ޖިނާއީ އިޖުރާއަތުގެ ޤާނޫނުގެ ދަަށުން އެކުލަވާލަން ނިންމާފައިވާ ޖިނާއީ އިޖުރާއަތުގެ (ފުލުހުންގެ) ޤަވާއިދަށް އާންމުންގެ ހިޔާލު ހޯދަން ހުޅުވާލައިފިއެވެ.
ހުކުރު ދުވަހު އެކްޓިންގ ޕޮލިސް ކޮމިޝަނަރ މުހައްމަދު ހަމީދު ކުރެއްވި ޓްވީޓެއްގައި ވިދާޅުވީ، ޖިނާއީ އިޖުރާއަތުގެ ފުލުހުންގެ ޤަވާއިދަށް އާންމުންގެ ހިޔާލު ހޯދަން ހުޅުވާލާފައިވާ ކަމަށާއި، އެ ޤަވާއިދުގެ ދަށުން ޖިނާއީ މައްސަލަތަކުގައި ފުލުހުން އަމަލުކުރަންޖެހޭ އުސޫލު ބަޔާންވެގެންދާނެ ކަމަށެވެ.
We invite public comments on the Draft Criminal Procedure (Police) Regulation. It governs operational policing system that provides tools, activities and decision making for preventing and detecting crime. Let us know what you think of this regulation. https://t.co/OQ3pUTmiJJ
— Mohamed Hameed (@M_Hameedh) February 22, 2019
އެ ޤަވާއިދަށް ހިޔާލު ފޮނުވާނެ ލިންކް ހަމީދުގެ ޓްވީޓުގައި ވަނީ ހިމަނުއްވާފައެވެ.
ފުލުހުންގެ ޖިނާއީ އިޖުރާއަތުގެ ޤަަވާއިދުގެ ދަށުން ފުލުހުންގެ އިޙުތިސާސް ހިމެނޭ މައްސަލަތަކުގެ ތެރެއިން ޖިނާއީ ކުށްތަކުގެ ތަޙުޤީޤުތައް ކުރިއަށް ގެންދިއުމާއި، ޖިނާއީ މައްސަލަތައް ހުށައެޅުމުގައާއި، ތަންތަނާއި މުދާ ބަލައި ފާސްކުރުމާއި، މުދާ ހިފެހެއްޓުމުގެ އިތުރުން މީހުން ހައްޔަރު ކުރުމާއި، ބަންދުގައި ބެހެއްޓުމުގެ އުސޫލުތަކާއި ޖިނާއީ ކުށްތައް ތަޙުޤީޤު ކުރުމުގައި ފުލުހުން އަމަލުކުރާނެ ގޮތް ބަޔާންވެގެންދާނެއެވެ.
އާންމުންގެ ހިޔާލު ހޯދުމަށް ހުޅުވާލާފައިވާ ޤަވާއިދަކީ ފުލުހުންގެ ޖިނާއީ އިޖުރާއަތުގެ ޤަވާއިދުގެ ދެވަނަ ދެލިކޮޕީ ކަމަށްވާއިރު، އާންމުންގް ހިޔާލު ހޯދުމަށްފަހު އެ ދެލިކޮޕީއަށް ބަދަލުތަކެއް ގެނައުން އެކަށީގެންވާ ކަަމަށް އެ ޤަވާއިދުގައި ބުނެފައިވެއެވެ.
ޖިނާއީ މައްސަލަތަކުގައި ފުލުހުން އަމަލުކުރަންޖެހޭ ގޮތުގެ ތަފްސީލީ ޤަވާއިދެއް އެކުލަވާލުމުގެ މަސައްކަތް ކުރަމުންދާއިރު، ފުލުހަކު ބާރުގެ ބޭނުން ކޮށްފި ކޮންމެ ހާލަތެއްގައި އެކަން ކުރީ އެންމެ އެކަށީގެންވާ ގޮތެއްގައިތޯ ބަލާނެ އުސޫލުތަކެއް ފުލުހުންގެ ތެރޭގައި ގާއިމް ކުރުމުގެ މަސައްކަތް ކުރިއަށްދާ ކަމަށާއި، ޚާއްސަ ކަންތައްތަކެއް އެ އުސޫލުގައި ހިމަނާފައިވާ ކަމަށް ހަމީދު ވިދާޅުވެފައިވެއެވެ.
