އެލްޗަޕޯގެ މައްޗަށްކުރި ޑްރަގް ޓްރެފިކް ކުރުމުގެ ދައުވާ ސާބިތުވެއްޖެ

މެކްސިކޯގެ ޑްރަގް ވިޔަފާރީގެ މައި ތަނބެއްކަމަށްވާ ވޯކިންގ ގުޒްމަން "އެލް ޗަޕޯ"ގެ މައްޗަށް ޑްރަގް ޓްރެފިކް ކުރިކަމަށް ބުނެ ކުރި 10 ދައުވާ ސާބިތުވާކަމަށް ނިއުޔޯކްގެ ފެޑެރަލް ކޯޓުން ނިންމައިފިއެވެ.

އުމުރުން 61 އަހަރުގެ ގުޒްމަންއަށް އަދި އަދަބު ކަނޑައަޅާފައި ނުވާއިރު ހުކުމާއެކު އުމުރު ދުވަހުގެ ޖަލުހުކުމެއް އަންނާނެކަމަށް ބެލެވެއެވެ.

ޕްރޮސިކިއުޓަރުން ތުހުމަތުކުރި ގޮތުގައި ސައިނަލޯއާ ޑްރަގް ކާޓެލްގެ ވެރިޔާ ގުޒްމަންއަކީ އެމެރިކާއަށް އެންމެ ގިނައިން މަސްތުވާތަކެތި ސަޕްލައިކުރާ ފަރާތެވެ.

ގުޒްމަން އަތުލައިގެންފައިވަނީ މެކްސިކޯގެ ސަލާމަތީކަަންކަން ވަރުގަދަ ޖަލަކުން ޓަނަލެއްގެ ތެރެއިން ފިލައިގެން ދިޔަތާ ފަސް މަސް ފަހުން 2016 ވަނަ އަހަރުގެ ޖެނުއަރީ މަހުއެވެ.

އެގާރަ ހަފްތާގެ ޝަރީއަތްތަކަކަށްފަހު އަންގާރަ ދުވަހު އޭނާގެ މައްޗަށް ހުކުމް އިއްވާފައިވަނީ ހުރިހާ ފަނޑިޔާރުންގެ އިއްތިފާގުންނެވެ.