ޑރ. އަބްދުﷲ މައުސޫމް ޖުމްހޫރީ ޕާޓީގެ ނައިބު ރައީސްގެ މަގާމުން އިސްތިއުފާ ދެއްވައިފި އެވެ.
ޑރ.މައުސޫމް ޖޭޕީގެ ނައިބު ރައީސްގެ މަގާމުން އިސްތިއުފާ ދެއްވިކަން ހާމަ ކުރައްވައި އޭނާ ވަނީ ސަބަބުވެސް ބަޔާން ކުރައްވާފައި އެވެ.
އޭނާ ވިދާޅުވެފައި ވަނީ މަގާމުން އިސްތިއުފާ ދެއްވީ މިހާރު ރާއްޖެއިން ބޭރުގައި ދިރިއުޅުއްވަމުން ނައިބު ރައީސްގެ މައްސޫލިއްޔަތު އެންމެ އެދެވޭ ގޮތުގައި އަދާކުރަން ދަތިވާނެ ކަމަށެވެ. އަދި ވިދާޅުވެފައި ވަނީ ކޯލިޝަން ސަރުކާރެއްގައި ސަފީރެއްގެ މަގާމުގައި ހުންނަ މީހަކީ ކޯލިޝަން ޕާޓީއެއްގެ އިސް މަގާމެއް އަދާ ކުރާ މީހެއް ކަމަށްވާނަމަ މަސްލަހަތު ފުށުއެރުމުގެ ފުރުސަތު ވެސް އޮންނާނެ ކަމަށެވެ.
މައުސޫމަކީ މިހާރު ދިވެހިރާއްޖެއިން ސިންގަޕޫރަށް ކަނޑައަޅުއްވާފައި ހުންނަވާ ސަފީރެވެ. ރައްޔިތުންގެ މަޖިލީހުގެ ރުހުމާއެކު އޭނާ އެ މަގާމާ ހަވާލުވެވަޑައިގެންނެވީ މި މަހުގެ 18 ވަނަ ދުވަހު އެވެ.
މައުސޫމް ޖޭޕީގެ ނައިބު ރައީސްގެ މަގާމާ ހަވާލުވެވަޑައިގެންނެވީ މިދިޔަ އަހަރުގެ ޖުލައި މަހު ބޭއްވި އެ ޕާޓީގެ ކޮންގްރެސްގަ އެވެ.
