ފުލުހުން ޕެޕާރ ސްޕްރޭ ޖަހާފައިވަނީ ސުލްހަވެރިކަމާއެކު އަމުރަށް ކިޔަމަންވެ ތިއްބައި: ޕީއެންސީ

ކުރީގެ ރައީސް އަބްދުﷲ ޔާމީން އައިޖީއެމްއެޗަށް ގެނައުމާއެކު އެމަނިކުފާނުގެ ސަޕޯޓަރުން ހޮސްޕިޓަލަށް އެއްވެފައިވާއިރު، ފުލުހުން ޕެޕާރ ސްޕްރޭ ޖަހާފައިވަނީ ސުލްހަވެރިކަމާއެކު އަމުރަށް ކިޔަމަންވެގެން ތިއްބައި ކަމަށް ޕީޕަލްސް ނޭޝަނަލް ކޮންގްރެސް (ޕީއެންސީ) އިން ބުނެފިއެވެ.

ހުކުރު ދުވަހު ޕީއެންސީން ނެރުނު ބަޔާނެއްގައި ބުނެފައިވަނީ ރައީސް ޔާމީނުގެ ސަޕޯޓަރުން ހޮސްޕިޓަލު ތެރޭގައި ހަމަނުޖެހުން ހިންގައި މަސްލަހަތު ނަގާލަން މަސައްކަތް ކޮށްފައި ނުވާނެ ކަމަށާއި، ފުލުހުން ޕެޕާރ ސްޕްރޭ ޖަހާފައިވަނީ އެތަނުގައި ތިބި ފުލުހުން އެންގި ހުރިހާ އެންގުމަކަށް ކިޔަމަންވެ، ސުލްހަވެރިކަމާއެކު ތިއްބައި ކަމަށެވެ. އަދި އެތަނުގެ މަސްލަހަތު ގެއްލޭފަދަ ކަމެއް ހިނގާފައިވާނަމަ ހިނގީ ފުލުހުންގެ ސަބަބުން ކަމަށްވެސް ބަޔާނުގައި ބުނެފައިވެއެވެ.

ޕީއެންސީގެ ބަޔާނުގައި އިތުރަށް ބުނެފައިވަނީ ހޮސްޕިޓަލު ތެރޭގައި ޕެޕާރ ސްޕްރޭ ޖަހާފައިވާއިރު، ފުލުުހުންގެ އެ އަމަލަކީ ފިނޑި އަމަލެއް ކަމަށާއި، އެ އަމަލު ހަރުކަށި އިބާރާތަކުން ކުށްވެރި ކުރާ ކަމަށެވެ. އަދި ރައީސް ޔާމީނުގެ ސަޕޯރޓަރުން ކާރޑިއޮލޮޖީ ސެންޓަރަށް ވަންނަން މަސައްކަތް ކުރި ކަމަށާއި އެގޮތަށް އެކަން ނުކުރުމަށް ނަސޭހަތްތެރިވި ކަމަށްބުނެ ފުލުހުން ދައްކާ ވާހަކައަކީ ކަނޑައެޅިގެން ހަޤީޤަތާ ޚިލާފު ވާހަކައެއް ކަމަށްވެސް ބަޔާނުގައި ބުނެފައިވެއެވެ.

ޕީއެންސީގެ ބަޔާނުގައި އެހެން ބުނެފައިވާއިރު، އެކަމާ ގުޅޭގޮތުން ފުލުހުން ނެރުނު ބަޔާނެއްގައި ބުނީ ރައީސް ޔާމީން އައިޖީއެމްއެޗަށް ޑޮކްޓަރަށް ދެއްކުމަށް ގެނައި ވަގުތު އެމަނިކުފާނަށް ތާއީދު ކުރާ ބަޔަކު ވަދެ، ހޮސްޕިޓަލުގެ ''ކާރޑިއޮލޮޖީ ސެންޓަރ''ގެ ތެރެއަށް ވަންނަން މަސައްކަތް ކުރުމުން ފުލުހުން ތަކުރާރުކޮށް އެސަރަހައްދަށް ގިނަ އަދަދެއްގެ ބަޔަކު އެއްފަހަރާ ނުވަނުމަށް އެންގި ކަމަށާއި، ނަމަވެސް ނުކިޔަމަންތެރިކަން ދައްކާ އަޑުގަދަކޮށް، ގަދަކަމުން ހޮސްޕިޓަލް ތެރެއަށް ވަދެގަތުމަށް އުޅުމުން އެކަން ހުއްޓުވާ ކޮންޓްރޯލް ކުރުމަށް ފުލުހުން ޕެފަރ ސްޕްރޭ ބޭނުން ކުރަންޖެހުނު ކަމަށެވެ.

އަދި ހޮސްޕިޓަލްތަކަކީ އެއްވެ އުޅުމާއި ބެހޭ ގާނޫނުގައިވެސް އެއްވުން މަނާ ތަނެއްކަން ފާހަގަކޮށް އެއްވެސް ފަރާތަކުން ހޮސްޕިޓަލުގެ ތެރޭގައި އެއްވެ އަޑުގަދަކޮށް ހަޅޭލައްވާ ނުހެދުމަށް ފުލުހުން ވަނީ އިލްތިމާސްކޮށްފައެވެ.