ޝަރުއީ ދާއިރާގައި ހުރި އިސްލާހުކުރަން ޖެހޭ ކަންތައްތައް ފާހަގަކޮށް ސުޕްރީމް ކޯޓަށް ހުށަހަޅަން މަސައްކަތްކުރި ޕެޓިޝަނުގައި ސޮއިކުރި 56 ގާނޫނީ ވަކީލުން ސަސްޕެންޑް ކުރުމުން އެކި ގައުމުތަކުން ފާޑު ކިޔައިފި އެވެ.
ބޭރުގެ ހުރިހާ ބޮޑެތި މީޑިއާތަކުގައި ވަކީލުން ސަސްޕެންޑް ކުރި ހަބަރު ޝާއިއުކޮށްފައިވާއިރު، އިނގިރޭސިވިލާތުން ރާއްޖެއަށް ކަނޑައަޅުއްވާފައި ހުންނަވާ ސަފީރު ޖޭމްސް ޑޯރިސް ވިދާޅުވީ ގާނޫނު އަސާސީ ނެގެހެއްޓުމަށް ގޮވާލުމުން ވަކީލުން ސަސްޕެންޑް ކުރުމަކީ ހިތާމަވެރިކަމެއް ކަމަށާއި މުޖުތަމައުގައި ކަންކަމާ މެދު ބަހުސް ކުރެވެންވާނެ ކަމަށެވެ.
Suspension of >50 lawyers in #Maldives for calling for Constitution to be upheld is another sorry step. Debate is healthy in every society. pic.twitter.com/FqEAIGmOL8
— James Dauris (@JamesDauris) September 11, 2017
ކެނެޑާ އިން ވެސް ވަކީލުން ސަސްޕެންޑް ކުރުމުން ކަންބޮޑުވުން ފާޅުކޮށްފަ އެވެ. ސްރީލަންކާގައި ހުންނަ ކެނެޑާގެ އެމްބަސީއިން ކުރި ޓްވީޓެއްގައި ބުނީ ވަކީލުން ސަސްޕެންޑް ކުރުމުން ރާއްޖޭގެ ޖުޑިޝަރީގެ މުސްތަގިއްލުކަމާ މެދު އުފެދިފައިވާ ކަންބޮޑުވުންތައް އިތުރުވެފައިވާ ކަމަށެވެ.
Suspension of 54 lawyers in #Maldives reinforces rather than allays concerns re:independence of the judiciary-an essential for any democracy
— Canada in Sri Lanka (@CanHCSriLanka) September 12, 2017
ވަކީލުން ހުށަހަޅަން މަަސައްކަތް ކުރި ޕެޓިޝަން ސުޕްރީމް ކޯޓުން ބަލައިގަނެފައި ވެސް ނުވާއިރު، ވަކީލުން ސަސްޕެންޑް ކުރުމުން އީޔޫ އިން ވެސް ވަނީ ކަންބޮޑުވުން ފާޅުކޮށްފަ އެވެ. އެ ޖަމިއްޔާއިން ބުނީ "ޝަރުއީ ދާއިރާގެ މިނިވަންކަމަށް ހުރަސް އެޅުމުގެ" މައްސަލައެއްގައި ވަކީލުން ސަސްޕެންޑް ކުރުމަކީ ރަނގަޅު ގޮތެއް ނޫން ކަމަށެވެ.
Suspending 54 lawyers isn't the right way to address issue of 'obstructing independence of the justice system'. #EU4HumanRights #Maldives
— EU to the Maldives (@EU_Maldives) September 11, 2017
ވަކީލުން ސަސްޕެންޑް ކޮށްފައިވަނީ ޖަމާޢަތް ހަދައިގެން ޣައިރު ޤާނޫނީ ގޮތެއްގައި ސުޕްރީމް ކޯޓު ދޮށަށް އެއްވެ، ޢަދުލު އިންޞާފުގެ ބާރުގެ މަސައްކަތާއިބެހި، ނުފޫޒު ފޯރުވަން މަސައްކަތްކޮށް ކޯޓުތަކުގެ އިޚްތިޞާޞްތަކާއި ކޯޓުތަކުގެ އިޖުރާއަތުތަކާއި، ކޯޓުތަކުން ނިންމާ ނިންމުންތަކާ ޚިލާފު ޣައިރު ޤާނޫނީ ލިޔުމެއް ލިޔެ، އެ ލިޔުމުގައި ސޮއިކޮށް، ދިވެހިރާއްޖޭގެ ޢަދުލު އިންޞާފު ޤާއިމުކުރުމުގެ ބާރަށް ދަތިކޮށް، ކޯޓުތަކުގެ ޙުރުމަތް ކެނޑި މައްސަލަ ބަލައި ތަޙްޤީޤުކުރަމުންދާ ކަމަށް ބުނެ މިމަހުގެ 10 ވަނަ ދުވަހު އެވެ.
ވަކީލުން ބުނަމުންދަނީ ސަސްޕެންޑް ކުރިޔަސް ޝަރުއީ ދާއިރާގައި ހުރި މައްސަލަތައް ހައްލުކުރުމަށް ފަށާފައިވާ މަސައްކަތް ހުއްޓާ ނުލާނެ ކަމަށެވެ.
ވަކީލުން ވަނީ ސުޕްރީމް ކޯޓަށް ހުށަހަޅަން މަސައްކަތް ކުރި ޕެޓިޝަން ބަންޑާރަނައިބު މުހައްމަދު އަނިލްއަށް ހުށަހަޅާފަ އެވެ. އަދި އޭތްރީ ސައިޒަށް ޕްރިންޓް ކޮށްފައިވާ ގާނޫނު އަސާސީއެއް ވަކީލުން ވަނީ އަނިލްއަށް ވެދުން ކޮށްފަ އެވެ.