އެމެރިކާގެ އެޓާނީ ޖެނެރަލް ކަމަށް، ވިލިއަމް ބާރ އައްޔަނުކުރަން އެ ގައުމުގެ ސެނެޓުން ބުރާސްފަތި ދުވަހު ނިންމައިފިއެވެ.

ރިޕަބްލިކަން ޕާޓީއިން ކޮންޓްރޯލް ކުރާ ސެނެޓުން ބާރ އެޓާރނީ ޖެނެރަލްކަމަށް އައްޔަނުކުރަން ފެންނަކަމަށް ވަނީ 54 ލިބިފައެވެ. ނުފެންނަ ކަމަށް ވޯޓު ދީފައި ވަނީ 45 މެމްބަރުންނެވެ.

މީގެ ކުރިން 1991ން 1993ށް ޖޯޖް ބުޝްގެ ދައުރުގައި އެ ގައުމުގެ އެޓާރނީ ޖެނެރަލްކަން ކުރެއްވި ބާރއަކީ ޑިމޮކްރެޓުންގެ ވެސް ތައުރީފު ލިބިފައިވާ ކުޅަދާނަ ލޯޔަރެކެވެ. ބާރ ވެގެން ދާނީ ދެ އަހަރުގެ ތެރޭގައި އެމެރިކާގެ އެޓާރނީ ޖެނެރަލްކަމަށް އައްޔަނުކުރެވުނު ތިން ވަނަ ފަރާތެވެ. އެ ގައުމުގެ ރައީސް ޑޮނަލްޑް ޓްރަމްޕް، ކުރީގެ އެޓާރނީ ޖެނެރަލް ޖެފް ސެޝަންސް މަގާމުން ވަކިކުރީ ނޮވެމްބަރު މަހުގެ ތެރޭގައެވެ. މިހާރު އެ މަގާމުގައި އެކްޓިން އެޓާރނީ ޖެނެރަލެއްގެ ހައިސިއްޔަތުން މަސައްކަތް ކުރައްވަނީ މެތިއު ވިޓެކަރއެވެ.

އެޓާރނީ ޖެނެރަލްކަމަށް ބާރ އައްޔަނު ކުރުމާއި ގުޅިގެން، ސްޕެޝަލް ކައުންސިލް ރޮބަޓް މުލާ ކުރައްވަމުން ގެންދަވާ ތަހުގީގަށް ވެގެން ދާނެ ގޮތަކާއި މެދު ވަނީ ސުވާލުއުފެދިފައެވެ. މަގާމަށް އައްޔަނުކުރެއްވުމުގެ ކުރިން ބާރ ވަނީ މުލާރގެ ތަހުގީގަށް ފާޑުކިޔައި 19 ގަނޑުގެ ލީގަލް މެމޯއެއް ލިޔުއްވާފައެވެ. ނަމަވެސް ޓްރަމްޕް "ހަނގާކުރުނަ" ނުދޭނެ ކަމަށާއި މުލާގެ ތަހުގީގަށް ހުރަހެއް އެޅުނަ ނުދޭނެ ކަމަށް ވެސް ބާރ ވަނީ ވިދާޅުވެފައެވެ.

މީގެ އިތުރުން މުލާގެ ހޯދުންތަކުގެ ރިޕޯޓުގައިވާ ކަންކަމުގެ ތެރެއިން، އާންމުންނަށް އެންގެން އޮތް ހުރިހާ މައުލޫމާތެއް ހާމަކުރައްވާނެ ކަމަށް ވެސް ބާރ ވަނީ ވިދާޅުވެފައެވެ. ޑިމޮކްރެޓުން ބާރ އައްޔަނުކުރަން ވޯޓު ނުދިނީ ވެސް އެ ރިޕޯޓު އެއްކޮށް ހާމަކުރުމާއި މެދު އެއްޗެއް ވިދާޅުވެފައި ނުވާތީއެވެ.

މުލާ ތަހުގީގު ކުރައްވަމުން ގެންދަވަނީ މިދިޔަ ރިޔާސީ އިންތިހާބުގެ ތެރޭގައި ޓްރަމްޕުގެ ކެމްޕެއިން ޓީމާއި ރަޝިޔާ ސަރުކާރު ގުޅިގެން، ޓްރަމްޕަށް އިންތިހާބު ކާމިޔާބު ކުރަން މަސައްކަތް ކުރައްވާފައިވާ ކަމުގެ ތުހުމަތުތަކެވެ. މި މައްސަލައާއި ގުޅިގެން ޓްރަމްޕްގެ ލޯޔަރެއް ކަމުގައިވާ މައިކަލް ކޯހެންއަށް ވަނީ ތިން އަހަރުގެ ޖަލު ހުކުމެއް އިއްވާފައެވެ.