އެމްބީއޭ ޗެމްޕިއަންޝިޕްގައި ހޯމަ ދުވަހުގެރޭ ކުޅުނު މެޗުވެސް ތަފާތު ބޮޑު ނަތީޖާއަކުން ޔޫއެން ފްރެންޑްސް ކާމިޔާބު ކޮށްފިއެވެ. 

ބާސްކެޓުގައި ނަން މަޝްހޫރު ގިނަ ކުޅުންތެރިންތަކެއް ހިމެނޭ ޔޫއެން ފްރެންޑް މެޗު ކާމިޔާބު ކުރީ ޓީރެކްސް ސްޕޯރޓްސް އެކަޑަމީއާއި ވާދަކޮށެވެ. 

މި މެޗުގެ ނަތީޖާއަކީ ޔޫއެން ފްރެންޑްސް 70 ޕޮއިންޓް، ޓީރެކްސް 32 ޕޮއިންޓެވެ. 

ސޯޝަލް ސެންޓާ އިންޑޯގައި ކުޅުނު މި މެޗު ފުރަތަމަ ކުއާޓާ ބޮޑު ލީޑަކާއި އެއްކޮށް ފްރެންޑްސް ޓީމް ގެންދިޔައިރު ޓީރެކްސްގެ ފަރާތުން އެންމެ އެކަށީގެންވާ ކުޅުމެއް ނުފެނެއެވެ. މި ކުއާޓާގައި ފްރެންޑްސް ޓީމުން 22 ޕޮއިންޓް ހޯދިއިރު ޓީރެކްސްއަށް ކާމިޔާބު ކުރެވުނީ އަށް ޕޮއިންޓެވެ. 

ދެވަނަ ކުއާޓާ ފެށިގެން ޓީރެކްސްގެ ފަރާތުން ރީތި ކުޅުމެއް ފެނިގެން ދިޔައިރު ލީޑުގައި އޮތް ފްރެންޑްސް ޓީމަށް ރަނގަޅު ހަމަލާތަކެއްދިނެވެ. ނަތީޖާއެއްގެ ގޮތުން ދެވަނަ ކުއާޓާގައި 11 ޕޮއިންޓް ޓީރެކްސްއިން ހޯދިއެވެ. ޔޫއެން ފްރެންޑްސްއަށް ކާމިޔާބު ކުރެވުނީ ނުވަ ޕޮއިންޓެވެ. 

ދެވަނަ ކުއާޓާގައި ލީޑް ފުޅާ ކުރުމަށް ދެ ޓީމަށް ވެސް ރަނގަޅު ފުރުސަތުތަކެއް ލިބި ވަނީ ބޭކާރުވެފައެވެ. ތިންވަނަ ކުއާޓާ ފެށިގެން ޔޫއެން ފްރެންޑްސްގެ ކުޅުން ރަނގަޅުކޮށް ލީޑް އިތުރަށް ފުޅާ ކުރިއެވެ. ނަތީޖާއެއްގެ ގޮތުން އެ ޓީމުން 19 ޕޮއިންޓް ކާމިޔާބު ކުރިއެވެ. ނަމަވެސް ޓީރެކްސްއަށް ހޯދުނީ ހަ ޕޮއިންޓެވެ. 

ފަހު ކުއާޓާގައި ޓީރެކްސްގެ ފަރާތުން މާއެދެވޭ ކުޅުމެއް ނުދެއްކުނެވެ. ނަތީޖާއެއްގެ ގޮތުން ވަގުތުގެ ބޭނުންހިފާ ފްރެންޑްސް ޓީމުން ލީޑް އިތުރަށް ފުޅާކޮށް ފުލު ފުލުގައި ޓީރެކްސް ކޮޅަށް ސްކޯކުރިއެވެ. 

މެޗުގެ ފުރިހަަމަ ވަގުތު ހަމަވިއިރު ނަތީޖާއަކީ ޔޫއެން ފްރެންޑްސް 70، ޓީރެކްސް ސްޕޯރޓްސް އެކަޑަމީ 32 ކެވެ. 

މެޗުގެ މޮޅު ކުޅުންތެރިއަކަށް ހޮވުނީ ޔޫއެން ފްރެންޑްސްގެ ޖާޒީ ނަމްބަރު 10، ފާތިމަތު ރިޝްމާއެވެ. މުބާރާތުގައި ކުޅުނު ފުރަތަމަ މެޗުގެވެސް މޮޅު ކުޅުންތެރިޔާގެ މަގާމު ހޯދީ ރިޝްމާއެވެ.