ފެން ކުންފުނީގެ ޗެއާމަން އަދި އެމްޑީޕީގެ ޗެއާޕާސަންގެ ކުރީގެ ނައިބު (މާލީ) އަހްމަދު މައުސޫމްގެ ހިއްސާ އޮންނަ ދެ ކުންފުންޏަކަށް އެމްއެމްޕީއާރުސީގެ ޑޮލަރު ޖަމާކޮށްފައިވާކަމަށް އެސީސީގެ ތަހުގީގީ ރިޕޯޓުގައި ބުނެފައިވީ ނަމަވެސް ގާނޫނާއި ހިލާފަށް ނުވަތަ ކޮރަޕްޝަންއަށް މަގުފައިވާ ގޮތަށް އެއްވެސް ކަމެއް ކޮށްފައިނުވާނެ ކަމަށް އޭނާ ވިދާޅުވެއްޖެއެވެ.

މިމައްސަލައާ ގުޅިގެން މައުސޫމް ނެރުނު ބަޔާނެއްގައި ބުނީ ރައްޔިތުންގެ ތެރޭގައި އޭނާއާ ދޭތެރޭ ނުބައި ތަސައްވަރެއް އުފެދިދާނެތީ ކަންބޮޑުވާ ކަމަށެވެ. އަދި މިއިން އެއްވެސް ކަމެއްގައި މައުސޫމްގެ ފަރާތުން ގާނޫނާއި ހިލާފަށް ނުވަތަ ކޮރަޕްޝަންއަށް މަގުފައިވާ ގޮތަށް އެއްވެސް ކަމެއް ކޮށްފައިނުވާކަމަށް މިބަޔާނުގައި ވަނީ ބުނެފައެވެ.

އެމްއެމްޕީއާރްސީގެ ހިޔާނާތުގެ ތަހުގީގަށް ފުރިހަމަ އެއްބާރުލުންދޭނެކަން ފާހަގަކޮށް މިބަޔާނުގައި ބުނެފައިވަނީ ކަމާއި ގުޅޭ އިދާރާތަކަށް ފުރިހަމައަށް ޖަވާބުދާރީވެވޭނެ ކަމަށެވެ.

މީގެ އިތުރުން މައުސޫމްގެ ހިއްސާ އޮންނަ އެއްވެސް ކުންފުންޏަކާއިއެކު އެސްއޯއެފުން ކޮށްފައިވާ އެއްވެސް މުއާމަލާތެއްގައި ގާނޫނާއި ހިލާފު ނުވަތަ ކޮރަޕްޝަނަށް މަގުފައިވާ ގޮތަށް އެއްވެސް މުއާމަލާތެއް ކޮށްފައިވޭތޯ ތަހުގީގު ކޮށްދިނުމަށާއި، އަދި ކޮރަޕްޝަނަށް މަގުފައިވާފަދަ އެއްވެސް ކަމެއްގައި އެއްވެސް ދައުރެއް އޮތްތޯ ނުވަތަ ނެތްތޯ ސާފުކޮށްދިނުމަށް ޕޮލިހުގެ އިތުރުން އޭސީސީގައި އެދިފައިވާ ކަމަށެވެ.

ބައެއް ނޫސްތަކުގައި ހަގީގަތާއި ހިލާފަށް ޚަބަރު ފަތުރާފައިވާކަން ފާހަގަކޮށް މިބަޔާނުގައި ބުނީ މައުސޫމްގެ އެމްސީ މޯލްޑިވްސް ޕްރައިވެޓް ލިމިޓެޑްގެ ހިއްސާދާރެއްކަމުގައި ބަޔާންކޮށްފައި ވީނަމަވެސް އެއީ ހަގީގަތާއި ޚިލާފު ވާހަކައެއް ކަމަށާއި، މީގެ 20 އަހަރު ކުރިން އެމްސީ މޯލްޑިވްސް ޕްރައިވެޓް ލިމިޓެޑްގައި އޮތް އެނާގެ ހިއްސާ އެހެން ފަރާތަކަށް ބަދަލުކޮށްފައިވާ ކަމަށެވެ.

