ލާމަރުކަޒީ ދުވަސް ކުލަގަދަކޮށް ފާހަގަ ކުރުމަށް ނިއްމައިފި: އެލްޖީއޭ
23 ފެބުރުއަރީ 2019 | ހޮނިހިރު 11:11މިދުވަހު ހިންގުމަށް ހަމަޖެހިފައިވާ ހަރަކާތްތައް ބޮޑަށް އަމާޒުކޮށްފައިވަނީ ދުވަހާއި ގުޅޭ ގިނަ މައުލޫމާތުތަކެއް ފޯރުކޮށްދިނުމަށް
ލޯކަލް ގަވަރމެންޓް އޮތޯރިޓީ ( އެލްޖީއޭ)
މިއަހަރުގެ ލާމަރުކަޒީ ދުވަސް ކުލަގަދަ ގޮތެއްގައި ފާހަގަ ކުރުމަށް ހަމަޖެހިފައިވާ ކަމަށް ލޯކަލް ގަވަރމެންޓް އޮތޯރިޓީ ( އެލްޖީއޭ) އިން ބުނެފިއެވެ.
ރާއްޖެ އެމްވީއާއި ވާހަކަ ދައްކަވަމުން އެލްޖީއޭގެ ފައިނޭންޝަލް އޮފިސަރ އައިޝަތު އަލީ ވިދާޅުވީ އެހެން އަހަރު ތަކާއި ތަފާތުކޮށް މިއަހަރު ލާމަރުކަޒީ ދުވަސް ވަރަށް ކުލަގަދަކޮށް ފާހަގަ ކުރުމަށް ހަމަޖެހިފައިވާ ކަމަށާއި އެދުވަހުގެ މުނާސަބަތުގައި ގެނެސްދޭ ޕްރޮގްރާމްތައް ބޮޑަށް އަމާޒު ކޮށްފައިވަނީ ލާމަރުކަޒީ ނިޒާމާއި ބެހޭގޮތުން ގިނަ މައުލޫމާތުތައް ރައްޔިތުންނަށް ލިބޭނެ ފަދަ ގޮތަކަށް ކަމަށެވެ.
ލާމަރުކަޒީ ދުވަހު ހިންގުމަށް ހަމަޖެހިފައިވާ ހަރަކާތްތަކާއި ގުޅޭގޮތުން ވާހަކަ ދައްކަވަމުން އައިޝާ ވިދާޅުވީ މި ދުވަހާއި ގުޅިގެން ކުޑަކުދިންނާއި އެކުދިންގެ ބެލެނިވެރިންނަށް އަމާޒު ކޮށްގެން އާއިލީ ހަވީރެއް ކުރިއަށް ގެންދިއުމަށް ހަމަޖެހިފައިވާ ކަމަށެވެ.
އެގޮތުން ހަވީރު ޒިޔާރަތް ކުރާ ފަރާތްތަކަށް އާއިލީ ހަވީރުގައި ބެހެއްޓިފައިވާ ސްޓޯލްތަކުން ލާމަރުކަޒީ ނިޒާމާއި ބޭހޭ ގިނަ މައުލޫމާތު ތަކެއް ލިބެން ހުންނާނެ ކަމަށާއި މީގެ އިތުރުން މައުލޫމާތު ސެޝަން ޑެސްކެއް ވެސް ބެހެއްޓިފައި ހުންނާނެ ކަމަށް އައިޝާ ވިދާޅުވިއެވެ.
ލާމަރުކަޒީ ދުވަހަކީ މިމަހުގެ 26 ވަނަ ދުވަސް ކަމަށް ވިޔަސް އާއިލީ ހަވީރު ބޭއްވުމަށް ހަމަޖެހިފައި ވަނީ މިއަދު ހަވީރު 4:00 ގައި ރަސްފަންނު ގައި ކަމަށް އައިޝާ ވިދާޅުވިއެވެ
މީގެ އިތުރުންވެސް މޯލްޑިވްސް ނޭޝަނަލް ޔުނިވާރސިޓީ (އެމްއެންޔޫ) އާއި ގުޅިގެން އާންމު ރައްޔިތުންނަށް އަމާޒު ކޮށްގެން ފޯރަމެއް ބޭއްވުމަށް ހަމަޖެހިފައިވާއިރު އަތޮޅުތަކުގެ ކައުންސިލްތަކުން އެރަށެއްގައި ހުންނަ ސަރުކާރުގެ ވުޒާރާތަކަށް އަމާޒް ކޮށްގެން ލާމަރުކަޒީ ނިޒާމާއި ބެހޭ މައުލޫމާތު ދިނުމަށް ހަމަޖެހިފައިވާ ކަމަށް އޭނާ ވިދާޅުވިއެވެ.
ސްކޫލްތަކުގެ ދަރިވަރުންނަށް ލާމަރުކަޒީ ދުވަހުގެ މައުލޫމާތު ދިނުމަށް ހަމަޖެހިފައިވާއިރު އެލްޖީއޭގެ މުވައްޒަފުންނަށް މިދުވަހާއި ގޫޅޭ މައުލޫމާތު ދިނުމަށް ހަމަޖެހިފައިވާ ކަމަށް ވެސް އައިޝާ ވިދާޅުވިއެވެ. އަދި ތަފާތު އެކި ނަންނަމުގައި ކުއިޒްތައް ކުރިއަށް ގެންދިއުމަށް ހަމަޖެހިފައިވާއިރު ރައްޔިތުންނާއި ކައުންސިލްތައް މި ނިޒާމަށް އަހުލު ވެރި ކުރުމަށްޓަކައި އެލްޖީއޭއިން އަތޮޅުތަކަށް ދަތުރު ތަކެއް ކުރުމަށް ހަމަޖެހިފައިވެއެވެ.
ލާމަރުކަޒީ ދުވަހަކީ ފެބުރުއަރީ މަހުގެ 26 ވަނަ ދުވަހެވެ.
