ދައުލަތުގެ މުއައްސަސާތަށް ހަރުދަނާ ކުރީމަ، ފެބްރުއަރީ ހަތެއް ތަކުރާރެއް ނުވާނެ: ޝިފާޒު

ފެބްރުއަރީ ހަތްވަނަ ދުވަހެއް ދެވަނަ ފަހަރަށް ތަކުރާރު ނުވެ ފަރު ޖެހޭނީ، ދައުލަތުގެ މުއައްސަސާތަށް މިހާރަށް ވުރެ ހަރުދަނާ ކޮށްގެން ކަމަށް ރައީސް އޮފީހުގެ މިނިސްޓަރު މުހައްމަދު ޝިފާޒް ވިދާޅުވެއްޖެއެވެ.

ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަ ދައްކަވަމުން ފެބްރުއަރީ ހަތްވަނަ ދުވަހަށް އިޝާރާތް ކުރައްވާ ޝިފާޒު ވިދާޅުވީ މާޒީގައި ވެފައި ހުރި ކަންކަން ދޫކޮށްލައި މިއަދު އެކުގައި މަސައްކަތް ކުރަނީ ގައުމު އިސްލާހު ކުރުމުގެ ނިޔަތުގައި ކަމަށެވެ. އަދި ކޯލިޝަންއެއްގެ ގޮތުގައި ކުރަން އެއްބަސްވެފައި ހުރި ކަންކަން އެބަ ހުރި ކަމަށާއި، ކަންބޮޑުވާން ޖެހޭ ވަރު އެއްވެސް ކަމެއް ނެތް ކަމަށް އޭނާ ވިދާޅުވިއެވެ.

"މި މަސައްކަތުގެ އަޅުގަނޑުމެން އެންމެން މި ތިބީ އެކީގައި، އެއްމެން އެކީގައި ތިބެގެން އަޅުގަނޑުމެންނަށް އިންސްޓިޓިއުޝަންތައް ވަރުގަދަކުރެވި، ޑިމޮކްރެޓިކް ނިޒާމް ހަރުދަނާ ކުރެވުނީމަ ދެން އެފަދަ ކަމެއް ހިނގުމުގެ ޖާގަ ހަނިވެގެން ދާނެ" ޝިފާޒު ވިދާޅުވިއެވެ.

އެމްޑީޕީގެ ފިކުރަކީ އަބަދުވެސް ރައްޔިތުން ބޭނުންވާ ހައްގު މިންވަރު ހޯދައި ދިނުން ކަމަށާއި، އިރާދަކުރެއްވިއްޔާމުން އެ މިންވަރު ރައްޔިތުންނަށް ހޯދައި ދެވޭނެކަމުގެ ޔަގީންކަން އެބައޮތް ކަމަށް ވެސް ޝިފާޒު ވިދާޅުވިއެވެ.

ރައީސް ސޯލިހު ކުރައްވާ މަސައްކަތްތަކަށް ތައުރީފުކުރައްވަމުން ޝީފާޒު ވަނީ ރާއްޖެ އޮތް ހާލަތު އެއްމެނަށް ވެސް އިނގޭނެ ކަމަށް ވިދާޅުވެފައެވެ. އަދި ރާއްޖެ ހަމަ މަގަށް އަޅުވަން ކުރަންޖެހޭ މަސައްކަތުގެ ޒިންމާ ބޮޑުކަމަށާއި، ރައީސް ސޯލިހުއަކީ އެކަން ކަން ކުރެއްވޭނެ ވަރުގެ ގާބިލު ބޭފުޅެއް ކަމުގެ ޔަގީންކަން އެބައޮތް ކަމަށް ވެސް އޭނާ ވިދާޅުވިއެވެ.

މީގެއިތުރުން ރައީސް ސޯލިހުގެ ދައުރުގައި ޝަރުއީ ދާއިރާއަށް އިތުބާރު ގާއިމް ކުރައްވާނެ ކަމުގެ ޔާގިން ކަން އެބަ އޮތް ކަމަށް ވެސް ޝިފާޒު ވިދާޅުވިއެވެ.

ސަތޭކަ ދުވަހުގެ ޕްރޮގްރާމްއާ ގުޅޭގޮތުން ވާހަކަދައްކަވަމުން ޝިފާޒު ވަނީ އެއް މަސް ދުވަހުގެ ޕްރޮގްރާމްގެ ތެރެއިން ހަ ކަމެއް ނޫނިއްޔާ ހުރިހާ ކަމެއް ކޮށް ނިމިފައިވާ ކަމަށް ވިދާޅުވިއެވެ. އަދި ރައްޔިތުން ވާނުވާ ނޭނގި ތިބެން ނުޖެހޭނެ ކަމަށާއި، މި ސަރުކާރަކީ ސުވާލުކުރީމާ ޖަވާބު ލިބޭނެ ސަރުކާރެއް ކަމަށް އޭނާ ވިދާޅުވިއެވެ.

"ރައްޔިތުން ބޭނުންވާ ކަންކަމުގައި އެއްވެސް ފޮރުވުމެއް ނެތި ހާމަކޮށްދެވޭނޭ. އެއީ ކޮރަޕްޝަން ހުއްޓުވަން ވެސް އޮތް މަގަކީ. ހެޔޮ ވެރިކަމަކަށް ވެސް އޮތް އެއްމެ ބޮޑު އެއް ދޮރަކީ ވެސް ހާމަކަން" ޝިފާޒު ވިދާޅުވިއެވެ.

މީގެ އިތުރުން މަރާލެވިފައިވާ މީހުންނާއި ގެއްލުވާލާފައިވާ މީހުންގެ ކޮމިޝަނަށް ގާނޫނެއް ބޭނުންވަނީ އެއްވެސް ސުވާލެއް ނުއުފެއްދޭ ގޮތަށް އިންސާފު ކަށަވަރުކޮށްދޭން ކަމަށް ޝިފާޒު ވިދާޅުވިއެވެ.

އާންމުންގެ ތެރޭގައި ކުރީގެ ރައީސް ޔާމިންގެ މައްސަލަ ދައުވާކުރަން ޕީޖީ އޮފީހަށް ފޮނުވި އިރު، އެ މަނިކުފާނު ހައްޔަރު ނުކުރަނީ ކީއްވެގެންތޯ ކުރާ ސުވާލުތަކަށް ޖަވާބު ދެއްވަމުން ޝިފާޒު ވިދާޅުވި ހައްޔަރު ނުކޮށް ވެސް ތަހުގީގު ކުރެވޭނެ ކަމަށެވެ. ނަމަވެސް ހައްޔަރު ކުރަން ޖެހިއްޖެ ހާލަތެއްގައި ހައްޔަރު ވެސް ކުރެވޭނެ ކަމަށް ޝިފާޒު ވިދާޅުވިއެވެ. އެހެން ނަމަވެސް ހަމަ ހުރެފައި ގޮސް ހައްޔަރު ކުރުން ބަލައެއް ނުގަނެވޭނެ ކަމަށް އޭނާ ވިދާޅުވިއެވެ.