ހެޔޮ ވެރިކަމަކަށް ރާއްޖެ އަނބުރާ ގެނައުމަށްޓަކައި ވައްކަމާއި، ކޮރަޕްޝަނާއި، ފަސާދައާއި، ޚިޔާނާތުން ދައުލަތުގެ މުއައްސަސާތައް ސަލާމަތް ކުރުމުގެ މަސައްކަތް ރައީސް އިބްރާހިމް މުހައްމަދު ސޯލިހް ވަނީ ފައްޓަވާފައެވެ. އެގޮތުން ސިޔާސީ މަޤާމުތަކުގައި ތިއްބަވާ ބޭފުޅުންގެ މުދަލާއި މާލީ ބަޔާން، ވަކި އުޞޫލަކުން ހާމަކުރަން ވަނީ ފަށާއެވެ. އަދި ދައުލަތުގެ އެއްވެސް މުއައްސަސާއެއްގެ އެއްވެސް ފަންތިއެއްގައި، ކޮރަޕްޝަނާއި ވައްކަމާއި، ފަސާދައިގެ ކިތަންމެ ކުޑަ މިންވަރެއްވިޔަސް، ތަހައްމަލުނުކުރާނެ ކަމުގެ ޔަޤީންކަން، ހާމަކޮށްދިނުމަށްޓަކައި "ޒީރޯ ޓޮލެރަންސް ޓު ކޮރަޕްޝަން" ގެ ނަމުގައި ކެމްޕެއިނެއް ވަނީ ފަށައިފައެވެ. މި ކެމްޕެއިން ފެށިތާ ދެ ދުވަސް ފަހުން، ބުރާސްފަތި ދުވަހު އޭސީސީން އާންމުކުރި އެމްއެމްޕީއާރުސީގެ ބޮޑު ހިޔާނާތުގެ ރިޕޯޓުން ވަރަށް ގިނަ ކަންތައްތަކެއް ހާމަވެއްޖެއެވެ.  

އެމްއެމްޕީއާރުސީގެ ބޮޑު ހިޔާނާތުގެ ފައިސާ ޖަމާކުރި އެސްއޯއެފުން އިން ފައިސާ ލިބުނު ފަރާތްތަކުގެ ތެރޭގައި އޭރު ގަލޮޅު ދެކުނު ދާއިރާގެ މެމްބަރަކަށް ހުންނެވި އަދި މިހާރު ރައީސް ސޯލިހްގެ ޔޫތު މިނިސްޓަރު އަހްމަދު މަހްލޫފު އާއި ޕްލޭނިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީންގެ ނަން ހިމެނެއެވެ. މަހްލޫފަށް 33،000 އަދި އަކްރަމްގެ އެކައުންޓަށް 30،000 ޑޮލަރު ޖަމާކޮށްފައިވާކަން ވަނީ ހާމަވެފައެވެ. 

އެއީ ޑޮލަރު ބައްލަވައިގަތުމުގެ މުއާމަލާތެއް ކަމަށް، އޭސީސީގެ ރިޕޯޓް ނެރުމާ އެކު މިނިސްޓަރު މަހްލޫފު ނެރުއްވި ބަޔާނެއްގައި ވިދާޅުވެފައިވެއެވެ. ޑޮލަރުގެ ބަދަލުގައި އެސްއޯއެފް އަށް ފައިސާ ދެއްކި ކަމަށް ބުނާ އެ ކުންފުނީގެ ސްލިޕެއް ހާމަކުރައްވާފައި ވެއެވެ. ފައިސާ ދިން ކަމުގެ އިތުރު ހެއްކެއް ނުވަތަ ސްޓޭޓްމަންޓެއް ހާމަކުރައްވާފައެއް ނުވެއެވެ. އަކްރަމް ކަމާލުއްދީން މިހާތަނަށް މިކަމާ ގުޅޭ ގޮތުން ދިފާއުގައި އެއްވެސް އެއްޗެއް ވިދާޅުވެފައެއް ނެތެވެ.

ސަރުކާރުން ޒީރޯ ޓޮލެރެންސް ޓު ކޮރަޕްޝަންގެ ކެމްޕެއިން ސަރުކާރުން ފަށާފައިވާއިރު، އޭސީސީގެ ރިޕޯޓާ ގުޅިގެން މިނިސްޓަރު މަހްލޫފާއި ސްޓޭޓް މިނިސްޓަރު އަކްރަމް ގޭގައި މަޑުކުރެއްވުމަށް ރައީސް ސޯލިހް ވަނީ އަންގަވައިފައެވެ. މަހްލޫފަކީ ރައީސް ސޯލިހްގެ ވަރަށް އަރިސް ބޭފުޅެކެވެ. އަދި ނައިބު ރައީސް ފައިސަލް ނަސީމްގެ އެއްބަނޑު އެއްބަފާ ކޮއްކޯފުޅުގެ ފިރިކަލުންނެވެ. ޕްލޭނިން މިނިސްޓްރީގެ ސްޓޭޓް މިނިސްޓަރަކީ ވެސް ހުދު ރައީސް ސޯލިހްގެ ވަރަށް އަރިސް ބޭފުޅެކެވެ. އެމްޑީޕީގެ ވަރުގަދަ ތަނބެކެވެ. މިފަދަ ވަރުގަދަ ދެ ބޭފުޅަކު ގޭގައި މަޑުކުރެއްވުމަށް އެނގެވުމަކީ ރައީސް ސޯލިހްގެ ހިތްވަރުފުޅު ގަދަކަމުގެ ލާމަސީލު މިސާލެކެވެ.

