ޔޫއޭއީގައި ކުރިޔަށް ގެންދިޔަ އޯގަނައިޒޭޝަން ފޯރ އިސްލާމިކް ކޯޕަރޭޝަންގެ (އޯއައިސީގެ) ބައްދަލުވުމުގައި، އިސްލާމީ ގައުމުތައް އެއްބައިވަންތަވުމަށާއި ކަންކަން ހައްލުކުރުމަށް މަސައްކަތް ކުރުމަށް ހާރިޖީ ވަޒީރު އަބްދުﷲ ޝާހިދު ގޮވާލައްވައިފިއެވެ.
އޯއަސީގެ 46ވަނަ ކައުންސިލް ބައްދަލުވުމުގައި ވާހަކަފުޅު ދައްކަވަމުން މިނިސްޓަރ ޝާހިދު ވިދާޅުވީ އިންސާނީ ހައްގުތަކާ، ވިޔަފާރި އަދި މައުލޫމާތު ބަދަލުކުރުމުގެ ދާއިރާއިން އިސްލާމީ ގައުމުތަކުން އެކުގައި ކުރާ މަސައްކަތްތައް އިތުރުކުރަން ޖެހޭ ކަމަށެވެ. މިނިސްޓަރ ވަނީ މި ލަނޑުދަނޑިއަށް ވާސިލްވުމަށް އިސްލާމް ދީނުގެ މަތިވެރި އުސޫލުތައް އިސްކުރަން ބާރުއަޅުއްވާފައެވެ.
މި ބައްދަލުވުމުގައި މިނިސްޓަރ ޝާހިދު ވަނީ މިދިޔަ ރިޔާސީ އިންތިހާބަށް ފަހު ރާއްޖެއިން އިންސާނީ ހައްގުތަކުގެ ދާއިރާއިން ހޯދި ކުރިއެރުންތަކާއި ޑިމޮކްރެޓިކް ހަމަތަކަށް ވާސިލުވުމަށް ކުރެވުނު މަސައްކަތްތަކާއި ބެހޭގޮތުން މެމްބަރު ގައުމުތަކަށް މައުލޫމާތު ދެއްވާފައެވެ.
މީގެ އިތުރުން ޝާހިދު ވަނީ ހައްދުފަހަނަ އެޅުމާ ދެކޮޅަށް މަސައްކަތް ކުރަން ޖެހޭ ކަމަށް ވިދާޅުވެފައެވެ. ދިވެހިރާއްޖެއިން ޓެރަރިޒަމް، ހާއްސަކޮށް އިސްލާމް ދީނުގެ ނަމުގައި ހިންގާ ޓެރަރިޒަމްގެ އަމަލުތައް ވަރަށް ހަރުކަށި އިބާރާތުން ކުށްވެރި ކުރާ ކަމަށް ވެސް އޭނާ ވިދާޅުވިއެވެ.
ބައިނަލްއަގްވާމީ މަޝްރަހުގައި އިސްލާމީ އުއްމަތަށް މުހިންމު ކަންކަމަށް އަލިއަޅުވާލަމުން ޝާހިދު ވަނީ ފަލަސްތީނުގެ މައްސަލައާއި ރޮހިންޔާ މުސްލިމުންގެ މައްސަލައާއި ބެހޭގޮތުން ވާހަކަދައްކަވާފައެވެ. އެގޮތުން ޝާހިދު ވަނީ ފަލަސްތީނު މިނިވަން ދައުލަތެއްގައި ގޮތުގައި އޮންނަން ދިވެހިރާއްޖެއިން ބޭނުންވާ ކަމަށް ވިދާޅުވެފައެވެ. އަދި ރޮހިންޔާ މުސްލިމުންނަށް އެއްވެސް ކަހަލަ ހުރަހަކާއި ނުލާ އިންސާނީ އެހީ ލިބޭނެކަމަށް ވެސް ޝާހިދު ވިދާޅުވިއެވެ.
މިނިސްޓަރ ޝާހިދު އަބޫ ދާބީއަށް ކުރައްވާ ދަތުރުފުޅުގެ ހަވާސާގައި އެހެން ގައުމުތަކުގެ ހާރިޖީ ވަޒީރުންނާއި އެކު ބައްދަލުވުންތަކެއް ބާއްވަން ހަމަޖެހިފައިވެއެވެ. އަދި އޯއައިސީގެ ސެކެޓްރީ ޖެނެރަލާއި އެކު ބައްދަލުކުރެއްވުމަށް ވެސް ވަނީ ހަމަޖެހިފައެވެ.
މުސްލިމް 57 މެމްބަރު ގައުމު ހިމެނޭ އޯއައިސީގެ މެމްބަރަކަށް ރާއްޖެވީ 1967 ވަނަ އަހަރުގައެވެ. އަދި ރާއްޖެއިން މި އަހަރުގެ ތެރޭގައި އޯއައިސީއާއި ގުޅިގެން ގިނަ ހަރަކާތްތަކެއް ހިންގަން ރާވާފައި ކަމަށް ފޮރިން މިނިސްޓްރީއިން ވަނީ މައުލޫމާތު ދީފައެވެ.
