ޔޫތު ޗެމްޕިއަންޝިޕް : ޓީސީ ސްޕޯރޓްސް ކްލަބް ބަލިކޮށް ޗެމްޕިއަންކަން އީގަލަސް ހޯދައިފި

ޔޫތު ޗެމްޕިއަންޝިޕްގެ ޗެމްޕިއަންކަން ޓީސީ ސްޕޯރޓް ބަލިކޮށް އީގަލްސް ހޯދައިފިއެވެ.

އަންގާރަ ދުވަހުގެ ރޭ ގަލޮޅު ދަނޑުގައި ކުޅުނު ފައިނަލް މެޗު އީގަލްސް ކާމިޔާބުކުރީ ޓީސީ އާއި ވާދަކޮށް އެކެއް ސުމަކުންނެވެ.

ފުޓްބޯލް އެސޯސިއޭޝަން އޮފް މޯލްޑިވްސްއިން އިންތިޒާމު ކޮށްގެން ކުރިެއަށް ގެންދާ ޔޫތު ޗެމްޕިއަންޝިޕް ކްލަބް އީގަލްސް ކާމިޔާބުކުރި މިއީ ހަތަރު ވަނަ ފަހަރެވެ.

ދެ ޓީމުގެ ފަރާތުން ދާދިއެއްވަރެއްގެ ކުޅުމެއް ފެނިގެންދިޔަ މި މެޗުގައި ލަނޑުޖަހާނެ ރަނގަޅު ފުރުސަތުތަކެއް ދެ ޓީމަށްވެސް ލިބި ވަނީ ބޭކާރުވެފައެވެ.

މެޗުގެ ފުރަތަމަ އަދި ހަމައެކަނި ގޯލް ޖަހާ އީގަލަސްއަށް ލީޑްހޯދައި ދިނީ މެޗުގެ މޮޅު ކުޅުންތެރިއަކަށް ހޮވުނު މުހައްމަދު އަޒުމޫނެވެ. މެޗުގެ ފުރަތަަމަ ހާފުގައި އަޒުމޫނު ޖަހައިދިން ގޯލުގެ ފަހުން ވެސް އީގަލްސަށް ވަނީ ލަނޑު ޖަހާނެ ރަނގަޅު ފުރުސަތުތަކެއް ލިބިފައެވެ.

ފައިނަލް މެޗަށްފަހު ވަނީ މުބާރާތް ނިންމުމުގެ ރަސްމިއްޔާތު ބާއްވާފައެވެ. މި ރަސްމިއްޔާތުގައި ވަގުތީގޮތުން ޔޫތު މިނިސްޓްރީ ހިންގުމާއި ހަވާލުވެ ހުންނެވި ޓުއަރިސަމް މިނިސްޓަރ އަލީ ވަހީދް ބައިވެރިވެ ވަޑައިންނެވިއެވެ.

މެޗަށްފަހު ނޫސްވެރިންނާއި ވާހަކަ ދައްކަމުން އީގަލްގެ ކޯޗު އިބްރާހިމް ސައީދު ބުނީ، މުޅި މުބާރާތުގައިވެސް ކުޅުންތެރިންގެ ފަރާތުން ފެނިގެންދިޔައީ ވަރަށް ފުރިހަމަ ކުޅުމެއް ކަމަށެވެ. އަދި އީގަލްސްއަކީ ޒުވާން ކުޅުންތެރިންނަށް ވަރަށް ބޮޑު އިސްކަމެއް ދޭ ޓީމެއް ކަމަށެވެ. އޭނާ އިތުރަށް ބުނީ އީގަލްސް ހޯދި ކާމިޔާބީއަކީ އޭނާއަށް ވަރަށް މުހިންމު ކާމިޔާބީއެއް ކަމަށާއި، އޭނާއަށް ޓީމުން އިތުބާރު ކުރީތީ ޝުކުރުވެރިވާ ކަމަށެވެ.

ފައިނަލް މެޗުގެ މޮޅުކުޅުންތެރިއަކަށް އަޒުމޫން ހޮވުނުއިރު މުޅި މުބާރާތުގެ އެންމެ މޮޅު ކުޅުންތެރިންގެ ތެރޭގަިއވެސް އީގަލްސްގެ ދެ ކުޅުންތެރިއަކު ހިމެނުނެވެ. އީގަލްސްގެ ޖާޒީ ނަމްބަރު ހަތެއް ހަސަން ރާއިފް އަހްމަދު (ހަންނަ) އާއި، ޖާޒީ ނަމްބަރު 27 ޝައިފުއްﷲ އިބްރާހިމްއެވެ. މީގެ އިތުރުންވެސް މުބާރާތުގެ އެންމެ މޮޅު ކުޅުންތެރިންގެ ގޮތުގައި ހޮވުނީ ކްލަބް ގްރީން ސްޓްރީޓުގެ ޖާޒީ ނަމްބަރު 7, އަބްދުއްﷲ ޔަމީންއާއި، އެންމެ މޮޅު ގޯލްކީޕަރަކަށް ހޮވުނު ވިކްޓްރީ ސްޕޯރޓްސް ކްލަބުގެ ޖާޒީ ނަމްބަރު 22, މާހީ އަބްދުއްﷲ އެވެ.

މިއަހަރުގެ ފެއާ ޕްލޭ ޓީމަކަށް ހޮވުނީ ވިކްޓްރީ ސްޕޯރޓްސް ކްލަބެެވެ.