ރައްޔިތުންގެ މަޖިލީހުގެ ކުރިއަށް އޮތް ދައުރުގެ މެންބަރުކަމަށް ދިވެހި ރައްޔިތުންގެ ޑިމޮކްރެޓިކް ޕާޓީ، އެމްޑީޕީން ކުރިމަތިލާ ކެނޑިޑޭޓުންގެ މާލީ ބަޔާންތައް ހާމަކުރަން ފަށައިފިއެވެ. 

އެމްޑީޕީގެ ރަސްމީ ވެބްސައިޓުގައި މިހާތަނަށް 50 އަށްވުރެ ގިނަ ކެނޑިޑޭޓުންގެ މާލީ ބަޔާން އާންމުކޮށްފައިވާއިރު، އިންތިހާބުގެ ކުރިން އެމްޑީޕީގެ ހުރިހާ ކެނޑިޑޭޓުންގެ މާލީ ބަޔާން ރައްޔިތުންނަށް ފެންނާނެހެން އާންމުކުރާނެ ކަމަށް އެޕާޓީން ބުނެފައިވެއެވެ. 

އެކަމާ ގުޅޭގޮޮތުން "ރާއްޖެއެމްވީ"އަށް މައުލޫމާތު ދެއްވަމުން އެޕާޓީގެ ޑެޕިއުޓީ ސެކެޓްރީ ޖެނެރަލް އަފްޝަން ލަތީފް ވިދާޅުވީ، ގާތްގަނޑަކަށް ހުރިހާ ކެނޑިޑޭޓުންގެ މާލީ ބަޔާން ޕާޓީއަށް މިހާރު ހުށަހަޅާފައިވާ ކަަމަށާއި، އެމްޑީޕީން މިހާރު ދަނީ މާލީ ބަޔާންތައް ވެބްސައިޓްގައި އާންމު ކުރުމުގެ މަސައްކަތް ކުރަމުން ކަމަށެވެ. އަދި އެމަސައްކަތް ވީހާވެސް އަވަހަކަށް ނިންމައި ހުރިހާ ކެނޑިޑޭޓުންގެ މާލީ ބަޔާން އާންމު ކުރުމުގެ މަސައްކަތް ކުރަމުންދާ ކަމަށް އަފްޝަން ވިދާޅުވިއެވެ. 

ކެނޑިޑޭޓުންގެ މާލީ ބަޔާން ހާމަކުރުމަށް އެދި އެމްޑީޕީން ވަނީ 11 ފެބްރުއަރީ 2019 ގައި ކެންޑިޑޭޓުން މާލީ ބަޔާން ހާމަކުރާނެ ފޯމެޓެއް، ކެންޑިޑޭޓުންނާއި ޙިއްސާކޮށްފައެވެ. އަދި 14 ފެބްރުއަރީ ވީ ބުރާސްފަތި ދުވަހުގެ ރޭގަނޑު 8:00 ގެ ކުރިން މިފޯމެޓަށް މާލީ ބަޔާން ހާމަކުރުމަށް ޕާޓީން އޭރު ވަނީ އެދިފައެވެ. ނަމަވެސް އިންތިޚާބުގައި ވާދަކުރައްވާ އެމްޑީޕީގެ ވަރަށް ގިނަ ކެންޑިޑޭޓުން ކެމްޕެެއިން ދަތުރުތަކުގައި އުޅުމުގެ ސަބަބުން ކެނޑިޑޭޓުންގެ އެދުމުގެ މަތިން މާލީ ބަޔާން ހާމަކުރުމުގެ މުއްދަތު އޭރުވަނީ 21 ފެބްރުއަރީ ވީ ބުރާސްފަތި ދުވަހަށް އިތުރުކޮށްފައެވެ. 

އެމްޑީޕީއަކީ ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި ވާދަކުރާ ޕާޓީތަކުގެ ތެރެއިން، ކެނޑިޑޭޓުންގެ މާލީ ބަޔާންތައް އާންމުކުރުމަށް އެންގި ހަމައެކަނި ޕާޓީއެވެ. އިތުރު ސިޔާސީ ޕާޓީއަކުން އެ ޕާޓީގެ ޓިކެޓުގައި ވާދަކުރާ ކެނޑިޑޭޓުންނަށް މާލީ ބަޔާންތައް އާންމުކުރުމަށް އަންގާފައެއް ނުވެއެވެ. ނަމަވެސް ބައެއް އަމިއްލަ ކެނޑިޑޭޓުން މިހާރުވެސް ވަނީ އެފަރާތްތަކުގެ މާލީ ބަޔާން ހާމަކޮށްފައެވެ.