މެލޭޝިއާއިން ވިސާ ހޯދަން ލުއިި ގޮތްތަކެއް ހޯދައި ދޭން މިނިސްޓަރު ޝާހިދު އެދިވަޑައިގެންފި
ޝާހިދު ވަނީ 4 ގައުމެއްގެ ހާރިޖީ ވަޒީރުންނާ ބައްދަލު ކުރައްވާފައި
މިނިސްޓަރ ޝާހިދު މެލޭޝިއާގެ ހާރިޖީ ވަޒީރު ސައިފުއްދީން ބިން އަބްދުﷲއާއި ބައްދަލުކުރައްވަނީ
މެލޭޝިއާއިން ދިވެހިންނަށް ވިސާ ދިނުމުގައި މިހާރަށް ވުރެ ލުއި ގޮތްތަކެއް ހަމަޖައްސައި ދެއްވުމަށް މެލޭޝިއާގެ ހާރިޖީ ވަޒީރު ދާތޯ ސައިފުއްދީން ބިން އަބްދުﷲގެ އަރިހުން، ހާރިޖީ ވަޒީރު އަބްދުﷲ ޝާހިދު އެދިވަޑައިގެންފިއެވެ.
އަންގާރަ ދުވަހު ސްވިޒަލެންޑްގެ ވެރިރަށް ޖެނީވާގައި ބޭއްވި ބައްދަލުކުރެއްވުމުގައި މިނިސްޓަރ ޝާހިދު ވަނީ ދިވެހިންނަށް މެލޭޝިއާއިން އަދާކުރަމުން ގެންދާ މެހެމާންދާރީއަށް ޝުކުރު އަދާކުރައްވާފައެވެ. އަދި ދެބޭފުޅުން ވަނީ ދެ ގައުމުގެ ގުޅުން އިތުރަށް ހަރުދަނާކުރުމާ ބެހޭ ގޮތުން ވެސް މަޝްވަރާކުރައްވާފައެވެ.
މީގެ އިތުރުން މިނިސްޓަރ ޝާހިދު ވަނީ މެލޭޝިއާއިން ޑިމޮކްރެސީއަށް އަލުން ރުޖޫއަވިކަމަށްޓަކައި މަރުހަބާ ދަންނަވަމުން، ދިވެހި ރައްޔިތުންނަށް އެކަމުން ހިތްވަރު ލިބުނުކަމަށް ވިދާޅުވެފައެވެ. ޝާހިދު އިޝާރާތް ކުރެއްވީ މެލޭޝިއާގެ ކުރީގެ ބޮޑުވަޒީރު ނަޖީބް ރައްޒާގްގެ ވެރިކަން ނިމުމަކަށް ގެނައުމަށެވެ.
މެލޭޝިއާގެ ހާރިޖީ ވަޒީރުގެ އިތުރުން މިނިސްޓަރ ޝާހިދު ވަނީ ޖޯޖިއާ، އިންޑޮނޭޝިއާ، އަޔަރލެންޑް އަދި އިޓަލީގެ ހާރިޖީ ވަޒީރުންނާ ބައްދަލުކުރައްވާފައެވެ. މީގެ އިތުރުން މޮރޮކޯގެ މިނިސްޓަރ އޮފް ސްޓޭޓް ފޯ ހިއުމަން ރައިޓްސްއާ ވެސް ޝާހިދު ބައްދަލުކުރެއްވިއެވެ.
މި ބައްދަލުކުރެއްވުންތަކުގައި އެ ގައުމުތަކާ އެކު އޮތް ގުޅުން އިތުރަށް ބަދަހިކުރެވޭނެ ގޮތްތަކާ ބެހޭ ގޮތުން މަޝްވަރާކޮށްފައެވެ. އަދި މޫސުމީ ބަދަލުތަކުގެ ސަބަބުން ކުދި ޖަޒީރާ ގައުމުތަކަށް ދިމާވާ މައްސަލަތަކާ ބެހޭގޮތުން ޝާހިދު ވަނީ އެ ބޭފުޅުންނާ މަޝްވަރާކޮށްފައިވެއެވެ. ސިއްހީ އަދި ފަތުރުވެރިކަމުގެ ދާއިރާއިން އެކުގައި މަސައްކަތް ކުރެއްވުމަށް ވެސް ބައެއް ވަޒީރުންނާ އެކު ޝާހިދު މަޝްވަރާކުރެއްވިއެވެ.
މިނިސްޓަރ ޝާހިދު ޖެނީވާއަށް ވަޑައިގެންނެވީ އދގެ ހިއުމަން ރައިޓްސް ކައުންސިލްގެ 40ވަނަ ސެޝަންގައި ބައިވެރިވެވަޑައިގަތުމަށެވެ. މި ދަތުރުފުޅަށް ފަހު ދެން މިނިސްޓަރު ވަޑައިގަންނަވާނީ ދުބާއީގައި އޮތް ހާރިޖީ ވަޒީރުންގެ ކައުންސިލްގެ 45ވަނަ ސެޝަންގައި ބައިވެރިވެވަޑައިގަތުމަށް ޔޫއޭއީއަށެވެ.
