މަޖިލިސް އިންތިހާބުގެ ރަޖިސްޓްރީއަށް ޝަކުވާ ހުށަހެޅުމަށް އިތުރު 7 ގަޑިއިރު
ވަގުތު އިތުރުކޮށްފައިވަނީ ވީހާވެސް ގިނަ ފަރާތްތަކުން ވޯޓުލުމުގައި ބައިވެރިކުރުވުމަށް
އިލެކްޝަންސް ކޮމިޝަން
މިއަހަރު އޭޕްރީލް 6 ބައްވާ މަޖިލިސް އިންތިހާބުގައި ވޯޓު ދިނުމުގެ ހައްގު ލިބިފައިވާ މީހުންގެ ރަޖިސްޓަރީއާ ގުޅޭގޮތުން ޝަކުވާ ހުށަހެޅުމުގެ ފުރުސަތު ހޮނިހިރު ދުވަހުގެ ރޭ 10:00 އާ ހަމައަށް އިތުރުކޮށްފިއެވެ.
މިދިޔަ ޖެނުއަރީ މަހުހެ 30 ގައި ގައުމީ ކޮމްޕްލެއިންސް ބިއުރޯއެއް އުފައްދައި ޝަކުވާ ހުށައެޅޭނެ އިންތިޒާމް އިލެކްޝަންސް ކޮމިޝަނުން ވަނީ ޤާއިމްކޮށްފައެވެ. އެގޮތުން ވޯޓު ދިނުމުގެ ހައްގު ލިބިފައިވާ މީހުންގެ ރަޖިސްޓަރީއަށް ޝަކުވާ ހުށަހެޅުމުގެ އެންމެ ފަހު ވަގުތަކަށް ހަމަޖައްސަވާފައިވަނީ ހޮނިހިރު ދުވަހުގެ މެންދުރު 3:00 ޖެހުމާއި ހަމައަށެވެ.
މައުލޫމާތު ލިބިފައިވާ ގޮތުގައި ޝަކުވާ ހުށަހެޅުމުގެ ވަގުތު އިތުރުކޮށްފައިވަނީ ޝަކުވާ ހުށަހަޅަން ބޭނުންވާ ފަރާތްތައް ތިބިކަން ފާހަގަކުރެވޭތީ އެ ފުރުސަތުދީ ވީހާވެސް ގިނަ ފަރާތްތަކުން ވޯޓުލުމުގައި ބައިވެރި ކުރުވުމަށެވެ. ޝަކުވާ ހުށަހެޅުމަށް ހަމަޖެހިފައިވަނީ އިލެކްޝަންސް ކޮމިޝަންގެ އިތުރުން ރަށު ކައުންސިލް އޮފީހުންނާއި ސިޓީތަކުގެ އޮފީހުންނެވެ.
ރައްޔިތުންގެ މަޖިލީހުގެ އިންތިހާބުގައި ވާދަކުރުމަށް ފުރުސަތު ހުޅުވާލަފައިވާއިރު އިލެކްޝަންސް ކޮމިޝަނަށް ކެންޑިޑޭޓުންގެ ފޯރމްތައް ހުށަހަޅައިފައިވަނީ ހަމައެކަނި އެމްޑީޕީންނެވެ.
