ރ. ހުޅުދުއްފާރަށް ދިމާވެފައިވާ ކަރަންޓުގެ މައްސަލަ ހައްލަކުރުމަށްޓަކައި 400 ކިލޯވޯޓްގެ ޖެނަރޭޓަރެއް ފޮނުވާފައިވާ ކަމަށް ފެނަކަ ކޯޕަރޭޝަނުން ބުނެފިއެވެ.

އެ ކޯޕަރޭޝަންގެ ފަރާތުން އާދިއްތަ ދުވަހު ނެރުނު ބަޔާނެއްގައި ބުނެފައިވަނީ ފެނަކަ ކޯޕަރޭޝަނުން ހުޅުދުއްފާރަށް ކަރަންޓު ދެމުންގެން ދިޔަ ތިން ޖެންސެޓްގެ ތެރެއިން 250 ކިލޯވޯޓްގެ ޖެންސެޓަށް ދިމާވި މައްސަލައަކާ ގުޅިގެން މެދުނުކެނޑި ކަރަންޓް ފޯރުކޮށްދިނުމުގައި ދިމާވެފައިވާ މައްސަލަ ހައްލުކުރުމަށްޓަކައި 400 ކިލޯވޯޓްގެ ޖަނަރޭޓަރެއް އެ ރަށަށް ފޮނުވާފައިވާ ކަމަށެވެ.

ޖެނެރޭޓަރު އިންސްޓޯލް ކުރުމުގެ މަސައްކަތް ފަށާފައިވާއިރު މަސައްކަތް ރޭވިފައިވާ ގޮތަށް ކުރިއަށްދާނަމަ ކުރިއަށް އޮތް 24 ގަޑިއިރުގެ ތެރޭގައި މަސައްކަތް ނިންމާ އެ ޖެނަރޭޓަރުން ކަރަންޓު ދެވޭނެ ކަމަށް ވެސް ފެނަކައިން ބުނިއެވެ.