ކުޑަ ކޮޓަރިއެއްގެ ތެރޭގައި ގައިދުވެފައި އެ އޮންނަވި ބޭފުޅަކީ މީގެ ކުރިން އެސްޓީއޯގެ ޗެއާމަނެވެ. އެއީ ޓްރޭޑް މިނިސްޓްރުކަން ގިނަ އަހަރުތަކެއް ވަންދެން ކުރެއްވި ކުރީގެ ވަޒީރެކެވެ. އެއީ ރައްޔިތުންގެ މަޖިލީހުގެ މެމްބަރުކަން އެތައް އަހަރެއް ވަންދެން ކުރެއްވި މެމްބަރެކެވެ. އެއީ ފާއިތުވި ފަސް އަހަރު ރާއްޖޭގެ ރައީސުލް ޖުމްހޫރިއްޔާ ކަމުގެ މަގާމު އަދާކުރެއްވި ކުރީގެ ރައީސެވެ. މިއަދު އެ އޮންނެވީ ކަޅުފައިސާ ދޮވުމުގެ ކުށުގެ ދައުވާއާ ގުޅިގެން ޝަރީއަތް ނިމެންދެން ބަންދުކޮށްފައެވެ. ދިވެހި އަދަބީ ބަހެއްގައި އޮވެއެވެ. "ވަގަކަށް ހާސް ދުވަސް، ވެރިއަކަށް އެއް ދުވަހެވެ".
ރައީސް ޔާމިންގެ މައްޗަށް ވައްކަމާއި ހިޔާނާތުގެ އެތައް ތުހްމަތުތަކެއް ކުރެވުނެވެ. ނަމަވެސް ދުވަހަކު ވެސް އެމަނިކުފާނުގެ މައްޗަށް އެއިން ކަމެއްގެ ތުހްމަތެއްގައި ދައުވާކޮށްލެވޭ ވަރު ވެސް ނުވެއެވެ. އެމަނިކުފާނު ޓްރޭޑް މިނިސްޓަރު ކަމާއި އެސްޓީއޯގެ ޗެއާމަން ކަމާއި ސްޓެލްކޯގެ ޗެއާމަން ކަމުގައި ހުންނެވި ދުވަސްވަރު ދައުލަތުގެ މާލިއްޔަތުން ނާޖާއިޒް ފައިދާ ހޯއްދެވި ކަމަށް އަބަދުވަސް ތުހްމަތުތައް ކުރެވިފައި އެބަ ހުއްޓެވެ. ގައުމީ އެއާލައިން ވުޖޫދުން ފުހެވިގެން ދިއުމުގައި ވެސް ތުހުމަތުގެ އިނގިލި އެމަނިކުފާނަށް އަމާޒުވެއެވެ. މާލިއްޔަތުން ވައްކަން ކުރާ ކަމަށް ޔާމިންގެ މައްޗަށް ކުރާ ތުހްމަތުތަކުން އެމަނިކުފާނު ވަނީ މީގެ ކުރިން ރެކިވަޑައިގެންފައެވެ.
