ބީއެމްއެލްއިން ވެހިކަލް ލޯނު ތައާރަފްކޮށްފި
24 ފެބުރުއަރީ 2019 | އާދީއްތަ 07:26ގަންނަން ބޭނުންވާ ވެހިކަލްގެ %20 ކަސްޓަމަރު އަމިއްލަ އަށް ޚަރަދު ކުރަންޖެހޭ
މިއަދު ބޭއްވި ނޫސްވެރިންގެ ބައްދަލުވުމުގެ ތެރެއިން
ބީއެމްއެލް އިން އެެއްވެސް ރަހުނަކާއިނުލައި ނެގޭ ވެހިކަލް ލޯނެއް ތައާރަފް ކޮށްފިއެވެ.
އާދިއްތަ ދުވަހުގެ ހެނދުނު ބޭއްވި ނޫސްވެރިންގެ ބައްދަލުވުމެއްގައި ބީއެމްއެލްގެ ރީޓެއިލް ބޭންކިންގެ ސީނިއާ މެނޭޖަރު ބަދުރުއްދީން ހަސަން ވިދާޅުވީ މި ލޯނަކީ ރާއްޖޭގައި އިންސްޓޯލްމަންޓަށް ވެހިކަލް ދޫކުރާ ފަރާތްތަކުން މަހަކު ދައްކަން ޖެހޭ އަދަދުގެ ގޮތުގައި ކަނޑައަޅާފައިވާ އަދަދުތަކަށް ވުރެ އެންމެ ކުޑަ އަދަދު ކަނޑައެޅިފައިވާ ލޯނު ކަމަށާއި މި ލޯނު ފަސް ލައްކަ ރުފިޔާއާ ހަމަޔަށް އެއްވެސް ރަހުނަކާ ނުލާ ނެގޭނެ ކަމަށެެވެ. ބަދުރުއްދީން އިތުރަށް ވިދާޅުވީ އެންމެ ސައިކަލެއް ނަގާނަމަ ރާއްޖޭގެ އެހެނިހެން ތަންތަނުން އެންމެ ގިނައިން ދޭނީ 3 އަހަރުގެ މުހުލަތެއްގެ ތެރޭގައި ފައިސާ އެއްކޮށް ދައްކާ ގޮތަށް ކަމަށާއި ނަމަވެސް ބީއެމްއެލް އިން 5 އަހަރުގެ މުއްދަތެއް ފައިސާ އަނބުރާ ދެއްކުމަށް ދޭ ކަމަށެވެ.
ބީއެމްއެލް ވެހިކަލް ލޯނަށް އެދި ހުށަހަޅާއިރު ގަންނަން ބޭނުންވާ ވެހިކަލްގެ %20 ކަސްޓަމަރު އަމިއްލަ އަށް ޚަރަދު ކުރަންޖެހޭނެއެވެ. އިތުރަށް ދައްކަން ޖެހޭ ފައިސާ ބީއެމްއެލް ލޯނުގެ ގޮތުގައި ލިބޭނެއެވެ.
ބީއެމްއެލްއިން ބުނެފައިވަނީ ވެހިކަލް ގަތުމަށް ލޯނަށް ހުށަހަޅާއިރު ބީއެމްއެލް އާއިއެކު އެގްރީމަންޓް ކުރެވިފައިވާ ޑީލަރއެއްގެ ކޯޓޭޝަނެއް ހުށަހަޅަން ވާނެ ކަމަށާއި ލޯނުގެ ދަށުން ގަނެވޭ ވެހިކަލް ވާން ޖެހޭނީ ރާއްޖެއަށް އިމްޕޯޓް ކުރެވިފައިވާ ވެހިކަލަކަށް ކަމަށެވެ. ބޭންކާއެކު އެއްބަސްވުން ހަދާފައިވާ ވެހިކަލް ޑީލަރސްގެ ލިސްޓުގެ ތެރޭގައި ހިމެނެނީ ލިޓަސް އާއި އެކްސްޕާޓް މޮޓޯ ސާރވިސްގެ އިތުރުން އާރްއައިކޭއައިބީ އޮޓޯމޮޓޯރސްއެވެ.
ބަދުރުއްދީން ވިދާޅުވީ ލޯނުގެ އިންޓްރެސްޓެއްގެ ގޮތުގައި 18 އިންސައްތަ ނަގާ ކަމަށާއި އެމީހެއްގެ ނަމުގައި ބޭންކުގައި އެއް އަހަރު ވަންދެން ފައިސާ ދައުރުވާ އެކައުންޓެއް ހުރިކަމުގައިވާނަމަ ލޯން ނެގޭނެ ކަމަށެވެ. އަދި ލޯން ނަގާއިރު އެއްވެސް ގެރެންޓާއެއް ބޭނުން ނުވާ ކަމަށް ވެސް ބަދުރުއްދީން ވަނީ ވިދާޅުވެފައެވެ.
