ދީޕިކާ އާއި ރަންބީރު ހަތަރު އަހަރަށް ފަހު އެކުގައި

ބޮލީވުޑްގެ އެންމެ ޕޮޕިއުލަރ އޮން ސްކްރީން ކަޕުލް ކަމުގައިވާ ދީޕިކާ ޕަދުކޯން އާއި ރަންބީރު ކަޕޫރު އެކުގައި އިޝްތިހާރެއް ކުޅެފިއެވެ.

ދީޕިކާ އާއި ރަންބީރު އެކުގައި މީގެ ކުރިން ކާމިޔާބު ފިލްމްތަކެއް ކުޅޭފައިވީ ނަމަވެސް މި ފަހަރު މި ދެ ތަރިން ފެނިގެން ދާނީ އިޝްތިހާރަކުން ކަމަށް ރިޕޯޓްތައް ބުނެއެވެ.

ދީޕިކާ އާއި ރަންބީރު އެކުގައި ކުޅެފައިވާ ކާމިޔާބު ފިލްމްތަކުގެ ތެރޭގައި "ޔޭ ޖަވާނީ ހޭ ދިވާނީ" އަދި "ތަމާޝާ" ހިމެނެއެވެ.

ޕިންކް ވިލާގައި ރިޕޯޓްކޮށްފައިވާ ގޮތުން މި އިޝްތިހާރު ޝޫޓްކޮށްފައި ވަނީ އަންގާރަ ދުވަހު އެވެ.

މި ދުވަސްކޮޅު މި ދެތަރިން ވެސް ދަނީ ގިނަ މަސައްކަތްތަކެއް ކުރަމުންނެވެ. އެގޮތުން ދީޕިކާ ވަނީ ދިގު ބްރޭކަކަށް ފަހު ދާދި ފަހުން ނިއު ޔޯކްގައި އިޝްތިހާރެއް ޝޫޓްކޮށްފައެވެ.

މީގެ އިތުރުން އެސިޑް އެޓޭކުން ސަލާމަތްވި ލަކްޝްމީ އަގަރްވާލްގެ ހަޔާތުގެ މައްޗަށް ބިނާކޮށް ތައްޔަރުކުރާ ފިލްމް "ޗަޕާކް"ގެ މަސައްކަތްތައް ފެށުމަށް ދަނީ ތައްޔަރުވަމުންނެވެ. މި ފިލްމްގެ ކޯ ޕްރޮޑިއުސަރަކީ ވެސް ދީޕިކާއެވެ.

ރަންބީރު މިވަގުތު އަވަދިނެތި ދަނީ އަޔާން މުކަރްޖީގެ "ބްރަމާސްތްރާ" ގެ މަސައްކަތްތައް ކުރަމުންނެވެ. މި ފިލްމްގައި ރަންބީރާއި އެކު ލީޑް ރޯލުން ފެނިގެންދާނީ އޭނާގެ ލޯބިވެރިޔާ އާލިއާ ބަޓްއެވެ.