ޔާމީން އެސްޓީއޯގެ ޗެއާމަނަކަށް ހުންނެވިއިރު، ސިންގަޕޫރުގައި ތެލުގެ ވިޔަފާރި ކުރުމަށް އުފެއްދި މޯކަމް ޓްރޭޑިން ޕްރައިވެޓް ލިމިޓެޑު މެދުވެރިކޮށް ސިންގަޕޫރުގައި ވަގަށް ހިންގި ކަމަށް ތުހުމަތު ކުރާ 800 މިލިއަން ޑޮލަރުގެ ތެލުގެ ވިޔަފާރީގެ މައްސަލައިގެ ވާހަކަ މީހުންގެ ހަނދާނުގައި ހުންނާނެއެވެ. އެ މައްސަލަ ބެލުމަށް ކުރީގެ ރައީސް މުހައްމަދު ނަޝީދުގެ ވެރިކަމުގެ ތެރޭގައި މަސައްކަތް ކުރެއްވިއެވެ. ޔާމިންގެ މައްޗަށް ތުހްމަތުކުރާ އެ މައްސަލަ ތަހްގީގު ކުރުމަށް އެމްޑީޕީގެ ވެރިކަމުގައި އިނގިރޭސިވިލާތުގެ ތަހްގީގު އޮޑިޓް ކުންފުންޏެއް ކަމަށްވާ ގްރާންޓް ތޯންޓަންއާ ހަވާލު ކުރުމުން، އެ ތަހުޤީޤް ނިންމައި، ރިޕޯޓް ހަވާލުކުރުމަށް ކައިރިވެފައި އޮއްވާ އެ ވެރިކަން މަގުމަތިން ވައްޓާލިއެވެ. ރައީސް ނަޝީދު ވިދާޅުވި ގޮތުން ނަމަ އެ ތަހްގީގު ރިޕޯޓް ލިބެން ހަމަޖެހިފައި އޮތީ 6 ފެބްރުއަރީ 2012 އެވެ. ނަމަވެސް އެކަން ނުވެ އުޅެނިކޮށް އެމަނިކުފާނުގެ ވެރިކަން ޖެހިގެން އައި ދުވަހު ބަދަލު ވުމަށް ފަހު ވެރިކަމަށް ވަޑައިގެންނެވި ޑރ. މުހައްމަދު ވަހީދު ހަސަން މަނިކު އެކުލަވާލި ސަރުކާރުގައި ބޮޑު ބާރެއް ދިނީ ރައީސް ޔާމިނަށެވެ. އަދި ސިންގަޕޫރުގެ ކޯޓަށް ހުށައެޅެން އޮތް ރައީސް ޔާމިންގެ ތެލުގެ ވަގު ވިޔަފާރީގެ މައްސަލަ ހުއްޓުވާލީ ދިވެހި ސަރުކާރުން 10 މިލިއަން ޑޮލަރު ދިނުމަށް ފަހުއެވެ.
ޔާމިން ހިންގާފައިވާ ކަމަށް ބުނާ 800 މިލިޔަން ޑޮލަރުގެ ތެލުގެ "ވަގު ވިޔަފާރި"ގެ މައްސަލައިގައި ޔާމީން އާއި އިތުރު ނުވަ ފަރާތެއްގެ މައްޗަށް ސިންގަޕޫރުގެ ހައި ކޯޓަށް ހުށަހެޅި މައްސަލަ އަނބުރާ ގެންދިޔަ ލިޔުންތައް ވެސް ވަނީ ލީކްވެފައެވެ.
އޭގެ ފަހުން ރައީސް ޔާމިން ވެރިކަމަށް ވަޑައިގެންނެވި ފަހުން ދައުލަތުގެ މާލިއްޔަތުން ވައްކަން ކުރައްވަމުން ގެންދެވި ކަމަށް އެކި ފަހަރު ތުހްމަތުތައް ކުރެވިފައި އެބަހުއްޓެވެ. ހުދު އެމަނިކުފާނުގެ އަނބިކަނބަލުން ފާތިމަތު އިބްރާހިމް މައްޗަށް ވެސް އެ ތުހްމަތުތައް ކުރެވިފައި އެބަހުއްޓެވެ. ހާއްސަކޮން ސަދަގާތު ފައުންޑޭޝަނުގެ ނަމުގައި ދައުލަތުގެ މާލިއްޔަތު ބޭނުން ކޮށްގެން ހިންގި ހިންގި ކަމަށް ބުނާ ކޮރަޕްޝަންގެ ކަންކަން އަދި ހުރީއެވެ.
ރައީސް ޔާމިން ވެރިކަމުގައި ހުންނަވަނިކޮށް ރާއްޖޭގެ ދިދަ ބޭނުންކޮށްގެން އދ. ގެ ގަވާއިދުތަކާ ޚިލާފަށް އުތުރުކޮރެއާއާ އެކު ތެލުގެ ވަގު ވިޔަފާރި ހިންގި ބޯޓާއި އެބޯޓާ ގުޅިފައިވާ ކުންފުނިތަކާއި ރައީސް ޔާމީނާ ގުޅުން އޮތް ކަމަށް އެމްޑީޕީން އޮތީ ތުހްމަތުކޮށްފައެވެ. އެހެން ނަމަވެސް އެ ތުހްމަތުގައި ވެސް ޔާމިިނަށް ކުރި ލިބުނެވެ. ފުލުހުން ބުނީ އެ މައްސަލައާ ޔާމިންއާ އެއްވެސް ގުޅުމެއް ނެތް ކަމަށެވެ.
