ޕާޓީއަށް އެޅޭނެ ފިޔަވަޅެއް ނެތް، މަޖިލީހަށް ކުރިމަތިލާނަން: ޖާބިރު
ކާށިދޫގައި އެއާޕޯޓެއް އަޅަން ވައުދުވި
ރައީސް ސޯލިހް ޖާބިރުއަށް މަގާމުގެ ފަތްކޮޅު އަރުއްވަނީ:- ރައްޔިތުންގެ މަޖިލީހުގެ އިންތިޚާބުގައި ޖާބިރު އަމިއްލަ ގޮތުން ވާދަކުރައްވަން ވަނީ ނިންމަވާފައި
ކުރިއަށް އޮތް ރައްޔިތުންގެ މަޖިލިސް އިންތިހާބަށް ކުރިމަތިލެއްވި ނަމަވެސް ޕާޓީއަށް އެޅޭނެ ފިޔަވަޅެއް ނޯންނާނެ ކަމަށާއި ކާށީދޫ ދާއިރާއަށް އަމިއްލަ ހަސިއްޔަތުން ކުރިމަތިލައްވާނެ ކަމަށް އެމްޑީޕީގެ ރައީސް މުހައްމަދު ނަޝީދުގެ އެޑްވައިޒަރު އަބްދުﷲ ޖާބިރު ވިދާޅުވެއްޖެއެވެ.
ޖާބިރު ރާއްޖެއެމްވީއަށް ވިދާޅުވީ އޭނާ މަޖިލިސް އިންތިހާބުގައި ވާދަކުރެއްވުމަށް ނިންމެވީ ސުޕްރީމް ކޯޓުގެ ނިންމުމެއްގެ މަތިން ކަމަށާއި އެހެން ކަމުން ޕާޓީއަށް އެކަމުގައި އެޅޭނެ ފިޔަވަޅެއް ނޯންނާނެ ކަމަށެވެ. އެހެންވެ ކޮންމެ ފިޔަވަޅެއް އެޅިޔަސް އޭނާއަށް މައްސަލައެއް ނެތް ކަމަށްވެސް ވިދާޅުވިއެވެ.
އަމިއްލަ ގޮތުން މަޖިލީހަށް ވާދަކުރެއްވުމަށް ޕާޓީން ވަކިވެވަޑައިނުގަންނަވާނެ ކަމަށްވެސް މީގެ ކުރިން ކާށީދޫ ދާއިރާގެ މެމްބަރުންކަން ކުރައްވާފައިވާ ޖާބިރު ވިދާޅުވިއެވެ.
ފްރައިމަރީގައި ބޮޑު ތަފާތަކުން ނާކާމިޔާބުވެވަޑައިގެންނެވި ޖާބިރު ވިދާޅުވީ ކާށިދޫ ދާއިރާގެ ރައްޔިތުންގެ ވަރަށް ބޮޑު ތާއީދެއް އޭނާއަށް އެބަ އޮތް ކަމަށެވެ. އެގޮތުން ޖަލު ހުކުމެއް ތަންފީޒު ކުރައްވަމުން ގެންދަވަމުން 18 ވަނަ ރައްޔިތުންގެ މަޖިލީހަށް ކުރިމަތިލައްވައިގެންވެސް ހޮވިވަޑައިނުގެންނެވީ ކުޑަ ތަފާތަކުން ކަމަށް ޖާބިރު ފާހަގަ ކުރެއްވިއެވެ.
ރައީސް އިބްރާހިމް މުހައްމަދު ސޯލިހްގެ ސްޕެޝަލް އެންވޯއީގެ މަގާމުގައިވެސް ހުންނެވި ޖާބިރު ވިދާޅުވީ އޭނާގެ ތަސައްވަރަކީ ގާފަރުގައި ރިސޯޓެއް އަޅައި، ކާށިދޫގައި އެއާޕޯޓެއް އަޅައި ސިޓީއެއްގެ ދަރަޖައިގައި އެ ދާއިރާ ތަރައްގީ ކުރުން ކަމަށެވެ. އަދި ބައެއް އެހެން މަޝްރޫއުތައްވެސް ފެށުމަށް ތައްޔާރުވެފައިވާ ކަމަށްވެސް ޖާބިރު ވިދާޅުވިއެވެ.
ޖާބިރު ވިދާޅުވީ މަޖިލިސް އިންތިހާބުގައި އަމިއްލަ ގޮތުން ވާދަކުރައްވަން ނިންމެވި ނަމަވެސް އެމްޑީޕީގެ އިސް އެއްވެސް ބޭފުޅަކު ކުރިމަތިނުލައްވަން އެދިވަޑައިނުގަންނަވާ ކަމަށެވެ. ނަމަވެސް އެމްޑީޕީގެ ޕްރައިމަރީން ނާކާމިޔާބުވެވަޑައިގެންނެވި އެއްވެސް ބޭފުޅަކު އަމިއްލަ ހަސިއްޔަތުން މަޖިލީހަށް ވާދަ ނުކުރައްވާނެ ކަމަށް އުއްމީދު ކުރައްވާ ކަމަށް އެ ޕާޓީގެ ރައީސް މުހައްމަދު ނަޝީދު ވަނީ ވިދާޅުވެފައެވެ. އަދި އެގޮތައް ކުރިމަތިލައްވާ ކެންޑިޑޭޓުންނާމެދު ފިޔަވަޅު އަޅާނެ ކަމަށްވެސް އެމްޑީޕީން ވަނީ ބުނެފައެވެ.
ޖާބިރު ވިދާޅުވީ ކެންޑިޑަސީ ފޯމް އަންނަ ބުރާސްފަތި ދުވަހު އިލެކްޝަނަށް ހުށައަޅުއްވާނެ ކަމަށެވެ.
