ޖުޑިޝަރީގައި ހިނގާ ހުރިހާ ކަމެއްގެ ބެލެނިވެރި ފަރާތަކީ ސުޕްރީމް ކޯޓެއް ނޫން ކަމަށާއި އެގޮތަށް އެއްވެސް ގާނޫނެއްގައި ވެސް ކަނޑައަޅާފައި ނޯންނާނެ ކަމަށް މަޝްހޫރު ގާނޫނީ ވަކީލް މަހްފޫޒު ސައީދު ވިދާޅުވެއްޖެއެވެ.
ހޯމަ ދުވަހުގެ ރޭ ރާއްޖެޓީވީގެ ފަލަ ސުރުޚީ ޕްރޮގްރާމްގައި މަހުފޫޒު ވިދާޅުވީ، އަދުލު އިންސާފު ގާއިމްކުރުމުގެ އެންމެ އިސްފާރާތަކީ ސުޕްރީމް ކޯޓް ނަމަވެސް ސުޕްރީމް ކޯޓަށް އެ ހިނދަކަށް ފެނިވަޑައިގަންނަހާ ގޮތަކަށް ކަންކުރުމަކީ، ގާނޫނުއަސާސީއާއި ފުށުއަރާކަމެއް ކަމަށެވެ.
"ދިވެހިރާއްޖޭގެ ސުޕްރީމް ކޯޓުން އަމަލުކުރާނެ ގޮތް ބުނެދޭނީ ރައްޔިތުން. އެގޮތް ދައްކުވައިދެނީ މަޖިލީހުން ފާސްކުރާ ގާނޫނުން، އެ ގާނޫނު ފާސްކޮށްފަ ރައްޔިތުން އަންގަނީ ޖުޑީޝަރީއަށްވެސް ކަލޭމެން މިހެން އުޅޭށޭ. ސަރުކާރަށްވެސް މި އަންގަނީ ކަލޭމެން އުޅޭނީ މިހެންނޭ. މި ހުރިހާ ކަމެއް ކުރަނީ ރައްޔިތުން،" އޭނާ ވިދާޅުވިއެވެ.
އޭނާ ވިދާޅުވީ ސުޕްރީމް ކޯޓަށްވެސް ކަމެއް ކުރެވޭނީ، އެކަން އެގޮތަށް ކުރުމަށް ރައްޔިތުން ނިންމާ ގާނޫނަކުން އެގޮތަށް އެކަން ކަނޑައެޅުމުންކަމަށެވެ.
އޭނާ ވިދާޅުވީ އެކަން އެއްވެސް ގާނޫނެއްގައި ބަޔާކޮށްފައި އަދި ނެތުމުން އެމަގުން ކަންކަން ނުހިނގާ ކަމަށާއި، ކަން ހިނގަނީ އެއާ ޚިލާފަށްކަމަށެވެ. އެގޮތުން ދަށުކޯޓާކުން ހުށައަޅާފައި އޮތް މައްސަލައެއްގެ ފައިލް ދިވެހިރާއްޖޭގެ ސުޕްރީމް ކޯޓަށް އުފުއްލަވައިގެން، އެކޯޓުން އެ މައްސަލަ ބެލީމުން އޭގެން ނުކުންނާނެ ނަތީޖާއަކީ ފުރަތަމަ މަރުހަލާގެ ކޯޓެއްގައި މައްސަލަ ހިންގާ އުސޫލުން ދިވެހިރާއްޖޭގެ ސްޕްރީމް ކޯޓުގައި އެކަން ހިނގައި ދިއުން ކަމަށް މަހުފޫޒު ވިދާޅުވިއެވެ. އޭގެ ނަތީޖާއަކަށް ވާނީ އިސްތިރުނާފުކުރުމުގެ ހައްގު ގެއްލިގެން ދިއުންކަމަށް ވިދާޅުވިއެެވެ.
ދަށު ކޯޓުން ނިންމާ ނިންމުންތައް މަތީ މަރުހަލާއެއްގެ ކޯޓަކަށް އިސްތިއުނާފަށް ހުށައެޅުމަކީ ކޮންމެ މީހަކަށްމެ ލިބިދީފައިވާ ހައްގެއް ކަމަށާއި، އެހެނަސް ސިވިލް ކޯޓަށް ހުށައަޅާ މައްސަލައެއް ސުޕްރީމް ކޯޓަށް އުފުއްލަވައި އެ މައްސަލަ އެ ކޯޓުން ބަލާނަމަ، މައްސައިގެ ޚަސްމުންނަށް މަތީ މަރުހަލާގައި އިސްތިއުނާފުކުރުމުގެ ހައްގު ވެސް ގެއްލިގެންދާ ކަމަށް އޭނާ ވިދާޅުވިއެވެ.
