އާންމު ސިއްހަތު ޤާއިމުކުރުމަށްޓަކައި ސާފުތާހިރު ވުން މުހިއްމު: ޚުތުބާ
ބަލިތަކުން ރައްކާތެރި ވުމަށް ގޮވާލާފައިވޭ
ކުނި އެއްކޮށްފައިވާ ސަރަހައްދެއް
އާންމު ސިއްހަތު ޤާއިމުކުރުމަށްޓަކައި އެންމެ އިސްކަމެއް ދޭންޖެހޭ އެއްކަމަކީ ސާފުތާހިރުވުން ކަމަށް މިއަދުގެ ހުކުރު ޚުތުބާގައި ބުނެފިއެވެ.
"އާންމު ސިއްހަތު – އެންމެންގެ މަސްއޫލިއްޔަތު" މި މައުޟޫގެ މައްޗަށް ބިނާކޮށްފައިވާ ޚުތުބާގައިވަނީ ސާފުތާހިރު ނުވުމުގެ ސަބަބުން ކުރިމަތިވާ ސިއްހީ އެކި މައްސަލަތަކާއި ސާފުތާހިރު ވުމަށް އިސްލާމް ދީނުގައި ބާރުއަޅާ މިންވަރުގެ މައްޗަށް އަލިއަޅުވާލާފައެވެ.
ފަހަކަށް އައިސް ޑެންގޫއާއި ޗިކަން ގުންޔާ ފަދަ ބަލިތައް އާންމުވެފައިވާއިރު، އެކަމާ ގުޅޭގޮތުން ޚުތުބާގައި ބުނެފައިވަނީ އެފަދަ ބަލިތަކަކީ ވަރަށް އަވަހަށް ފެތުރޭ ބަލިތަކެއް ކަމަށާއި، ޑޮކްޓަރުންނާއި ސިއްހީ ދާއިރާތަކުން ދެއްވާ އިރުޝާދުތަކަށް ތަބާވާން ޖެހޭނެ ކަމަށެވެ.
" ޑެންގޫއާއި ޗިކަން ގުންޔާ އަދި އޫރު ރޯގާއާއި، ދޫނި ރޯގާ ފަދަ ރޯގާތަކަކީ ވަރަށް ބާރަށް ފެތުރޭ ބަލިތަކެކެވެ. މިހެންވެ ޑޮކްޓަރުންނާއި ސިއްހީ ދާއިރާތަކުން އަޅުގަނޑުމެންނަށް އާންމު ސިއްހީ އިރުޝާދުތަކެއް ވަނީ ދެއްވާފައެވެ. އޭގެ ތެރޭގައި ގިނައިން އަތް ދޮވުމާއި، އާންމު ތަންތަނަށް ކުޅު ނުޖެހުމާއި، ރޯގާ ޖެހިފައިވާ މީހުން ބޭރަށް ނުކުމެ އެއްތަނަކަށް ޖަމާވެ ނޫޅުން ފަދަ ކަންތައްތައް ހިމެނޭ، އެއީ އިސްލާމީ ޝަރުއީ ޤާއިދާ ކަމަށްވާ ގެއްލުން ލިބިގަތުމެއް އަދި ގެއްލުން ދިނުމެއްވެސް ނުވޭ، އޭގެ ދަށުން" ޚުތުބާގައި ބުނެފައިވެއެވެ.
އޭގެ އިތުރުން މިއަދުގެ ޚުތުބާގައި ވަނީ ދުޅަހެއު ސިއްހަތެއްގައި ހުރުމަށްޓަކައި ދިރިއުޅޭ ވެށީގެ ސާފުތާހިރުކަން ޤާއިމު ކުރުމުގެ މުހިއްމުކަމަށްވެސް އަލިއަޅުވާލާފައެވެ.
" ފައިސާއާއި ތަނަވަސްކަމެއް ނެތް ކަމަށް ބުނެ ސާފުތާހިރުކަމާ ދުރަށް ދެވޭކަށްނެތެވެ. އަޅުގަނޑުމެންގެ ތެރެއިން ކޮންމެ މީހަކު އެމީހެއްގެ މަސްއޫލިއްޔަތު މިކަމުގައި އަދާކޮށްފިނަމަ އަޅުގަނޑުމެންގެ ރަށްތައް ރީތި ސާފު ރަށްތަކަކަށް ވާނެއެވެ. އަޅުގަނޑުމެން ފެން ހުސްކުރާ ފުޅިތަކާއި ޖޫސް ހުސްކުރާ ޕެކެޓުތަކާއި ދަޅުތައް މަގުމައްޗަށް އުކައި ނުލާނަމަ މަގުތައް ހަޑިވާނެތޯއެވެ ؟ އަޅުގަނޑުމެން ގޭގޭގެ ކުނި ކޮތަޅުތައް މަގުމައްޗަށް އުކައިނުލާނަމަ މަގުމަތި ގޮނޑުވާނެތޯއެވެ ؟ އަޅުގަނޑުމެން އަރިދަފުސް ފޮޅާ ކަރުދާސް ރުމާތައް މަގުމައްޗަށް އެއްލައި ނުލާނަމަ ރޯގާ ފެތުރޭނެތޯއެވެ ؟ " ޚުތުބާގައި ބުނެފައިވެއެވެ.
ޚުތުބާގައި އިތުރަށް ބުނީ، ސާފުތާހިރުކަމަކީ ތަނަވަސްކަމެއް އޮވެގެން ކުރާ ކަމެއް ނޫން ކަމަށާއި، އެއީ ނިޒާމުގެ މައްސަލައެއްވެސް ނޫން ކަމަށެވެ. އޭގެ ބަދަލުގައި ބަލިތަކުން ރައްކާތެރި ވެވޭނެ ގޮތްތައް ހޯދައި ރައްކާތެރިކަމުގެ ފިޔަވަޅު އެޅުން މުހިއްމު ކަމަށް ޚުތުބާގައި ބުނެފައިވެއެވެ.