އޭސީސީގެ ރިޕޯޓްގައި އެމްޑީޕީން މަޖިލީހަށް ވާދަކުރައްވާ ބައެއް ކެންޑިޑޭޓުންގެ ނަން ހިމެނެ އެވެ. އަދި ބައެއް ކެންޑިޑޭޓުންގެ މަސްލަހަތު އޮތް ވިޔަފާރިތައް ވެސް ހިމެނެއެވެ. އެފަދަ ބޭފުޅުން ހިންގާފައިވާ މުއާމަލާތަކީ ކޮރަަޕްޝަންގެ އެއްވެސް މިންވަރެއް ނެތް މުއާމަލާތެއްކަން ޝައްކެތް ނެތް މިންވަރަށް ސާބިތުކޮށް ދެއްވުމަށް، ރައީސް ސޯލިހް ބާރު އަޅުއްވަންޖެހެއެވެ. އެކަން ނުކުރައްވާ ނަމަ، ސަރުކާރުން އެ ފަދަ ތާއިދު ކުރެއްވުމުގެ ބޭނުމެއް ވެސް ނެތެވެ.  

ރައްޔިތުންގެ ފައިސާ ވައްދާފައިވާ، އެސްއޯއެފްއާ އެކު މުއާމަލާތް ހިންގާފައިވާ ކަމަށް އޭސީސީގެ ރިޕޯޓްގައި ފާހަގަކޮށްފައިވާ ފަރާތްތަކުގެ ތެރޭގައި ރައްޔިތުންގެ މަޖިލީހުގެ މެމްބަރުންނާއި މެމްބަރުންގެ ކުންފުނިތަކާއި ކުރީގެ ސަރުކާރުގެތަކުގެ ވެރިންނާއި، މިހާރު މަޖިލީހަށް ވާދަކުރައްވާ ބައެއް ކެންޑިޑޭޓުންގެ ކުންފުނިތައް ހިމެނެ އެވެ. އެފަދަ ފަރާތްތަކުން ބުނާ ގޮތުގައި އެ ބޭފުޅުން ހިންގީ ޑޮލަރު ގަތުމުގެ މުއާމަލާތެކޭ ވިދާޅުވުމަކުން ނުފުދެ އެވެ. އެކަން ޝައްކެތް ނެތް މިންވަރަށް ސާބިތުކޮށްދޭން ޖެހެއެވެ. ތަހްޒީބު ގޮތަކީ މިވަރުގެ ބޮޑު ތުހްމަތެއް ކުރެވުމުން މެމްބަރުން މެމްބަރުކަމުން އިސްތިއުފާ ދެއްވުމެވެ. ވަޒީރުން ވަޒީރުކަމުން އިސްތިއުފާ ދެއްވުމެވެ. ޑޮމޮކްރަރީގެ ރީތި މިސާލުތައް ދައްކާ ގައުމުތަކުގައި ކަން ހިނގަނީ މިއުސޫލުންނެވެ.

މަގާމުތަކުގައި ތިއްބެވި ބޭފުޅުންގެ އިތުރުން އަމިއްލަ ކުންފުނިތައް ޝާމިލްވާ ގޮތަށް އެސްއޯއެފްއާ އެކު ހިންގާފައިވާ މުއާމަލާތްތައް ރަނގަޅަށް ތަހްގީގުކޮށް ފިޔަވަޅު އަޅަންޖެހެއެވެ. އަދި މި މައްސަލަތައް މިހެން ހިންގަމުންދާ ކަމާއި މި މުއާމަލާތްތައް ހިންގާފައިވާކަން އެނގިތިބެ، ފިޔަވަޅު ނާޅައި ތިބި ފަރާތްތަކާ މެދު ވެސް ފިޔަވަޅު އަޅަންޖެހެ އެވެ. ރައީސް ސޯލިހްއެކޭ އެއްފަދައިން، މިކަމަށް ހުރިހާ މުއައްސަސާއަކުން އިސް ނަގަންޖެހެއެވެ. މިހާތަނަށް އޭސީސީން ފަހަތު ފަހަޔަށް ބުރަވެ މި މައްސަލަތައް ބަލައި ހާމަކުރަން އެތައް ދުވަހެއް ހޭދަވުމުގެ ސަބަބުން ގެއްލުންތަކެއް ވަނީ ލިބިފައެވެ.