މަޝްހޫރު ތާރީހީ އިލްމުވެރިޔާ "ނަދުވީ" މުހައްމަދު ވަހީދު ފަތްތޫރަައަށް ލިޔުއްވާފައިވާ މަޒުމޫނުތައް ހިމަނައިގެން ދިވެހި ބަހުގެ އެކެޑަމީން އެކުލަވާލި އަދަބީ ފާޑުކިޔުން ފޮތް ނެރެފިއެވެ.
މަރުހޫމް ނަދުވީގެ ހަނދާނުގައި އަންގާރަ ދުވަހު ގައުމީ ދާރުލް އާސާރުގައި ބޭއްވި ތައުބީނުގެ ޖަލްސާއެއްގައި، މި ފޮތް ރަސްމީކޮށް ނެރެދެއްވީ މިނިސްޓަރ އޮފް އާޓްސް، ކަލްޗަރ އެންޑް ހެރިޓޭޖް ޔުމްނާ މައުމޫން އަދި ދިވެހި ބަހުގެ އެކެޑެމީގެ ރައީސް އަޝްރަފް އަލީއެވެ.
ނަދުވީގެ ހަނދާނުގައި ބޭއްވި ހަފުލާގައި ވާހަކަފުޅު ދައްކަވަމުން މިނިސްޓްރީ އޮފް އާޓްސް، ކަލްޗަރ އެންޑް ހެރިޓޭޖްގެ ސްޓޭޓް މިނިސްޓަރު މުހައްމަދު ތޯރިގު ވިދާޅުވީ ދިވެހި އަދަބިއްޔާތުގެ ދާއިރާއަށް އަދަބީ ފާޑުކިޔުން ތައާރަފްކުރެއްވީ ނަދުވީ ކަމަށެވެ. އަދި ދިވެހި އަދަބިއްޔާތަށާއި ތާރީހު ދިރާސާކުރުމަށް ނަދުވީ ކޮށްދެއްވި ހިދުމަތްތަކާއި ތައާރަފްކޮށްދެއްވި ކަންކަމުގެ އަގު ވަޒަން ކުރަން ދަތިވާނެ ކަމަށް ވެސް ތޯރިގު ވިދާޅުވިއެވެ. އަދި ނަދުވީ ފަދަ އަދަބިއްޔާތަށް ހިދުމަތްކޮށްދޭ ފަރާތްތަށް މަދުކަން ފާހަގަކޮށް، ތޯރިގު ވަނީ މި ދާއިރާ ދިރުވާ އާލާކުރަން މިހާރަށް ވުރެ ބޮޑު އިސްކަމެއް ދޭންޖެހޭ ކަމަށް ވިދާޅުވެފައެވެ.
އަޅުގަނޑު ހަމަގައިމުވެސް މިރޭ ދެރަވޭ. މި ރާއްޖެއަށް މުހައްމަދު ވަހީދު ނަދުވީ ކަހަލަ ބޭފުޅުން މަދުކަން. އަޅުގަނޑު ގަބޫލުކުރާ ގޮތުގައި އެބަ ޖެހޭ މި ދާއިރާއިން އެ ބޭފުޅާގެ ދަރިވަރުންގެ ތެރެއިން މި ފަދަ ދަރިންތަކެއް އުފެދެން. އެ މަގަށް އަޅުގަނޑުމެންގެ ކަންކަން ބައްޓަން ކުރަން އެބަ ޖެހޭ. ދިވެހި ބަހުގެ އެކެޑެމީއާއި ކަމާއިގުޅޭ މިނިސްޓްރީއާއި ދިވެހި ސަރުކާރުގެ ތެރެއިން މި ދާއިރާއަށް މިހާރަށް ވުރެ ބޮޑު އިސްކަމެއް ދޭންޖެހޭ" ތޯރިގު ވިދާޅުވިއެވެ.
މި ރަސްމިއްޔާތުގައި މަރުހޫމްގެ ދެ ދަރިކަލުންގެ އިތުރުން، ކުރީގެ ބަހުގެ އެކެޑެމީގެ ރައީސް އައްބާސް އިބްރާހިމް އަދި ދިވެހި ބަހަށް ގިނަގުނަ ހިދުމަތްތަކެއް ކޮށްދެއްވާފައިވާ އަބްދުﷲ ސޯދިގު (ސޯދުބެ) ބައިވެރިވަޑައިގެންނެވިއެވެ. މީގެ އިތުރުން ވެސް މިނިސްޓްރީ އޮފް އާޓްސް، ކަލްޗަރ އެންޑް ހެރިޓޭޖްގެ އިސްވެރިންނާއި ސުކޫލްތަކުގެ ދަރިވަރުންނާއި ނަދުވީ ކިޔަވައިދެއްވާފައިވާ ބައެއް ދަރިވަރުން ވެސް މި ރަސްމިއްޔާތުގައި ވަނީ ބައިވެރިވެފައެވެ.
މަރުހޫމް މުހައްމަދު ނަދުވީ ކުރެއްވި އިތުރު މަސައްކަތްތަކުގެ ތެރޭގައި ދިވެހި ބަހުގެ ޑިގްރީ ކޯހުގެ އަދަބިއްޔާތުގެ މުގައްރަރު ލިޔުއްވައި ކިޔަވައި ދެެއްވުން ވެސް ހިމެނެއެވެ. މިއީ ދިވެހި އަދަބީ ފާޑުކިޔުމުގެ އިލްމާއި ބެހޭގޮތުން ނެރޭ ފުރަތަމަ ފޮތެވެ.
