މަޚްލޫފު އޭސީސީ އަށް ހާޒިރުކޮށް ބަޔާން ނަގައިފި
20 ފެބުރުއަރީ 2019 | ބުދަ 11:37މި މައްސަަލައިގައި އޭސީސީން ވީހާ ވެސް އަވަހަށް ގޮތެއް ނިންމަވައިދެއްވުމަށް އެދިވަޑައިގެންނެވި
ޔޫތު މިނިސްޓަރ އަހުމަދު މަޚްލޫފް
ގަލޮޅު ދެކުނު ދާއިރާގެ ކުރީގެ މެންބަރު އަދި މިހާރު ޔޫތު މިނިސްޓަރ އަހުމަދު މަޚްލޫފް އެންޓި ކޮރަޕްޝަން ކޮމިޝަނަށް ހާޒިރުކޮށްފިއެވެ.
ބުދަ ދުވަހު މަޚްލޫފް ކުރެއްވި ޓްވީޓެއްގައި ވިދާޅުވީ، އޭސީސީން މިއަދު އޭނާގެ ބަޔާން ނަގާފައިވާ ކަމަށެވެ.
މަޚްލޫފް އޭސީސީއަށް ހާޒިރުކޮށް ބަޔާން ނަގާފައި މިވަނީ އެމްއެމްޕީއާރުސީގެ ފައިސާ ހުރި އެސްއޯއެފްގެ އެކައުންޓުން މަޚްލޫފްގެ އެކައުންޓަށް ފައިސާ ޖަމާކޮށްފައިވާ މައްސަލައެއް ފެންމަތިވުމާ ގުޅިގެންނެވެ. އޭސީސީން އާއްމުކުރި ލިސްޓްގައި މަޚްލޫފްގެ އެކައުންޓަށް 33،000 ޑޮލަރު ޖަމާކޮށްފައިވާކަން އެނގެން އޮވެއެވެ.
އެ ރިޕޯޓްގައި މަޚްލޫފްގެ ނަންފުޅު އޮތުމުން، އެކަމާ ގުޅޭ ގޮތުން ރިޕޯޓް އާއްމުވި ދުވަހު މަޚްލޫފް ވިދާޅުވެފައި ވަނީ އެމްއެމްޕީއާރުސީގެ ވެސް އަދި އެހެން ވެސް ކޮރަޕްޝަންގެ ފައިސާއެއްގައި ޖެހިފައި ނޯންނާނެ ކަމަށެވެ. އަދި މައްސަލަ ބެލުމަށް ފަހު ގޯހެއް އުޅޭ ނަމަ އިސްތިއުފާ ދެއްވާނެ ކަމަށް ވިދާޅުވިއެވެ.
އެކަމާ ގުޅިގެން މަހުލޫފު ނެރުއްވި ބަޔާނެއްގައި ވިދާޅުވެފައި ވަނީ މަހުލޫފު ވިދާޅުވީ އެ މުއާމަލާތަކީ އޭނާގެ އެއްބަނޑު އެއްބަފާ ކޮއްކޮ މެދުވެރިވެގެން ހިންގި "ސައްހަ ކަރަންސީ އެކްސްޗޭންޖްގެ މުއާމާލެތެއް" ކަމަށެވެ. އަދި އެ ފައިސާ އޭނާގެ އެކައުންޓަށް ޖަމާކުރަން ޖެހުނީ، މުއާމަލާތުގައި ހިމެނޭ "ދަ ޖީންސް" ފިހާރައިގެ ޑޮލަރު އެކައުންޓެއް ނެތުމުން ކަމަށް ވެސް މަހުލޫފު ވަނީ ވިދާޅުވެފައެވެ. "ދަ ޖީންސް" ފިހާރައަކީ މަހުލޫފުގެ އާއިލީ ވިޔަފާރީއެއް ކަމަށް ބަޔާނުގައި އޭނާ ވަނީ ވިދާޅުވެފައެވެ. މަހްލޫފް ވަނީ 33000 ޑޮލަރަށްވާ ދިވެހި ފައިސާ (508،860ރ.) އެސްއޯއެފް އަށް ލިބުނު ކަމަށް އެ ކުންފުނީގެ ނަމުގައި ދޫކޮށްފައިވާ ސްލިޕެއް ވެސް ޓްވީޓްކުރައްވާފައެވެ. ނަމަވެސް އެ ޑޮލަރުގެ މުއާމަލާތް އެސްއޯއެފް އިން ކޮށްފައި ވަނީ ބޭންކް ރޭޓް ކަމަށްވާ 15.42ރ. ގެ ރޭޓުން އެއްވެސް ފައިދާއެއް ނެތް ގޮތަށް ކަން އެނގެއެވެ. މިއީ ޑޮލަރު ގަނެ ވިއްކުމުގެ މުއާމަލާތެއް ކަމަށް މިނިސްޓަރު ވިދާޅުވި އިރު އެސްއޯއެފްއަކީ ޑޮލަރު ގަނެ ވިއްކުމުގެ ހުއްދަ އޮތް ބައެއް ވެސް ނޫނެވެ.
މި މައްސަލައާ ގުޅިގެން ރައީސް އިބުރާހިމް މުހަައްމަދު ސާލިހު ވަނީ މަޚްލޫފް މަގާމުގެ މަސްއޫލިއްޔަތުން ސަސްޕެންޑް ކުރަައްވާފައެވެ. އަދި ރައީސް އޮފީހުގެ ތަރުޖަމާނު ބުދަ ދުވަހު ވިދާޅުވީ ސަސްޕެންޑް ކުރި ބޭފުޅުން މަސްއޫލިއްޔަތަށް ނުކުންނަވާނީ މައްސަލަ ތަހުގީގުކޮށް ނިމުމުން ކަމަށެވެ.
ބުދަ ދުވަހު އޭސީސީއަށް ހާޒިރުވެ ބަޔާން ދެއްވުމަށް ފަހު މަޚްލޫފް ވިދާޅުވީ، މި މައްސަަލައިގައި އޭސީސީން ވިހާ ވެސް އަވަހަށް ގޮތެއް ނިންމަވައިދެއްވުމަށް އެދިވަޑައިގަންނަވާ ކަމަށެވެ.
މަޚްލޫފާ އެކު ޕްލޭނިންގ މިނިސްޓްރީގެ ސްޓޭޓް މިނިސްޓަރ އަކްރަމް ކަމާލުއްދީން ވެސް ވަނީ ހަމަ މި މައްސަލައިގައި ސަސްޕެންޑް ކުރައްވަފައެވެ. އޭނާގެ އެކައުންޓަށް ވެސް އެސްއޯއެފުން 30000 ޑޮލަރު ޖަމާކޮށްފައި ވެއެވެ. އަދި ސަރުކާރުގެ ބައެއް އެހެން ކުންފުނިތަކުގެ އިސްވެރިން ވެސް ސަސްޕެންޑްކޮށްފައި ވެއެވެ.
