ރާއްޖޭގެ އިންސާނީ ހައްޤުތަކުގެ ޙާލަތު ރަނގަޅުކޮށް، ސަރުކާރަށް އެކަމާއި ގުޅޭ ގޮތުން ލަފާ އެރުވުމަށް ޚާއްސަ މުޝީރަކު އައްޔަން ކުރެއްވުމަށް މަސައްކަތް ކުރަމުންދާކަން ފޮރިން މިނިސްޓްރީއިން ހާމަކޮށްފިއެވެ.

ފޮރިން މިނިސްޓްރީއިން ކޮށްފައިވާ ޓްވީޓެއްގައިވަނީ އދގެ އިންސާނީ ހައްޤުތަކާއި ބެހޭ ހައި ކޮމިޝަނަރ މިޝޭލް ބެޝެލެޓްއާއި، ޚާރިޖީ ވަޒީރު އަބްދުﷲ ޝާހިދު ބައްދަލުކުރެއްވި ކަމަށާއި، ރާއްޖެއިން އިންސާނީ ހައްޤުތަކަށް އިހްތިރާމް ކުރާނެކަމުގެ ފުރިހަމަ ޔަޤީންކަން އެކަމަނާއަށް އެރުވިކަމަށެވެ.

އަދި އިންސާނީ ހައްޤުތަކާއި ބެހޭ ހައި ކޮމިޝަނަރގެ އޮފީހާއި ގުޅިގެން ގިނަ މަސައްކަތްތަކެއް ކުރުމަށް ހަމަޖެހިފައިވާ ކަމަށާއި، އޭގެ ތެރޭގައި އިންސާނީ ހައްޤުތަކާއި ބެހޭ ޚާއްސަ މުޝީރަކު ދިވެހި ސަރުކާރަށް ލަފާ އަރުވަން ފޮނުވުން ހިމެނޭ ކަމަށެވެ.

ރައީސް އިބްރާހިމް މުހައްމަދު ސޯލިޙް ވެރިކަމަށް ވަޑައިގަތުމާއިއެކު އިންސާނީ ހައްޤުތަކާއި ބެހޭ ޕްލެޓްފޯމްތަކުގައި ރާއްޖެއިން އަނެއްކާ ވެސް ވަނީ ވާހަކަ ދައްކަން ފަށާފައެވެ.

އަދި ރައީސް ޔާމީންގެ ސަރުކާރުގައި އިންސާނީ ހައްޤުތަކަށް އަރައިގަންނަމުން އައި އައުން ހުއްޓުމަކަށް ގެނެސް، އައު ސަރުކާރުން އިންސާނީ ހައްޤުތަކަށް ހުރުމަތްތެރިކޮށް ހިތާނެކަމުގެ ޔަޤީންކަން ޚާރިޖީ ވަޒީރު އަބްދުﷲ ޝާހިދު ވަނީ އެކި ޕްލެޓްފޯމްތަކުގައި ދެއްވާފައެވެ.

މިނިސްޓަރ ޝާހިދުއާއި އދގެ އިންސާނީ ހައްޤުތަކާއި ބެހޭ ހައި ކޮމިޝަނަރ މިޝޭލް ބެޝެލެޓް ބައްދަލުކުރައްވާފައި މިވަނީ ސްވިޓްޒަލެންޑްގެ ޖެނީވާގައި މިހާރު ކުރިއަށްދާ އދގެ އިންސާނީ ހައްޤުތަކާއި ބެހޭ ކައުންސިލްގެ 40 ވަނަ ބައްދަލުވުމުގެ ހަވާސާގައެވެ. ހައިކޮމިޝަނަރގެ އިތުރުން އެހެން ބައެއް ޤައުމުތަކުގެ އިސްވެރިންނާއި ޚާރިޖީ ވަޒީރުންނާއި މިނިސްޓަރ ޝާހިދު ވަނީ ބައްދަލުވުމުގެ ހަވާސާގައި ބައްދަލު ކުރައްވާފައެވެ.