އިންނަމާދޫ ނެރު ކައިރިއަށް ބޯޓެއް އަޑިއަށް ދަނީ
27 ފެބުރުއަރީ 2019 | ބުދަ 13:25ބޯޓު ދިޔަވާން މެދުވެރިވީ ނެރުގެ ފައިކަށީގައި ޖެހި ބޯޓުގެ ބަނޑުފިލާ އެއްކޮށް ހަލާކުވުމުން
ބޯޓު ސަލާމަތްކުރުމުގައި އިންނަމާދޫ ރައްޔިތުން ހަރަކާތްތެރިވަނީ
މުދާ ހިފައިގެން ދަތުރުކުރި ބޯޓެއް، އިންނަމާދޫ ނެރުގެ ފައިކަށީގައި ޖެހި ލިބުނު ގެއްލުމުގެ ސަބަބުން ބަނދަރު ތެރޭގައި އޮވެ ބޯޓު ދިޔަވެ، އަޑިއަށްދާ ކަމުގެ މައުލޫމާތު ލިބިއްޖެއެވެ.
ރާއްޖެއެމްވީއަށް މައުލޫމާތު ދެމުން މަންޒަރު ދުށް ފަރާތަކުން ބުނީ ބޯޓު ދިޔަވާން މެދުވެރިވީ ނެރު ތެރެއަށް ވަންނަން އުޅުނު ގަޑީގައި، ނެރުގެ ފައިކަށީގައި ޖެހި ބޯޓުގެ ބަނޑުފިލާ އެއްކޮށް ހަލާކުވުމުން ކަމަށެވެ. ބޯޓުގެ ދެބައިކުޅަ އެއްބައި މިހާރު އޮތީ ފެނުގެ އަޑީގައި ކަމަށް ވެސް އޭނާ ބުންޏެވެ.
މި ހާދިސާގައި އެއްވެސް މީހަކަށް ހާނިކައެއް ލިބިފައި ނުވާ ކަމަށާއި، ހުރިހާ ފަރާތްތަކެއް ވެސް ސަލާމަތުން ރަށަށް ފައިބާފައިވާ ކަމަށް އެ ފަރާތުން ވަނީ މައުލޫމާތު ދީފައެވެ. އަންގާރަ ދުވަހުގެ ރޭ 8:00ގައި މާލެއިން ފުރައިގެން އިންނަމާދޫއަށް ދާން ދަތުރުފެށި "މިހިރީ 5" ދޯނި ނެރުގެ ފައިކަށީގައި ޖެހުނީ ބުދަ ދުވަހު މެންދުރު ގަޑިން 12:15ހާ އިރެވެ.
ދޯނީގައި ހުރި މުދާތަކުގެ ތެރޭގައި އެ ރަށަށް ގެންދިޔަ ކާޑުގެ ބާވަތްތަކާއި، ދަގަނޑާއި، ހިލަ އަދި ހިކި ކާނާގެ ބާވަތްތައް ވެސް ހިމެނޭ ކަމަށް ރާއްޖެއެމްވީއަށް މައުލޫމާތު ދިން ފަރާތުން ވަނީ ބުނެފައެވެ. އަދި ބޯޓު ނެގުމުގެ މަސައްކަތް މިހާރު ކުރަމުންދާ ކަމަށް ވެސް އެ ފަރާތުން މައުލޫމާތު ދީފައިވެއެވެ.
މި ސަރަހައްދުގައި އެމްއެންޑީއެެފުން ނޮދަން އޭރިއާގެ ކޯސްޓް ގާޑުން ވެސް ހަރަކާތްތެރިވަމުންދާ ކަމަށް އެމްއެންޑީއެފްއިން ވަނީ މައުލޫމާތު ދީފައެވެ.