"މިހެންކަމުން ނޫސްވެރިކަމުގެ ތެރޭގައި ކަމުގެ ހަގީގަތް ރަނގަޅަށް ހޯދާ އާއްމު ރައްޔިތުންނާއި ހަމައަށް ރަނގަޅު މައުލޫމާތު ފޯރުކޮށްދެއްވުމަށް އަޅުގަނޑު އިލްތިމާސްކުރަމެވެ. އަޅުގަނޑަކީ ވަރަށް ގިނަ ވިޔަފާރިތައް ކުރަމުން އައިސްފައިވާ ފަރާތެއްކަމާއި، އަދި ގިނަ ކުންފުނިތަކެއްގެ ޝެއަރ ހޯލްޑަރެއްގެ ދައުރުކަމާއި ކުންފުނީގެ ހިންގުމުގައި އަމަލީ ގޮތުން އަޅުގަނޑު ބައިވެރި ނުވާކަމުގައިވެސް ފާހަގަކުރަމެވެ." ބަޔާނުގައި ބުނެފައިވެއެވެ.

ސީޖީޓީ މޯލްޑިވްސް ޕްރައިވެޓް ލިމިޓެޑް ކުންފުންޏަށް އަލިއަޅުއްވާލައްވާ މިބަޔާނުގައި ބުނީ އެކުންފުންޏަކީ ގިނަ ޝެއަރ ހޯލްޑަރުންތަކެއް ތިބި ކުންފުންޏެއް ކަމަށާއި، މައުސޫމްގެ ދައުރަކީ ސައިލެންޓް ޝެއަރ ހޯލްޑަރެއްގެ ދައުރުކަމާއި އެކުންފުނިން ދުވަހުން ދުވަހަށް ހިންގާ މުއާމަލާތްތަކުގައި އެނާގެ އެއްވެސް ދައުރެއް ނޯންނާނެ ކަމަށެވެ.

"އެހެނިހެން ވިޔަފާރިތަކެކޭ ވެސް އެއްފަދައިން އަޅުގަނޑުމެން ކުރާ ވިޔަފާރިތަކަކީ ވެސް ޑޮލަރު ގަނެގެން ރާއްޖޭން ބޭރުން މުދާ ގެނެސް ކުރާ ވިޔާފާރިތަކަށް ވީހިނދު ޑޮލަރު ގަތުމުގެ އެއްވެސް މުއާމަލާތެއް އެސް.އޯ.އެފްއާއެކު އަޅުގަނޑުގެ ހިއްސާއެއް އޮންނަ އެއްވެސް ކުންފުންޏަކުން ކޮށްފައިވާނަމަ އެކަމުގައި އާދަޔާ ޚިލާފު އެއްވެސް ކަމެއް ނުވާނެ ކަމާއި، އަދި ގަނެފައިވާ ކޮންމެ ޑޮލަރަކަށް އޭގެ އަގު ފުރިހަމައަށް އަދާކޮށްފައިވާނެ ކަމުގެ ޔަގީންކަން އަރުވަމެވެ." ބަޔާނުގައި ބުނެފައެވެ.

މިބަޔާނުގައި ބުނީ ކަމާގުޅޭ އެންމެހާ ލިޔެކިޔުންތަކުން އެކަން ސާބިތުކޮށްދެވޭނެ ކަމަށާއި، އަދި ކަމާގުޅޭ ތަހުގީގީ އިދާރާތަކަށް މިކަމުގެ މައުލޫމާތު ހިއްސާކޮށް ވީއެންމެ އަވަހަށް ރައްޔިތުންނާއި ހަމައަށް މިކަމުގެ ހަގީގަތް ހާމަކޮށްދިނުމަށް އެދޭ ކަމަށެވެ.

އަދި ދިވެހިރާއްޖޭގެ ޖުމްހޫރިއްޔާ ގާނޫނު އަސާސީގެ 33 ވަނަ މާއްދާގެ ދަށުން ކޮންމެ ދިވެހި ރައްޔިތަކަށް ވެސް ލިބިދީފައިވާ ފަދައިން މައުސޫމުގެ ނަމާއި އަބުރު ރައްކާތެރިވެފައި އޮތުމުގެ ހައްގު ލިބިދީފައިވާ ކަމަށާއި، އޭސީސީގެ މިރިޕޯޓުގެ ސަބަބުން އާއްމު ރައްޔިތުންގެ މެދުގައި ވަރަށް ގިނަ ސުވާލުތަކެއް އުފެދިފައިވާ ދަނޑިވަޅުގައި، ކަމާގުޅޭ އެންމެހާ ހަގީގަތްތައް ހާމަވެގެން ދިޔުމަށް އެދޭ ކަމަށެވެ.