މި ހަފްތާ ފަހުކޮޅު ރައްޔިތުންގެ މަޖިލީހުގެ އިންތިހާބުގައި އެމްޑީޕީން ވާދަކުރާ ހުރިހާ ކެނޑިޑޭޓުންގެ ފޯރމްތައް އިލެކްޝަންސް ކޮމިޝަނަށް ހުށަހަޅާނެ ކަމަށް އެމްޑީޕީން ބުނެފިއެވެ.

އެމްޑީޕީން އާދިއްތަ ދުވަހު ބޭއްވި ނޫސްވެރިންގެ ބައްދަލުވުމުގައި އެމްޑީޕީ ސެކްރެޓަރީ ޖެނެރަލްގެ ނައިބު އަދި އެޖެންޑާ 19 ގެ ސްޕޯކްސްޕާރސަން އަފްޝަން ލަތީފް ވިދާޅުވީ މިހާރު ކުރަމުންދާ އެންމެ މުހިންމު ކަމަކީ ހުރިހާ ކެނޑިޑޭޓުންގެ ފޯރމްތައް ކޯޓް ކްލިއަރެންސައް ފޮނުވުން ކަމަށާއި އެމަސަތްކަތް 3 ވަރަކަށް ދުވަސްތެރޭގައި ނިމޭނެ ކަމަށެވެ. އަފްޝަން އިތުރަށް ވިދާޅުވީ ފޯރމްތައް އީސީ އަށް ހުށަހަޅާނީ ވަރަށް ކުލަ ގަދަ ހަރަކާތެއްގެ ގޮތުގައި ކަމަށެވެ. މި ހަފްތާ ބުރާސްފަތި ދުވަހު ޕޯސްޓަރ ހަރުކުރުމުގެ އިވެންޓެއް ރާއްޖޭގެ އެކި ކަންކޮޅުތަކުގައި ގެންދާނެ ކަމަށް މި ބައްދަލުވުމުގައި ވަނީ އިއުލާނު ކޮށްފައެވެ.

އަފްޝަން ވަނީ މިދިޔަ ހަފްތާގައި އިލެކްޝަންސް ކޮމިޝަނުން ނެރުނު މުއްދަތުގައި ކޮންމެ ބޭފުޅަކު ވެސް ވޯޓާރސް ލިސްޓު ޗެކްކޮށް މައްސަލައެއް ފާހަގަކުރެވޭނަމަ ފެބްރުއަރީ މަހުގެ 9 ވަނަ ދުވަހުގެ ކުރިން ޝަކުވާ ހުށަހެޅުމައް އިލްތިމާސް ކޮށްފައެވެ.

އެމްޑިޕީގެ ޓިކެޓު ހަވާލު ކުރުމަށް ބޭއްވި ރަސްމިއްޔާތުގައި ކުރީގެ ރައީސް ނަޝީދު ވަނީ އެމްޑީޕީން މެޖޯރިޓީ ނަގާނެ ކަމަށާއި ސަރުކާރުގެ ވައުދުތަކަކީ އެމްޑީޕިން ''ރަނުން ރަނަށް'' ފުއްދާނެ ވައުދުތަކެއް ކަމަށް ވިދާޅުވެފައެވެ.