ސޫދާނުގެ ރައީސް އުމަރު އަލް ބަޝީރު، އެ ޤައުމުގެ ބޮޑުވަޒީރު ކަމަށް މުޙައްމަދު ޠާހިރު އަޔާލާ އައްޔަނު ކުރައްވާފައިވާ ކަމަށް އެޤައުމުގެ ރިޔާސަތުން ހާމަކޮށްފިއެވެ.

ހޮނިހިރު ދުވަހު ބޮޑުވަޒީރު ކަމަށް އައްޔަނު ކުރެވުނު އަޔާލާއަކީ އެ ޤައުމުގެ ގަޒީރާ ސްޓޭޓުގެ ކުރީގެ ގަވަރުނަރެވެ.

އަޔާލާއަކީ ރައީސް ބަޝީރާ ގާތް ގުޅުމެއް އޮންނަ ބޭފުޅެކެވެ. 2020 ވަނަ އަހަރު ސޫދާނުގައި ބާއްވާ ރިޔާސީ އިންތިޚާބުގައި އަޔާލާ ވާދަކުރައްވަން ނިންމަވައިފި ނަމަ އެމަނިކުފާނަށް ތާޢީދުކުރައްވާނެ ކަން ވެސް ރައީސް ބަޝީރު މީގެ ކުރިން ވަނީ ހާމަކުރައްވާފައެވެ.

ބޮޑުވަޒީރުކަމަށް އަޔާލާ އައްޔަނުކުރެއްވިއިރު، ހޮނިހިރު ދުވަހު ރައީސް ބަޝީރު ވަނީ އެ ޤައުމުގެ ނައިބު ރައީސް ކަމަށް އެޤައުމުގެ ޑިފެންސް މިނިސްޓަރު އަވާދު މުޙައްމަދު އަޙުމަދު އިބްނު އައުފް އައްޔަނުކުރައްވާފައެވެ. އަވާދުއަކީ ސޫދާނުގައި ނައިބު ރައީސްކަން ކުރައްވާ ފުރަތަމަ ބޭފުޅާއެވެ. ނައިބު ރައީސްގެ މަޤާމަށް އަވާދު އައްޔަނުކުރައްވާފައި ވަނީ ޑިފެންސް މިނިސްޓަރުގެ މަޤާމު ވެސް ފުރުއްވާ ގޮތަށެވެ.

ރައީސް ބަޝީރު ސޫދާނުގެ ސަރުކާރަށް ބޮޑެތި ބަދަލުތަކެއް ގެންނަވަމުން ގެންދަވާއިރު، ހުކުރު ދުވަހު އެމަނިކުފާނު ވަނީ، އެ ޤައުމުގެ މައި ސަރުކާރާއި ސަރަޙައްދީ ސަރުކާރުތައް އުވާލައްވައި، އެއް އަހަރު ދުވަހުގެ މުއްދަތަށް އެ ޤައުމުގައި ކުއްލި ހާލަތު އިއުލާނު ކުރައްވާފައެވެ.

ކުއްލި ހާލަތު އިއުލާނުކުރައްވައި މައި ސަރުކާރާއި ސަރަޙައްދީ ސަރުކާރުތައް އުވާލެއްވި ނަމަވެސް، ރައީސް ބަޝީރު ވަނީ އެމަނިކުފާނުގެ ކެބިނެޓުގައި ހިމެނިވަޑައިގަންނަވާ ޑިފެންސް މިނިސްޓަރާއި، ފޮރިން މިނިސްޓަރު އަދި ޖަސްޓިސް މިނިސްޓަރުގެ މަޤާމު ދަމަހައްޓަވާފައެވެ.

ސަރުކާރު އުވާލައްވައި، ރައީސް ބަޝީރު ކުއްލި ހާލަތު އިޢުލާނު ކުރެއްވިއިރު، ނިމިގެންދިޔަ އަހަރުގެ ޑިސެމްބަރު މަހުގެ 19 ވަނަ ދުވަހުން ފެށިގެން އެމަނިކުފާނުގެ ސަރުކާރާއި ދެކޮޅަށް ސޫދާނުގައި ދަނީ ވަރުގަދަ މުޒާހަރާތަކެއް ކުރަމުންނެވެ. ހުކުރު ދުވަހު ކުއްލި ހާލަތު އިއުލާނު ކުރުމާއި ހަމައަށްވެސް މުޒާހަރާތައް ކުރިއަށް ގޮސްފައިވާއިރު، ހުކުރު ދުވަހު، ހުކުރު ނަމާދަށް ފަހު ސޫދާނުގެ ވެރިރަށް ޚަރްތޫމްގައި ކުރިއަށްދިޔަ ބޮޑު މުޒާހަރާތައް ރޫލާލާފައި ވަނީ ކަރުނަގޭސް ބޭނުންކޮށްގެންނެވެ.

