ރަކިޓިޗް ހޯދަން ޔުނައިޓެޑުން މަސައްކަތް ކުރަނީ!

ބާސެލޯނާ އަށް ކުޅެމުން އަންނަ އިވާން ރަކިޓިޗް ހޯދަން މެންޗެސްޓާ ޔުނައިޓެޑުން މަސައްކަތް ކުރަމުން އަންނަ ކަމަށް ރިޕޯޓްތައް ބުނެފިއެވެ.

ރިޕޯޓްތައް ބުނާ ގޮތުން ބާސާއިން އަންނަނީ ރަކިޓިޗް ވިއްކާލުމާ މެދު ވިސްނަމުންނެވެ. އެގޮތުން ޔުނައިޓެޑުން ރަކިޓިޗްއަށް ޝައުގުވެރިކަން ފާޅުކޮށް، އޭނާގެ ސޮއި ހޯދުމަށް އަންނަނީ މަސައްކަތް ކުރަމުން ކަމަށް ރިޕޯޓްތައް ބުނެއެވެ.

ރަކިޓިޗް ހޯދުމަށް ޔުނައިޓެޑްގެ އިތުރުން ނަން މަޝްހޫރު ގިނަ ކްލަބްތައްކުން އަންނަނީ މަސައްކަތް ކުރަމުންނެވެ. އޭގެ ތެރޭގައި އިންޓަ މިލާން ވެސް ހިމެނެއެވެ.

ބާސާއާ އެކު އުމުރުން 30 އަހަރުގެ ރަކިޓިޗް ހަދާފައިވާ އެއްބަސްވުން 2021 ގައި ހަމަވާއިރު، އޭނާގެ ރިލީޒް ފީއަކީ 125 މިލިއަން ޔޫރޯއެވެ.

ދާދި ފަހުން ނޫސްވެރިންނަށް މައުލޫމާތު ދެމުން ރަކިޓިޗް ބުނީ، އޭނާގެ ކުރިމަގު އޮތީ ބާސާއާ އެކުގައި ކަމަށާއި، ދިގު މުއްދަތެއް ވަންދެން ބާސާގައި މަޑުކުރަން ބޭނުންވާ ކަމަށެވެ. އަދި ބާސާގައި ހުރީ ހިތްހަމަޖެހިގެން ކަމަށް ވެސް އޭނާ ވަނީ ބުނެފައެވެ.

ބަސެލް އިން ސީނިއާ ކެރިޔަރު ފެށި ރަކިޓިޗް ވަނީ ޝާލްކޭ އާއި ސެވިއްޔާ އަށް ވެސް ކުޅެފައެވެ. އޭނާ ބާސާ އަށް ބަދަލުވީ 2014 ވަނަ އަހަރުގެ ސީޒަނުގައެވެ.

އެގޮތުން ރަކިޓިޗް ވަނީ މިހާތަނަށް ބާސާ އަށް ކުޅުނު 251 މެޗުގައި 34 ލަނޑު ކާމިޔާބުކޮށްފައެވެ. އޭނާ ވަނީ ބާސާއާ އެކު ސްޕެނިޝް ލަލީގާ ތިން ފަހަރު، ކޮޕަޑެލްރޭ ހަތަރު ފަހަރު، ސްޕެނިޝް ސުޕަ ކަޕް ދެފަހަރު، ޔުއެފާ ޗެމްޕިއަންސް ލީގު އެއްފަހަރު، ޔުއެފާ ސުޕަ ކަޕް އެއް ފަހަރު އަދި ފީފާ ކްލަބް ވޯލްޑް ކަޕް އެއް ފަހަރު ކާމިޔާބުކޮށްފައެވެ.

ކްރޮއޭޝިއާ ގައުމީ ޓީމާއެކު މިދިޔަ އަހަރު ނިމުނު ފީފާ ވޯލްޑް ކަޕްގެ ދެވަނަ ހޯދި ރަކިޓިޗް ވަނީ ގައުމީ ޓީމަށް މިހާތަނަށް ކުޅުނު 100 މެޗުގައި 15 ލަނޑު ކާމިޔާބުކޮށްފައެވެ.