އެކަން އެގޮތަށް ހިނގަމުން ދާކަން ފާހަގަކުރައްވާ އޭނާ ވިދާޅުވީ އެކަން އެގޮތަށް ނުހިގާނެގޮތަކަށް، ގާނޫނަކުން ބަޔާން ކުރަން ޖެހޭނެކަމަށް ގަބޫލު ކުރައްވާކަމަށެެވެ.
އޭނާ ވިދާޅުވީ، ސުމޯޓޯ މައްސަލައެއް ހިންގުމަކީ ގާނޫނު އަސާސީއާއި ފުށުއަރާކަމެއް ނޫންކަމަށާއި، ގާނޫނު އަސާސީއާއި ފުށުއަރާ ހާލަތްތަކަކީ، ވަކި ފާރާތެއްގެ މައްޗަށް ޖިނާއީ ހުކުމެއް އަންނަ ފަދަ މައްސަލައެއް، ސްޕްރީމް ކޯޓުން ފުރަތަމަ މަރުހަލާގެ ކޯޓެއް ގޮތަށް ބަލާކަމަށް ވާނަމަ އެކަން އެގޮތަށް ނުކުރެވޭނެކަމަށެވެ.
އޭނާ ވިދާޅުވި ގޮތުގައި ސުމޯޓޯ މައްސަލަ ބެލޭނެ ގަވާއިދެއް ސުޕްރީމް ކޯޓުން އަމިއްލައަށް ހަދައިގެން ހިންގުމުގެ ބަދަލުގައި، ސުމޯޓޯ އުސޫލުން ސުޕްރީމް ކޯޓަށް ހިންގިދާނެ މައްސަލަތަކަކީ ކޮބައިކަމާއި، އެ ހާލަތްތަކަކީ ކޮބައިކަން ރައްޔިތުންގެ މަޖިލީހުން، ރައްޔިތުން ގާނޫނެއް ފާސްކުރަން ޖެހޭކަމަށެވެ.
މިހާތަނަށް ކަންހިނގާފައި ހުރި ގޮތަށް ބަލާއިރު، ކަންކަން ހިނގާ ގޮސްފައިވަނީ ގާނޫނެއްގައި ނެތީމައި ފަނޑިޔާރުންނަށް އޮޅިވަޑައިގަނެގެން ކަމަށް ގަބޫލުފުޅު ނުކުރައްވާކަމަށާއި، މައްސަލަތައް އެގޮތަށް ހިނގާފައި ހުރީ ކުރީގެ ސަރުކާރުން ކޯޓްތަކަށް އިންތިހާއަށް ނުފޫޒު ފޯރުވައިގެންކަމަށް މަހުފޫޒު ވިދާޅުވިއެވެ.
"ކޯޓްތަކުގެ މައްޗަށް ސަރުކާރުން ފޯރުވާފައި އޮތް ވަރުގަދަ ނުފޫޒެއްގެ ސަބަބުން ކަންކަން އެހެން ހިނގަމުން ދިޔައީ. އިރާދަކުރެއްވިއްޔާ އެ ނުފޫޒު މިހާރު އޮތްކަމަކަށް ގަބޫލެއް ނުކުރަން" މަހުފޫޒު ވިދާޅވުިއެވެ.
މަހުފޫޒު ވިދާޅުވީ، އާ ސަރުކާރު އައިސް މި ވޭތުވެ ދިޔަ ދުވަސްތަކުގައި ކޯޓުތަކުގެ ނިންމުން ތަކަށް ބަލާއިރު، މި ސަރުކާރުން ކޯޓްތަކުގެ މަައްޗަށް ނުފޫޒު ފޯރުވާފައެއް ނުވެއެވެ.
ރާއްޖޭގެ އަދުލު އިންސާފުގެ ދާއިރާ ހަރުދަނާ ކޮށް އިންސާފު ގާއިމް ކުރުމަށް އެންމެ މުހިއްމީ ޖުޑީޝަރީގައި ހުރި މައްސަލަތައް ހައްލުކުރެވޭނެފަދަ ގާނޫނުތަކެއް ހެދޭނެ ގާބިލް ބަޔަކު ކުރިއަަށް އޮތް ރައްޔިތުންގެ މަޖިލީހަށް ހޮއްވަވައިގެންކަން އޭނާ ފަހަގަކުރެެއްވިއެވެ.
