ވައްކަމެއް ކޮށްފައެއް ނޯންނާނެ، ގޯހެއް އުޅޭ ނަމަ އިސްތިއުފާ ދޭނަން: މަހުލޫފް
14 ފެބުރުއަރީ 2019 | ބުރާސްފަތި 10:34މަހުލޫފު ވިދާޅުވީ އެއީ ޑޮލަރު ގަތުމަށް އެސްއޯއެފްއާ އެކު ކުރި މުއާމަލާތެއްގެ ފައިސާ ކަމަށް
މިނިސްޓަރު އަހުމަދު މަހުލޫފު
ވައްކަމެއް ކޮށްފައި ނޯންނާނެ ކަމަށާއި، އަދި މައްސަލަ ބެލުމަށް ފަހު ގޯހެއް އުޅޭ ނަމަ އިސްތިއުފާ ދެއްވާނެ ކަމަށް މިނިސްޓަރ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓް އަހްމަދު މަހުލޫފު ވިދާޅުވެއްޖެއެވެ.
އޭސީސީއިން ބުރާސްފަތި ދުވަހު ނެރުނު އެމްއެމްޕީއާރްސީގެ ރިޕޯޓުގައި އެސްއޯއެފްގެ އެކައުންޓުން މަހުލޫފްގެ އެކައުންޓަށް 33000 ޑޮލަރު ޖަމާކޮށްފައިވާ މައްސަލައަށް ރައްދު ދެއްވުން މަހުލޫފު ނެރުއްވި ބަޔާނެއްގައި ވިދާޅުވީ އެއީ އޭނާ ޑޮލަރު ގަތުމަށް އެސްއޯއެފްއާ އެކުކުރި މުއާމަލާތެއްގެ ފައިސާ ކަމަށެވެ. މަހުލޫފް ކުރެއްވި ޓްވީޓްއެއްގައި އޭނާ ވަނީ މައްސަލައާއި ގުޅިގެން އޭސީސީން ފޮނުވި ސިޓީ އާއި އެ ސިޓީއަށް ދެއްވި ޖަވާބު ވެސް ހިމަނުއްވާފައެވެ.
ޓްވީޓާ އެކު ނެރުނު ބަޔާނެއްގައި މަހުލޫފު ވިދާޅުވީ އެ މުއާމަލާތަކީ އޭނާގެ އެއްބަނޑު އެއްބަފާ ކޮއްކޮ މެދުވެރިވެގެން ހިންގި "ސައްހަ ކަރަންސީ އެކްސްޗޭންޖްގެ މުއާމާލެތެއް" ކަމަށެވެ. އަދި އެ ފައިސާ އޭނާގެ އެކައުންޓަށް ޖަމާކުރަން ޖެހުނީ، މުއާމަލާތުގައި ހިމެނޭ "ދަ ޖީންސް" ފިހާރައިގެ ޑޮލަރު އެކައުންޓެއް ނެތުމުން ކަމަށް ވެސް މަހުލޫފު ވަނީ ވިދާޅުވެފައެވެ. "ދަ ޖީންސް" ފިހާރައަކީ މަހުލޫފުގެ އާއިލީ ވިޔަފާރީއެއް ކަމަށް ބަޔާނުގައި އޭނާ ވަނީ ވިދާޅުވެފައެވެ.
މަހްލޫފް ވަނީ 33،000 ޑޮލަރަށްވާ ދިވެހި ފައިސާ (508،860ރ.) އެސްއޯއެފް އަށް ލިބުނު ކަމަށް އެ ކުންފުނީގެ ނަމުގައި ދޫކޮށްފައިވާ ސްލިޕެއް ވެސް ޓްވީޓްކުރައްވާފައެވެ. ނަމަވެސް އެ ޑޮލަރުގެ މުއާމަލާތް އެސްއޯއެފް އިން ކޮށްފައި ވަނީ ބޭންކް ރޭޓް ކަމަށްވާ 15.42ރ. ގެ ރޭޓުން އެއްވެސް ފައިދާއެއް ނެތް ގޮތަށް ކަން އެނގެއެވެ. މިއީ ޑޮލަރު ގަނެ ވިއްކުމުގެ މުއާމަލާތެއް ކަމަށް މިނިސްޓަރު ވިދާޅުވި އިރު އެސްއޯއެފްއަކީ ޑޮލަރު ގަނެ ވިއްކުމުގެ ހުއްދަ އޮތް ބައެއް ނޫންކަން ރާއްޖެއެމްވީ އަށް ވަނީ އެނގިފައެވެ.
އޭސީސީން ނެރުނު ރިޕޯޓްގައިވާ ގޮތުން އެމްއެމްޕީއާރުސީން 57 ރަށަކާއި ފަޅެއް ދޫކޮށްފައި ލިބުނު ފައިސާގެ ތެރެއިން އެކުއިޒިޝަން ކޮސްޓްގެ ގޮތުގައި 77.5 މިލިއަން ޑޮލަރު ލިބެން ޖެހޭ އިރު އެމްއެމްޕީއާރުސީގެ އެކައުންޓަށް ޖަމާކޮށްފައި ވަނީ އެންމެ 12.5 މިލިއަން ޑޮލަރު (192.75 މިލިއަން ރުފިޔާ) އެވެ. ހިޔާނާތްވީ ފައިސާގެ ތެރެއިން ބޮޑު ބައެއް ޖަމާކޮށްފައި ވަނީ އެސްއޯއެފްގެ އެކައުންޓަށެވެ. އަދި އެސްއޯއެފް އިން ވަނީ އެ ފައިސާތައް އެކި މީހުންގެ އެކައުންޓްތަކަށް ޖަމާކޮށްފައެވެ.
