ހުކުރު މިސްކިތުގެ ސްޕީކަރުތައް ވަގަށް ނަގައިފި
ފަޅާ އެރީ ވަގަށް ސްޕީކަރުތައް ގެންދަނިކޮށް
ހުކުރު މިސްކިތުން ވައްކަން ކުރި މައްސަލާފައި ފުލުހުން ހަރަކާތްތެރިވަނީ
މާލޭ ހުކުރު މިސްކިތުގައި ހަރުކޮށްފައި ހުރި ސްޕީކަރުތަކެއް ވަގަށް ނަގައިފިއެވެ.
ފުލުހުންގެ ސްޕޯކްސްޕާސަން ޗީފް އިންސްޕެކްޓަރ އިޒްމިއާ ޒާހިރު "ރާއްޖެއެމްވީ" އަށް ވިދާޅުވީ ހުކުރު މިސްކިތުގެ ސްޕީކަރެއް ވަގަށް ނަގައިގެން ގެންދަނިކޮށް، ފެނިގެން ފުލުހުންނަށް ރިޕޯޓްކޮށްފައިވާ ކަމަށެވެ. އެ މިސްކިތުން ވަގަށް ނަގާފައި ވަނީ ދެ ސްޕީކަރު ކަމަށް އިޒްމިއާ ވިދާޅުވިއެވެ.
ވައްކަމުގެ އެ މައްސަލާގައި މީހަކު އަދި ހައްޔަރެއް ނުކުރެއެވެ.
އެ މައްސަލާގައި ފުލުހުންގެ ފޮރެންސިކް ޓީމަކުން ވަނީ ހުކުރު މިސްކިތަށް ގޮސް، ވަގަށް ގެންދަން މަސައްކަތްކޮށްފައިވާ އެހެން ސްޕީކަރުތަކުގައި ހުރި ފިންގާ ޕްރިންޓް ނަގައި، މައްސަލައިގެ ތަހުގީގު ފަށާފައެވެ.
މިއަހަރުގެ މިހާތަނަށް ވައްކަމުގެ 589 މައްސަލަ ފުލުހުންނަށް ވަނީ ހުށަހަޅާފައެވެ. މިދިޔަ އަހަރު ވެސް އެންމެ ގިނައިން ފުލުހުންނަށް ހުށަހަޅާފައި ވަނީ ވައްކަމުގެ މައްސަލަތެކެވެ. އެގޮތުން މިިދިޔަ އަހަރު ވައްކަމުގެ 3،269 މައްސަލަ ފުލުހުންނަށް ހުށަހަޅާފައިވެއެވެ.
