އެމްއެމްއޭގެ ފައިނޭންޝިއަލް އިންޓެލިޖެންސް ޔުނިޓް (އެފްއައިޔޫ)ގެ ކުރީގެ ދެ ވެރިން ރައްޔިތުންގެ މަޖިލީހުގެ މާލިއްޔަތު ކޮމިޓީއަށް ހާޒިރުކުރުން އަންނަ ހަފްތާއަށް ފަސްކޮށްފިއެވެ.

އެފްއައިޔޫގެ ކުރީގެ ވެރިޔާ އާތިފް ޝަކޫރު މާލިއްޔަތު ކޮމެޓީ އަށް ހާޒިރުވާން އަންގާފައި ވަނީ މި ހަފްތާގެ އަންގާރަ ދުވަހުގެ މެންދުރު 2:30 އަށެވެ. އާތިފްގެ ފަހުން އެ މަގާމާއި ހަވާލުވެވަޑައިގެންނެވީ އަބްދުﷲ އަޝްރަފް ކޮމިޓީއަށް ހާޒިރުކުރަން ނިންމާފައި އޮތީ ވެސް ހަމަ އަންގާރަދުވަހުއެވެ.

މާލިއްޔަތު ކޮމިޓީގައި ހިމެނިވަޑައިގަންނަވާ ކުޅުދުއްފުށީ އުތުރު ދާއިރާގެ މެމްބަރު އަބްދުލްޣަފޫރު މޫސާ(ގަބޯ) ވިދާޅުވީ އެފްއައިޔޫގެ ކުރީގެ ދެ ވެރިން މާލިއްޔަތު ކޮމިޓީއަށް ހާޒިރުކުރަން މި ހަފްތާގައި އޮތް ނަމަވެސް، އެކަން އަންނަ ހަފްތާގެ ތާރީޚަކަށް ފަސްކުރެވިފައިވާ ކަމަށެވެ.

އެފްއައިޔޫގެ ދެ ވެރިން  ކޮމިޓީއަށް ހާޒިރުކުރަނީ އެމްއެމްޕީއާރުސީގެ ހިޔާނާތުގެ ތަހްގީގް ރިޕޯޓް އާންމުކުރުމާއި ގުޅިގެން، އެކަމާއި ގުޅޭ ގޮތުން މެމްބަރުން ސާފުކުރަން ބޭނުންފުޅުވާ ކަންތައް ސާފުކުރުމަށް ކަމަށް ޢަފޫރު ވިދާޅުވިއެވެ.

ކޮމިޓީގެ މެމްބަރު ޢަފޫރު ވިދާޅުވީ އެފްއައިޔޫގެ ވެރިން ކޮމިޓީއަށް ހާޒިރުކުރަނީ، އެމްއެމްޕީއާރްސީގެ ހިޔާނާތުގެ މައްސަލަ އެ ޔުނިޓުން ދިރާސާ ކުރުމަށް ފަހު، އެ މައްސަލަ އަންގަންޖެހޭ ފަރާތްތަކަށް އެންގުމުގައި އޭރު އެމްއެމްއޭގެ ގަވަރުނަރުކަން ކުރައްވާފައިވާ ދެ ބޭފުޅުންގެ އެއްވެސް ނުފޫޒެއް މިކަމުގައި އޮތްތޯ ބެލުމަށް ކަމަށެވެ.

އާތިފް އެފްއައިޔޫގެ ވެރިޔަކަށް ހުންނެވީ ގަވަރުނަރަކަށް އަޒީމާ އާދަމް ހުންނެވި ދުވަސްވަރުއެވެ. އެފްއައިޔޫގެ ވެރިޔާގެ މަގާމުން އާތިފް އަމިއްލަފުޅަށް އިސްތިއުފާދެއްވީ 2015 ވަނަ އަހަރުގެ ޖޫން މަހުގެ ތެރޭގައި އެމްއެމްޕީއާރްސީ ހިޔާނާތުގެ ތަހްގީގް އޭސީސީން ފެށުމުގެ ކުރިންނެވެ.

އަޝްރަފް އެފްއައިޔޫގެ ވެރިޔާގެ މަގާމުން ވަކިކުރެއްވީ17 ސެޕްޓެމްބަރ 2018 ވަނަ ދުވަހު، މިހާރުގެ ގަވަރުނަރު އަހްމަދު ނަސީރުއެވެ. އަޝްރަފް މިހާރު ވަޒީފާ އަދާކުރައްވަނީ އެމްއެމްއޭގެ ސްޓްރެޖިކް ޕްލޭނިންގ އެންޑް ޑިވެލޮޕްމަންޓް ޕްރޮޖެކްޓްސް ސެކްޝަނުގައެވެ. ކުރީގެ ރައީސް އަބްދުﷲ ޔާމިންގެ އެކައުންޓަކަށް ގިނަ އަދަދެއްގެ ނަޤުދު ފައިސާ ޖަމާކޮށް އަދި އެފައިސާ ނަގުދު ފައިސާ އިން ނަގާފައިވާކަމުގެ މައުލޫމާތު ރިޕޯރޓް 13 ސެޕްޓެމްބަރު 2018 ދުވަހު، މޯލްޑިވްސް ޕޮލިސް ސާރވިސް އަށް ފޮނުވީ އޭރުގެ އެފްއައިޔޫގެ ވެރިޔާ އަބްދުﷲ އަޝްރަފެވެ.

މާލިއްޔަތު ކޮމިޓީއަށް ހާޒިރުކުރަން ސިޓީ ފޮނުވުމާއި ގުޅިގެން ކުރީގެ އެފްއައިޔޫގެ ވެރިޔާ އާތިފް ޝަކޫރު ވިދާޅުވެފައިވަނީ އެފްއައިޔޫގެ ވެރިޔާގެ ގޮތުގައި ހޭދަކުރެއްވި ހަތް މަސް ދުވަހުގެ ވާހަކަތައް ހިއްސާކުރައްވާނެ ފުރުސަތަކަށް އެދިއެދި ހުންނެވި ކަމަށާއި، ވާހަކަ ދައްކަވާނީ އިހުލާސްތެރިކަމާ އެކުގައި ކަމަށެވެ. 

އާތިފްއަކީ ކުރީގެ ރައީސް އަބްދުﷲ ޔާމީންގެ ސަރުކާރުގައި ރައީސް އޮފީހުގެ ލީގަލް އެފެއާޒް މިނިސްޓަރުގެ މަގާމް ފުރުއްވި އާޒިމާ ޝަކުރޫގެ ބޭބެއެވެ. އެމްއެމްޕީއާރްސީގެ ހިޔާނާތުގެ މައްސަލައިގައި އާޒިމާ ޝަކޫރުގެ މައްޗަށް ދައުލަތުން ވަނީ ދެ ދައުވާއެއް އުފުލާފައެވެ. އެއީ ދައުލަތުގެ އިދާރާއަކަށް ދޮގު ހެކި ދިނުމާއި، މަނީ ލޯންޑަރކުރި ކުރުމަށް އެހީތެރިވެދިން ކަމުގެ ދައުވާއެވެ.