ހިޔަނާތާއި ފަސާދައިގެ މައްސަލަތައް ތަހުގީގު ކުރުމަށް އުފައްދާފައިވާ ރިޔާސީ ކޮމިޝަނާއި މަރުތައް ބެލުމަށް އުފައްދާފައިވާ ކޮމިޝަނަށް ބާރު ދިނުމުގެ ބިލު ފާސްކޮށްދިނުމުގައި ވަޒީރުންގެ އެހީތެރިކަމަށް ރައީސުލްޖުމްހޫރިއްޔާ އިބުރާހިމް މުހައްމަދު ސާލިހު އެދިވަޑައިގަންނަވައިފިއެވެ.

ރައީސުލްޖުމްހޫރިއްޔާ އެކަމަށް އެދިވަޑައިގެންނެވީ، އަންގާރަ ދުވަހު އޮތް ވަޒީރުން މަޖިލީހުގެ ބައްދަލުވުމުގައި ކަމަށް ރައީސްގެ އޮފީހުގެ ތަރުޖަމާނު އިބްރާހިމް ހޫދު ވިދާޅުވިއެވެ.

އަންގާރަ ދުވަހު ތިންވަނަ ފަހަރަށް އެ ބިލް އެޖެންޑާ ކުރުމުންވެސް ބިލް ފާސްވާ ގޮތް ވަނީ ނުވެފައެވެ. ކޮމިޝަންތަކުގެ ބިލް ފާސްނުކޮށް މަޖިލިސް ނިންމާލާފައި ވަނީ، ވޯޓަށް އަހަން ބޭނުންވާ ގާނޫނީ އަދަދަށް މެންބަރުން ހާޒިރުވެވަޑައި ނުގަތުމުންނެވެ. އަންގާރަ ދުވަހުގެ މަޖިލީހުގެ ޖަލްސާއަށް ހާޒިރުވެ، ވޯޓުގައި ބައިވެރިވެވަޑައިގެންނެވީ 36 މެމްބަރުންނެވެ.

"މަޖިލީހުގައި ސަރުކާރު ކޯލިޝަންގެ މެޖޯރިޓީ އޮވެމެ، ރައްޔިތުންނާއި ނުހަނު ގުޅުން ހުރި މިފަދަ ބިލެއް ފާސްވާވަރަށް މެންބަރުން ބައިވެރިވެވަޑައި ނުގަތުމުން، ވަރަށް ހިތާމަކުރައްވާ ކަމަށް ވިދާޅުވި. ހުރިހާ މިނިސްޓަރުންނާއި މިއަދު ބައްދަލުކުރައްވާ ވެސް ވިދާޅުވި މަސައްކަތް ކޮށްދެއްވުމަށް،" ރައީސްގެ ތަރުޖަމާނު ހޫދު ވިދާޅުވިއެވެ.

ބިލްތައް ފާސްކޮށްދިނުމުގައި ވަޒީރުން މަސައްކަތް ކޮށްދިނުމަށް ރައީސް ސާލިހު އެދިވަޑައިގެންފައިވާއިރު، ވަޒީރުންގެ މަޖިލީހުގައި ޖުމްހޫރީ ޕާޓީއަށް ނިސްބަތްވެވަޑައިގަންނަވާ ފަސް ވަޒީރުން ތިއްބަވާއިރު، އެމްއާރުއެމްގެ ހަތަރު ވަޒީރުންނާއި، އަދާލަތު ޕާޓީގެ ތިން ވަޒީރުން ތިއްބަވައެެވެ. އަދި މީގެ އިތުރުން އެމްޑީޕީގެ ހަތް ވަޒީރުން ރައީސް ސާލިހުގެ ކެބިނެޓްގައި ހިމެނިވަޑައިގަންނަވައެވެ.