ރައީސް ޔާމިންގެ މައްޗަށް ތުހްމަތުކުރެވޭ ވައްކަމުގެ މައްސަލައިގެ ލިސްޓެއް ލިޔަންވެއްޖެ ނަމަ އެހާ ކުރުކޮށް ނިންމައެއް ނުލެވޭނެ އެވެ. އެ ވާހަކަތަކަށް ބާރު ލިބެނީ ފާއިތުވި އަހަރުތަކުގައި ވެސް އެއްވެސް ވިޔަފާރިއެއް ރަސްމީ ސިފައެއްގައި ނެތް ބޭފުޅެއްގެ އެކައުންޓްގައި މިލިއަން ޑޮލަރުތަކާއި ރުފިޔާތައް ހުރުމުންނެވެ. އެ ފައިސާތައް ލިބުނު ގޮތެއް އެމަނިކުފާނަށް ބުނެދެވިފައި ނެތުމެވެ.
އެ ހުރިހާ ތުހްމަތުތަކެއް އެހެން ހުއްޓާ މިއަދު މިއީ ވެރިންނަށް އެއް ދުވަހޭ ބުނާ ދުވަހެވެ. ދިވެހި ރާއްޖެ ފަޅުރަށްތަކާއި ފަޅުތައް ވިއްކައިގެން ދައުލަތަށް ލިބެންޖެހޭ 1.4 ބިލިއަން ރުފިޔާގެ ހިޔާނާތުގައި މައިދައުރެއް އަދާކުރި ކުންފުނިން ޔާމިން އެކައުންޓަށް ޖަމާކުރި އެއް މިލިއަން ޑޮލަރު ދޮވެ ސާފުކުރަން ކުރެއްވި މަސައްކަތުގައި އެމަނިކުފާނު އެ ވަނީ ދަންތުރައެއްގައި ޖެހިފައެވެ. ރައީސް ޔާމިންގެ ކަޅުފައިސާ ދޮވުމުގެ އަމަލެއް ހިންގި ކަމަށް ތުހްމަތު ކުރެވޭ މައްސަލައިގައި ފުލުހުންގެ ތަހްގީގުން އެކަން ސާބިތުވާނެ ކަމަށް ބެލެވޭ ސަބަބުތައް ގިނައެވެ. އެހެންވެ ފުލުހުން އެ މައްސަލަ ތަހްގީގުކުރުމަށް ފަހު ދައުވާކޮށްދޭން ޕްރޮސެކިއުޓާ ޖެނަރަލްގެ އަރިހުން އެދުމުން ޕީޖީ ވަނީ ދައުވާކުރަން ޖެހޭ ކަމަށް ފެނިވަޑައިގެން ދައުވާ އުފުއްލަވާފައިއެވެ. އަދި ނުވިތާކަށް ކްރިމިނަލް ކޯޓުގެ އިސް ގާޒީގެ އަމުރަކަށް ޔާމިން މި ވަގުތު ހުންނެވީ މާފުށީގައި ހައްޔަރުކުރެވިފައެވެ. ޔާމިނަށް ހާސް ދުވަސް ލިބުމަށް ފަހު މިއަދު މި އޮތީ ވެރިންގެ ދުވަހަށް ވެފައެވެ. ރައްޔިތުންގެ ދުވަހަށް ވެފައެވެ. ނަމަވެސް މިއީ އެމަނިކުފާނަށް ތުހުމަތުކުރެވޭ ބިޔަ ބޮޑެތި މައްސަލަތަކުގެ ތެރެއިން ކުޑަކުޑަ މިންވަރެކެވެ.
