ޗައިނާއާ އެކު ކުރަމުންދާ މަޝްވަރާތަކުގައި ކުރިއެރުންތައް ލިބެމުން ދިޔުމާ ގުޅިގެން، އެ ގައުމުން އެމެރިކާއަށް އެތެރެކުރާ މުދަލުން އިތުރުކުރަން ނިންމާފައިވާ ޓެރިފް ނެގުން މަޑުޖައްސާލަން އެމެރިކާގެ ރައީސް ޑޮނަލްޑް ޓްރަމްޕް ނިންމަވައިފިއެވެ.

އާދިއްތަ ދުވަހު ކުރެއްވި ޓްވީޓްއެއްގައި ޓްރަމްޕް ވަނީ ޗައިނާގެ ރައީސް ޝީ ޖިންޕިންއާ އެކު ވިޔަފާރީގެ އެއްބަސްވުމެއްގައި ސޮއިކުރުމަށް ބޭނުންވާ ކަމަށް ވެސް ވިދާޅުވެފައެވެ. އަދި ވަރަށް އަވަހަށް ޝީއާ އެކު ފްލޮރިޑާގައި ސަމިޓެއް ބޭއްވުމަށް ރާވަމުންދާ ކަމަށް ވެސް ޓްރަމްޕް ވިދާޅުވިއެވެ.

ޓްރަމްޕް މިކަން އިއުލާން ކުރެއްވީ، ޓެރިފް ނެގުން މަޑުޖައްސާލަން ދެ ގައުމުގެ ދެމެދުގައި 90 ދުވަހުގެ ވަގުތީ އެއްބަސްވުމެއް ސޮއިކުރެވިފައި ވަނިކޮށެވެ. މި އެއްބަސްވުމުގައި ސޮއިކުރީ ޑިސެމްބަރު މަހު އާޖެންޓީނާގައި ބޭއްވީ ޖީ20 ސަމިޓުގެ ތެރެއިންނެވެ.

ހަފުތާ ބަންދުގެ ތެރޭގައި ދެ ގައުމުގެ ދެމެދުގައި ކުރެވުނު މަޝްވަރާތަކަށް ބޮޑެތި ކުރިއެރުންތަކެއް ލިބިފައިވާ އިރު، ޗައިނާގެ ރައީސް ޝީ ވަނީ ދެ ގައުމަށް ވެސް ފައިދާހުރި އެއްބަސްވުމަކަށް އާދެވޭނެ ކަމުގެ އުއްމީދު އާ ވެފައިވާ ކަމަށް ވިދާޅުވެފައެވެ. ޝީގެ ފަރާތުން ޓްރަމްޕައާއި ބައްދަލުކުރެއްވި ވައިސް ޕްރިމިއަރ ލިއު ހޭއެވެ.

އެމެރިކާ އަށް ޗައިނާ އިން އެތެރެކުރާ މުދަލުން ޑިއުޓީ ނަގަން ނިންމީ، އެމެރިކާގެ އިގްތިސާދަށް ޗައިނާ މުދަލުގެ ސަބަބުން ގެއްލުންވާ ކަމަށް ބުނެފައެވެ. އަދި 2018 ވަނަ އަހަރު އެމެރިކާއާއި ޗައިނާގެ ޓްރޭޑް ޑެފިސިޓް ވަނީ 55.5 ބިލިއަން ރުފިޔާއަށް އިތުރުވެފައެވެ.