްވަރާ ކުރެއްވި ކަމަށް ރައީސް އޮފީހުން ވަނީ މައުލޫމާތު ދީފައެވެ.
މީގެ އިތުރުން، މިމަހުގެ ފަހުކޮޅު ބޭއްވުމަށް ހަމަޖެހިފައިވާ އީ.ޔޫ. ޕޮލިސީ ޑައަލޮގްއާއި، އަންނަ ޖޫން މަހު ރާއްޖޭގައި ބާއްވަން ހަމަޖެހިފައިވާ ޕާޓްނަޝިޕް ފޯރަމްގެ މައްޗަށްވެސް ރައީސު އަލިއަޅުއްވައިލެއްވިއެވެ. އަދި މި ބައްދަލުވުންތަކުގެ ސަބަބުން ދެ ގައުމުގެ ދޭތެރޭގައި އޮތް ގުޅުން އިތުރަށް ބަދަހިވެ، އިންވެސްޓްމަންޓްތަކާއި އިގްތިސާދީ އެކިއެކި ހަރަކާތްތަކަށް ފުރުސަތު ފަހިވެގެންދާނެ ކަމަށް އުއްމީދު ކުރައްވާ ކަމަށް ރައީސް ވިދާޅުވިއެވެ.
ޕޯޗުގަލްގެ އާ ސަފީރާއެކު ބޭއްވެވި ބައްދަލުކުރެެއްވުމުގައި ދެބޭފުޅުން ވަނީ، ޤަރުނުތަކެއް ކުރިން ދެޤައުމުގެ ދެމެދުގައި ހިނގާފައިވާ ތާރީހީ ކަންކަމުގެ މައްޗަށް އަލިއަޅުއްވާލައްވައި، ވޭތުވެދިޔަ ތަނަށްވުރެ ކުރިޔަށް އޮތްތާގައި ވާން ހުރިކަންތައްތަކަށް އަހައްމިއްޔަތުކަން ދިނުމުގެ މައްޗަށް ވާހަކަފުޅުދައްކަވާފައެވެ. އަދި ދެގައުމުގެ ގުޅުން އާ ފެށުމަކުން ފެށުމާ ބެހޭގޮތުން މަޝްވަރާކުރައްވާފައިވާ ކަމަށް ރައީސް އޮފީހުން ވަނީ މައުލޫމާތު ދީފައެވެ. އެގޮތުން ދެގައުމުގެ ދެމެދުގައި ކުޅިވަރުގެ ރޮނގުން ގުޅުންބަދަހިކުރެއްވުމާއި، އިގްތިސާދީ ގޮތުންނާއި އިއާދަކުރަނިވި ހަކަތަ އުފެއްދުމުގެ ރޮނގުން ގުޅުން ބަދަހިކުރެއްވުމާ ބޭހޭގޮތުން ވެސް ދެ ބޭފުޅުން މަޝްވަރާކުރެއްވިއެވެ.
މި ބައްދަލުކުރެއްވުމުގައި، ޕޯޗުގަލްގެ އާ ސަފީރު ޖޯސް ޑެ ޕިންހޯ ދެއްކެވި ވާހަކަފުޅުގައި ރާއްޖެއަށް ޚިދުމަތްކުރަން ލިބުމަކީ ފަހުރެއްގެ ގޮތުގައި ފާހަގަކުރައްވާފައި ވެއެެވެ. އަދި އެމަނިކުފާނުގެ ސަފީރުކަމުގެ ދައުރުގައި ދެޤައުމުގެ ގުޅުން އިތުރަށް ބަދަހިވެގެންދާނެކަމަށް އުންމީދު ކުރައްވާކަމަށް ވެސް ޕިންހޯ ވިދާޅުވިއެވެ.
