ނަޝީދު އިންޑިއާއަށް ކުރެއްވި ދަތުރުފުޅު ނިންމަވާލެއްވުމަށް ފަހު މާލެ ވަޑައިގެންފި
ނަޝީދު އިންޑިއާއަށް ކުރެއްވި ދަތުރުފުޅުގައި ބޮޑުވަޒީރު ނަރެންދުރަ މޯދީއާއި ބައްދަލު ކުރެއްވި
ކުރީގެ ރައީސް މުހައްމަދު ނަޝީދު
ކުރީގެ ރައީސް މުހައްމަދު ނަޝީދު މިދިޔަ ބުދަ ދުވަހު އިންޑިއާއަށް ކުރެއްވި ދަތުރުފުޅު ނިއްމަވާލެއްވުމަށް ފަހު ހޮނިހިރު ދުވަހު ހެނދުނު މާލެ ވަޑައިގެންފިއެވެ.
އިންޑިއަން ކައުންސިލް ފޯ ކަލްޗަރަލް ރިލޭޝަންސް އާ ޖަވާހިރު ލާލު ނެހެރޫ ޔުނިވާރސިޓީގެ ދައުވަތަކަށް މިދިޔަ ބުދަ ދުވަހު ނަޝީދު އިންޑިއާށް ކުރެއްވި ދަތުރުފުޅުގައި ހުކުރު ދުވަހު ބޮޑުވަޒީރު ނަރެންދުރަ މޯދީއާއި ބައްދަލު ކުރައްވާ ކުރީގެ ރައީސް އަބްދުﷲ ޔާމީންގެ ވެރިކަމުގައި ނަގާފައިވާ ލޯނުތަކުން ރާއްޖެއަށް ދިމާވެފައިވާ "ޑެޓް-ޓްރެޕް" ނުވަތަ ދަރަނީގެ ދަންތުރައިން ސަލާމަތްވާނެ ގޮތްތަކާއި ބެހޭ ގޮތުން ދެ ބޭފުޅުން ވަނީ މަޝްވަރާ ކުރައްވާފައެވެ.
އަދި މިދިޔަ ބުރާސްފަތި ދުވަހު އިންޑިއާގެ ޚާރިޖީ ވަޒީރު ސުޝްމާ ސުވަރާޖާއި ބައްދަލުކުރުމުގެ އިތުރުން ރައީސް ނަޝީދުވަނީ ޖަވާހިރުލާލު ނެހެރޫ ޔުނިވާރސިޓީގައި ތަގުރީރު ކުރައްވާފައެވެ.
މީގެ އިތރުންވެސް ބުރާސްފަތި ދުވަހު އިންޑިއާގެ ސިފައިންނަށް އަމާޒުކޮށް ކަޝްމީރުގައި ދިން ހަމަލާ ރައީސް ނަޝީދު ވަނީ ހަރުކަށި އިބާރާތުން ކުށްވެރި ކުރައްވާފައެވެ. އަދި މި ދަނޑިވަޅުގައި ރާއްޖެ އޮންނާނީ އެކުވެރި އިންޑިއާ އެކު ކަމަށްވެސް ނަޝީދު ވިދާޅުވެފައެވެ.
