ކިންގ ސަލްމާން މިސްކިތަށާއި މާވެޔޮ މިސްކިތަށް ނައިބު ރައީސް ޒިޔާރަތްކުރައްވައިފި
ދެ މިސްކިތުގެ މަސައްކަތްތައް ކުރިޔަށް ގެންދިޔުމުގައި ދިމާވާ ގޮންޖެހުންތަކުގެ މަޢުލޫމާތު އެމަނިކުފާނު ވަނީ އޮޅުންފިލުއްވައިފައި
ކިންގ ސަލްމާން މިސްކިތަށް ނައިބު ރައީސް ޒިޔާރަތްކުރެއްވުން
ރައީސުލްޖުމްހޫރިއްޔާގެ ނައިބު ފައިސަލް ނަސީމް، ކިންގ ސަލްމާން މިސްކިތަށާއި މާވެޔޮ މިސްކިތަށް ޒިޔާރަތްކުރައްވައި، އެ ދެ ތަނުގެ ހާލަތު ބައްލަވާލައްވައިފިއެވެ.
އެމަނިކުފާނުގެ މި ޒިޔާރަތުގައި އެ މިސްކިތްތަކުގެ މަސައްކަތްތައް ކުރިޔަށްދާ މިންވަރު ބައްލަވައިލައްވައި، އެ ދެ މިސްކިތުގެ މަސައްކަތްތައް ކުރިޔަށް ގެންދިޔުމުގައި ދިމާވާ ގޮންޖެހުންތަކުގެ މަޢުލޫމާތު ވަނީ އޮޅުންފިލުއްވާފައެވެ.
ކިންގް ސަލްމާން މިސްކިތް ޑިޒައިން ކުރަމުންދަނީ އިސްލާމީ ވަޙުދަތު ދައްކުވައިދޭ ބިނާއެއްގެ ގޮތަށެވެ. މި މިސްކިތުގައި ނަމާދުކުރުމަށް ޚާއްޞަ ބައިގައި އެއް ފަހަރާ 6000 މީހުންނަށް ނަމާދުކުރެވޭނެ ކަމަށާއި، އަދި ބޮޑެތި ޖަމާޢަތްތަކުގައި މިސްކިތުގެ އެހެން ބައިތައް ހިމެނޭ ގޮތުން އެއްފަހާރާ ދިހަހާސް މީހުންނަށް ނަމާދު ކުރެވޭނެ ކަމަށް ހައުސިންގ މިނިސްޓްރީން ވަނީ ބުނެފައެވެ. ކިންގް ސަލްމާން މިސްކިތް ފަރުމާކުރަނީ ކުތުބުޚާނާއަކާއި، ޤުރުއާނާ ބެހޭ މަރުކަޒަކާއި، މަލްޓި ޕަރޕަސް ހޯލަކާއި، ޖަލްސާކުރާ މާލަމަކާއި، އޮޑިޓޯރިއަމަކާއި ޕާކިންގް އޭރިއާއެއްވެސް ހިމެނޭ ގޮތަށެވެ.
ކާނިވާ ސަރަޙައްދާ އިންވެގެން އާރޓިފިޝަލް ބީޗް ސަރަޙައްދުގައި ބިނާކުރާ މި މިސްކިތަކީ ސަޢޫދީ ސަރުކާރުގެ ހިލޭ އެހީގެ ދަށުން ބިނާކުރާ މިސްކިތެކެވެ.
ކުރީގެ ސަރުކާރުން މާވެޔޮ މިސްކިތް 2017 ވަނަ އަހަރު ނިންމާލެވޭނެ ކަމަށް ބުނި ނަމަވެސް އެ މިސްކިތުގެ މަސައްކަތް ވަނީ އަދި ނުނިމިއެވެ.
