ކުރަމަތި ރިސޯޓުގައި ފަތުރުވެރިޔަކު ގެނބިގެން މަރުވެއްޖެ
މަރުވެފައި ވަނީ 60 އަހަރުގެ މީހެއް
ކުރަމަތި އައިލެންޑް ރިސޯޓް
އއ. އަތޮޅުގައި އޮންނަ ކުރަމަތި އައިލެންޑް ރިސޯޓްގައި ފަތުރުވެރިއަކު ގެނބިގެން މަރުވެއްޖެއެވެ.
ފުލުހުންގެ މީޑިއާ އޮފިޝަލް ވިދާޅުވީ، ފަތުރުވެރިޔަކު ގެނބިގެން މަރުވި ކަމުގެ ރިޕޯޓް ލިބިފައި ވަނީ ހޯމަ ދުވަހުގެ ހަވީރު 4:50 އެހާއިރު ކަމަށެވެ. މަރުވެފައި ވަނީ އެ ރިސޯޓުގައި ޗުއްޓީ ހޭދަ ކުރަމުން ދިޔަ 60 އަހަރުގެ ޖަރުމަނު އަންހެނެކެވެ. އޭނާގެ ވަނަވަރެއް ފުލުހުން ހާމައެއް ނުކުރެއެވެ.
މި މަހުގެ 23 ވަނަ ދުވަހު ކ. މާފުށީގައި އުމުރުން 40 އަހަރުގެ ތުރުކީ މީހަކު ވެސް ވަނީ ގެނބިގެން މަރުވެފައެވެ.
މި އަހަރުގެ ތެރޭގައި މިހާތަނަށް 8 ފަތުރުވެރިއަކު ގެނބިގެން މަރުވެފައިވެއެވެ.
ޓޫރިސްޓުން ގެނބިގެން މަރުވާ މައްސަލަ ބޮޑުވެފައި ވާތީ، ޓޫރިސްޓުން މޫދަށް އެރޭ ސަރަހައްދުތަކާއި ރިސޯޓްތައް މޮނީޓާކޮށް ސަލާމަތީ ކަންކަން އިސްލާހު ކުރުމަށް ސިފައިންނާއި ޓޫރިޒަމް މިނިސްޓްރީގެ އިތުރުން ކައުންސިލްތައް ގުޅިގެން ދަނީ މަސައްކަތް ކުރަމުންނެވެ.