ޑިސެމްބަރު މަހުން ފެށިގެން މިހާތަނަށް މި މުޒާހަރާތަކުގައި 60 މީހުން މަރުވެފައިވާ ކަމަށް އެކްޓިވިސްޓުން ބުނާއިރު، ސޫދާނު ސަރުކާރުން ބުނެފައި ވަނީ މުޒާހަރާތަކުގައި މަރުވެފައި ވަނީ 31 މީހުން ކަމަށެވެ. މީގެ އިތުރުން ބޮޑެތި ބާރުތަކެއް ދީފައިވާ ނޭޝަނަލް އިންޓެލިޖެންސް އެންޑް ސެކިއުރިޓީ ސަރވިސް (އެންއައިއެސްއެސް) އިން ވަނީ އެތައް ސަތޭކަ މުޒާހިރީންނާއި، އިދިކޮޅު ލީޑަރުންނާއި، އެކްޓިވިސްޓުން އަދި ނޫސްވެރިން ހައްޔަރުކޮށް ޖަލަށް ލާފައެވެ.

ކުއްލި ހާލަތު އިއުލާނު ކުރުމާއިއެކު ސޫދާނުގެ ފުލުހުންނާއި، ސަލާމަތީ ބާރުތަކާއި އަސްކަރިއްޔާއަށް ހިފެހެއްޓުމެއް ނެތް ބާރުތަކެއް ވަނީ ލިބިގެން ގޮސްފައެވެ. އެގޮތުން ވޮރަންޓަކާއި ނުލައި ބޭނުން މީހެއް ނުވަތަ ތަނެއް ބަލައި ފާސްކުރުމާއި، ތަންތަން ރެއިޑް ކުރުމާއި، ސަބަބެއް ބަޔާން ނުކޮށް މީހުން ހައްޔަރުކުރުން ހިމެނެއެވެ. ސަލާމަތީ ބާރުތަކަށް މި ބާރުތައް ލިބިގެން ދިއުމާއިއެކު، ރައީސް ބަޝީރާއި ދެކޮޅަށް ކުރަމުންދާ މުޒާހަރާތަކަށް ވަރަށް ބޮޑަށް ބުރޫ އަރައި، މުޒާހަރާތައް ހުއްޓުމުގެ ފުރުޞަތުވެސް އެބަ އޮތް ކަމަށް މުރާސިލުން ބުނެއެވެ.

ޓީވީ މެދުވެރިކުރައްވާ ދެއްވި ތަގުރީރެއްގައި ކުއްލި ހާލަތު އިއުލާނު ކުރެއްވުމަށް ފަހު، ވޭތުވެދިޔަ މަސްތަކުގައި ރައީސް ބަޝީރުގެ ސަރުކާރަށް ބޮޑު ލޮޅުންތަކެއް ގެނައި މުޒާހަރާތަކަށް އިޝާރާތް ކުރައްވާ އެމަނިކުފާނު ވިދާޅުވީ، ދިރިއުޅުމުގެ ފެންވަރު ރަނގަޅު ކުރުމަށް ރައްޔިތުން އެދޭ އެދުމަކީ އެމަނިކުފާނު ބަލައިގަންނަ އެދުމެއް ކަމަށެވެ. ހުރިހާ ސިޔާސީ ޕާޓީތައް މަޝްވަރާގެ މޭޒަށް ޖަމާވުމަށް އެމަނިކުފާނު ގޮވާލައްވަމުން ގެންދަވާ ގޮވާލެއްވުން ތަކުރާރުކުރައްވާ ރައީސް ބަޝީރު ވިދާޅުވީ އެމަނިކުފާނު ހުންނަވާނީ ސޫދާނުގެ ކުރިމަގު ކަމުގައިވާ ޒުވާނުންނާއިއެކު ކަމަށެވެ.

އަސްކަރީ ބަގާވާތަކުން 1989 ވަނަ އަހަރު ވެރިކަމަށް ވަޑައިގެންނެވުމަށްފަހު، އޭގެ ފަހުންއޮޅުވާލާފައިވާ އިންތިޚާބުތަކަކުން ރައީސްކަމަށް އިންތިޚާބު ވެވަޑައިގެން ހުންނެވި ރައީސް ބަޝީރަކީ ދާރްފޫރްގައި ހިންގި ގަތުލުއާންމުގެ ކުށުގައި ބައިނަލްއަގުވާމީ ޖިނާއީ ކޯޓަށް ހާޒިރު ކުރުމަށް އަމުރުވެސް ނެރެފައިވާ ފަރާތެކެވެ. އެމެރިކާއިން ރައީސް ބަޝީރުގެ ސަރުކާރަކީ ޓެރަރިސްޓް ސަރުކާރެއްގެ ގޮތުގައި ކަނޑައެޅުމާއި ގުޅިގެން އެ ޤައުމަށް ލިބޭ އެތައް އެހީތަކެއް ހުއްޓި ސޫދާނުގެ އިޤުތިޞާދު އަޑިއަޅާލާފައިވާއިރު، އެ ޤައުމުގެ ރައްޔިތުން ދަނީ ފަޤީރު ކަމާއި ބަނޑުހައިހޫނުކަން ތަހައްމަލް ކުރަމުންނެވެ.