ގައުމީ ސަލާމަތަށް ނުރައްކާ ވާ ކަމަށް ބުނެ ޑިއުޓީ ގަޑީގައި ސްމާރޓް ފޯނު ބޭނުން ނުކުރެވޭ ގޮތަށް ރަޝިޔާގެ ގާނޫނު ހަދާ މަޖިލީހުން ބިލެއް ފާސްކޮށްފިއެވެ.

މިބިލްގައި ބުނާ ގޮތުން ފޮޓޯ ނެގޭ، ވީޑިއޯ ރެކޯޑް ކުރެވޭ އަދި އިންޓަނެޓަށް ވަދެވޭ އެއްވެސް ފޯނެއް ބޭނުންކުރުން މަނާކޮށްފައި ވެއެވެ. އަދި ސިފައިންނާ ބެހޭ ގޮތުން އެއްވެސް އެއްޗެއް ލިޔުން މަނާކޮށްފައިވާ އިރު ނޫސްވެރިންނާ ވާހަކަ ދެއްކުމަކީ ވެސް ކުށެކެވެ.

450 މީހުން ހިމެނޭ ގާނޫނު ހަދާ މަޖިލީހުގެ ތިރިގޭގައި 400 މެންބަރުން ވަނީ މި ބިލް ފާސްކުރުމަށް އަންގާރަ ދުވަހު ވޯޓް ދީފައެވެ. މި ބިލްގެ ސަބަބުން ޓެބްލެޓާއި ލެޕްޓޮޕް އަދި ސޯޝަލް މީޑއާ ބޭނުންކުރެވޭ އެއްވެސް ވަސީލަތެއް ޑިއުޓީ ގަޑީގައި ބޭނުން ނުކުރެވޭނެއެވެ. އެހެންނަމަވެސް އާދައިގެ ފޯނު ކޯލް ކުރެވޭ އަދި އާދައިގެ މެސެޖް ކުރެވޭ ފޯނުތައް ބޭނުން ކުރެވޭނެއެވެ. މި ބިލަށް އަމަލް ކުރަން ޖެހޭނީ ގާނޫނު ހަދާ މަޖިލީހުގެ މަތިގެއިން ފާސްކޮށް އަދި ފެޑެރޭޝަން ކައުންސިލުން ފާސްކުރުމަށް ފަހު ރަޝިޔާގެ ރައީސް ވުލަޑްމިއާ ޕުޓިން ތަސްދީގު ކުރެއްވުމުންނެވެ.

މިކަމާ ގުޅޭ ގޮތުން ރަޝިޔާގެ އޮފިޝަލުން ވިދާޅުވަނީ މި ފިޔަވަޅަކީ އެހެނިހެން ގައުމުތަކުގެ ޖާސޫސީ އިދާރާތަކަށް ރަޝިޔާގެ އަޝްކަރީއްޔާއާ ބޭހޭ މައުލޫމާތު ސިއްރު ކުރުމަށް ކޮންމެހެން ކުރަންޖެހޭ ކަމެކެވެ.

ރަޝިޔާގެ ސިފައިންނަށް 2017 ވަނަ އަހަރުން ފެށިގެން އޮންލައިންކޮށް ސިފައިންނާ ބޭހޭ އެއްވެސް މައުލޫމާތެއް ވިޔަސް އަދި ސެލްފީއެއް ވިއަސް ޝެއާރނުކުރުމަށް އަންގާފައި ވެއެވެ. ރަޝިޔާގެ އިތުރުން އެމެރިކާގައި ވެސް ވަނީ ސަލާމަތީ ސަބަބުތަކަށްޓަކައި ސިފައިންނަށް ސޯޝަލް މީޑިއާ ބޭނުން ކުރުމަށް ހަރުކަށި ފިޔަވަޅުތަކެއް އަޅާފާއެވެ.