ރެއާލް ދޫކޮށްލަން މާސެލޯ ވިސްނަނީ

ރެއާލް މެޑްރިޑް ދޫކޮށްލަން ބްރެޒިލްގެ ލެފްޓް ބެކް މާސެލޯ ވިސްނަމުންދާ ކަމަށް ރިޕޯޓްތައް ބުނެފިއެވެ.

ރިޕޯޓްތައް ބުނާގޮތުން މާސެލޯ ވަނީ އޭނާގެ ކުރިމަގާމެދު ގޮތެއް ނިންމުމަށް ރެއާލްގެ މެނޭޖިން ޑިރެކްޓަރ ޖޮސޭ އެންހަލް ސަންޗޭޒްއާ ހޯމަ ދުވަހު ބައްދަލު ކޮށްފައެވެ.

އެ ބައްދަލުވުމުގައި ކްލަބް ދޫކޮށްލަން ވިސްނަމުންދާ ކަމަށް އޭނާ ބުނެފައިވާ ކަމަށް ވެސް ރިޕޯޓްތައް ބުނެއެވެ.

ބައެއް ރިޕޯޓްތައް ބުނާ ގޮތުން މާސެލޯ ރެއާލްގައި ހުރީ ހިތްހަމަނުޖެހިގެންނެވެ. އެގޮތުން އޭނާ ވިސްނަމުން އަންނަނީ މި ސީޒަނަށް ފަހު އެ ކްލަބް ދޫކޮށްލާށެވެ.

ރެއާލް ދޫކޮށްލަން މާސެލޯ ވިސްނަމުންދާ ކަމަށް ރިޕޯޓްތައް ބުނަމުންދާއިރު، އޭނާ ޔުވަންޓަސްއަށް ބަދަލުވާން އުޅޭކަމަށް ވެސް އަޑުތައް ވަނީ ފެތުރިފައެވެ.

ރެއާލްއާއެކު މާސެލޯ ހަދާފައިވާ އެއްބަސްވުން ހަމަވާނީ 2022 ވަނަ އަހަރެވެ. ނަމަވެސް އެއްބަސްވުން ހަމަވަންދެން އޭނާ ކްލަބުގައި މަޑުކުރާނެ ކަމަށް ނުބެލެވެއެވެ.

ރެއާލްއާ 2006 ވަނަ އަހަރު ގުޅުނު މާސެލޯ ވަނީ މިހާތަނަށް އެ ކްލަބަށް ކުޅުނު 476 މެޗުގައި 36 ލަނޑު ކާމިޔާބު ކޮށްފައެވެ. އޭނާ ވަނީ އެ ކްލަބާއެކު ލަލީގާ ހަތަރު ފަހަރު، ކޮޕާޑެލްރޭ ދެފަހަރު، ސްޕެނިޝް ސުޕާ ކަޕް ތިންފަހަރު، ޔުއެފާ ޗެމްޕިއަންސް ލީގު ހަތަރު ފަހަރު، ޔުއެފާ ސުޕާ ކަޕް ތިންފަހަރު އަދި ފީފާ ކްލަބް ވޯލްޑް ކަޕް ހަތަރު ފަހަރު ކާމިޔާބު ކޮށްފައެވެ.

ބްރެޒިލް ގައުމީ ޓީމާއެކު އޮލިމްޕިކް ބްރޯންޒް މެޑަލް އަދި ރިހި މެޑަލްގެ އިތުރުން ފީފާ ކޮންފެޑެރޭޝަންސް ކަޕް ކާމިޔާބުކޮށްފައިވާ މާސެލޯ ވަނީ ގައުމީ ޓީމަށް 58 މެޗު ކުޅެ، ހަ ލަނޑު ކާމިޔާބު ކޮށްފައެވެ.