ރާއްޖެެއެމްވީއަށް މައުލޫމާތު ދެއްވަމުން ރައީސްގެ ތަރުޖަމާނު ހޫދު އިތުރަށް ވިދާޅުވީ، ރައްޔިތުން ބޭނުންވާ މިކަހަލަ މުހިއްމު ކަންތައްތައް ވީހާވެސް އަވަހަށް ނިމުމަކީ ރައީސް ސޯލިހު އެދިވަޑަގަންނަވާ ގޮތް ކަމަށާއި، ތިންވަނަ ފަހަރަށް އެޖެންޑާ ކުރުމުންވެސް ބިލްތައް ފާސްނުވުން ރައީސް ވަރަށް ބޮޑަށް ކަންބޮޑުވުން ފާޅުކުރެއްވިކަމަށެވެ.

ހިޔަނާތާއި ފަސާދައިގެ މައްސަލަތައް ތަހުގީގު ކުރުމަށް އުފައްދާފައިވާ ރިޔާސީ ކޮމިޝަނާއި މަރުތައް ބެލުމަށް އުފައްދާފައިވާ ކޮމިޝަނަށް ބާރު ދިނުމުގެ ބިލު ފާސްކުރުމަށް އެންމެ ފުރަތަމަ އެޖެންޑާކުރީ މިދިޔަ އަހަރުގެ ޑިސެމްބަރު މަހުގެ 15 ވަނަ ދުވަހުއެވެ. އެދުވަހުވެސް މެންބަރުން ހަމަނުވުމުގެ ސަބަބުން ބިލް ފާސްވާގޮތެއް ނުވިއެވެ. އަދި އެއަށްފަހު މަޖިލިސް ދިޔައީ ޗުއްޓީއަށެވެ. އަދި ބިލް ފާސްނުކޮށް މެމްބަރުން ޗުއްޓީއަށް ދިއުމާ ގުޅިގެން، ރައީސް ސޯލިހު އޭރުވެސް ވަރަށް ބޮޑަށް ކަންބޮޑުވުން ފާޅުކުރައްވާ މެންބަރުންގެ އެއްބާރުލެއްވުމަށް އެދިވަޑައިގެންނެވިއެވެ.

ދައުރުން ބޭރުން ޖަލްސާއެއް ބާއްވައިގެން ރިޔާސީ ކޮމިޝަންތަކުގެ ބިލް ފާސްކުރުމަށް ވެސް  މަސައްކަތް ކުރިނަމަވެސް ކާމިޔާބެއް ނުވިއެވެ. އަދި އޭގެ ފަހުން ދެފަހަރުވެސް ބިލަށް ވޯޓަށް އެހުމުން ފާސްވާވަރަށް މެންބަރުން ހަމަވެފައެެއް ނުވެއެވެ.

ރިޔާސީ ކޮމިޝަންތަކަށް ބާރު ދިނުމުގެ ބިލު މަޖިލީހުން ފާސްކުރެވޭނީ މަޖިލީހުގެ 85 މެމްބަރުންގެ ތެރެއިން 43 މެމްބަރުން ވޯޓުގައި ބައިވެރިވެވަޑައިގެންނެވެ. ނަމަވެސް އެ ބިލު ފާސްކުރަން މިހާތަނަށް ވޯޓަށް އެހި ކޮންމެ ފަހަރަކު އެ އަދަދަށް މެމްބަރުން ތަޅުމަށް ހާޒިރުވެ، ވޯޓުގައި ބައިވެރިވެފައެއް ނުވެއެވެ.

ގާނޫނުއަސާސީގެ 87 ވަނަ މާއްދާގައި ބުނެފައި ވަނީ ރައްޔިތުން އެ މައްޗަށް އަމަލު ކުރުން ލާޒިމް ކުރާ އެއްވެސް ކަމެއް ރައްޔިތުންގެ މަޖިލީހުން ފާސްރުމަށްޓަކާ ވޯޓަށް އަހާންވާނީ އެ މަޖިލީހުގެ ޖުމްލަ މެމްބަރުންގެ ދެބައިކުޅައެއްބަޔަށް ވުރެ ގިނަ މެމްބަރުން އެ ވޯޓެއް ނަގާ ޖަލްސާގައި ހާޒިރުވެ ތިބޭ ވަގުތެއްގައިކަމަށެވެ.